Wodzim le Bilbao, le dziehe Spain, le nuto aɖe si me ganyawo de ame dzi le vie la me. Mí ame ene ye wodzi, eye nyee nye evelia. Míenye Katolikotɔ dovevienuwo, eya ta medea Misa gbe sia gbe. Esi mexɔ ƒe 23 la, mezu nufiala; enye dɔ si melɔ̃ ŋutɔ si mewɔ ƒe 40 sɔŋ. Mefiaa sukunusɔsrɔ̃ vovovowo, gake esi doa dzidzɔ nam wue nye nufiafia tso Katolikohaa ŋu, eye le fiẽsiwo me la, mefiaa katekismo—mefiaa nu nyɔnuviwo na kplɔ̃ŋutiyiyi zi gbãtɔ.

Ƒe 12 le nye srɔ̃ɖeɖe megbe la, meva zu ahosi, eye ele be nye ɖeka makpɔ mía vinyɔnu eneawo dzi. Ƒe 33 koe mexɔ ɣemaɣi! Mekpɔ mɔ be dzixɔse siwo nɔ asinye le Katolikohaa me la afa akɔ nam, gake nya aɖewo me meganɔ kɔkɔm nam o kokoko. Mebiana be, ‘Esi Kristo va ɖe mí vɔ la, ke nu ka tae amegbetɔwo kpɔtɔ le kukum? Ne ame nyuiwo ayi dziƒo la, ke nu ka tae míedoa gbe ɖa be Mawu Fiaɖuƒea nava?’ Eye nya si ganɔ vevie nam wue nye: ‘Ne Mawu drɔ̃a ʋɔnu mí le ku me vavã la, ke nu ka tae wòahiã be míagadzo le dziƒo, alo ŋutiklɔdzo me, alo dzo mavɔ me na ʋɔnudɔdrɔ̃ mamlɛa?’

Mebia nya mawo nunɔla geɖewo. Wo dometɔ ɖeka gblɔ nam be: “Nyemenya o. Yi ɖabia bisiɔp la. Ðe nya mawo le veviea? Èxɔ Mawu dzi se ɖe, alo? Ema ɖeɖe su!” Gake mekpɔtɔ yi edzi nɔ ŋuɖoɖo dim na nye nyabiaseawo. Emegbe la, mede Yesutɔwo ƒe nusrɔ̃ƒe, mede Pentekosttɔwo gbɔ, eye mede Sidzedzehametɔwo hã gbɔ. Ke hã ame aɖeke mete ŋu ɖo nye nyawo ŋu wòdze ŋunye o.

Esi menɔ nye ƒe 60-awo me la, sukuvi aɖe si xɔ ƒe adre la kpem be made Yehowa Ðasefowo ƒe kpekpe aɖe. Nu si teƒe mekpɔ le afi ma kple nya siwo mese la do dzidzɔ nam, gake esi wònye be vovo menɔa ŋunye ɣemaɣi o ta la, afi ma koe mía kple Ðasefowo ƒe gododoa se ɖo. Ƒe eve megbe la, Ðasefo atsu kple asi siwo ŋkɔwoe nye Juan kple Maite la va ƒo ʋɔ nam. Ɣleti etɔ̃ sɔŋ mebiaa nya wo woɖoa eŋu nam; enye numedzodzro tsitotsito aɖe míewɔ, si na melɔ̃ wodze Biblia sɔsrɔ̃ gɔme kplim.

Menɔa mɔ kpɔm na míaƒe nusrɔ̃ɣi ɖe sia ɖe vevie! Meku nya ɖe sia ɖe me tsitotsito, eye mezã Biblia gɔmeɖeɖe etɔ̃ ale  be maka ɖe edzi nenye be nu si fiam Yehowa Ðasefowo le lae nye nyateƒea. Eteƒe medidi o, meva kpɔe kɔtɛ be nye subɔsubɔdzixɔsewo na metɔtɔ ƒe gbogbo aɖewoe nye ema. Vovototo si gbegbe le nye dzixɔse tsãtɔawo kple nu si srɔ̃m menɔ le Biblia me dome la na nye mo wɔ yaa. Ewɔ nuku nam ŋutɔ; mese le ɖokuinye me abe ɖe wole dzixɔse siwo ƒo ke ɖe to sesĩe ɖe nye dzi me la hom kple ke ene.

Emegbe la, srɔ̃nye evelia va dze dɔ vevie eye wòku. Ɣemaɣi lɔƒoe mexɔ dzudzɔ le dɔ me eye meʋu le Bilbao hena ɣeyiɣi aɖe. Juan kple Maite hã ʋu yi teƒe bubu. Evem be nyemeyi nye Biblia nusɔsrɔ̃a dzi o. Ke hã menya le nye dzi me be meke ɖe kesinɔnu vavã aɖe ŋu. Nyemeŋlɔe be gbeɖe o.

Anɔ abe ƒe 20 ene megbe esime mexɔ ƒe 82 la, Juan kple Maite trɔ va Bilbao eye wova kpɔm ɖa. Dzi dzɔm ŋutɔ be megakpɔ wo ake! Mekpɔe be Yehowa meŋlɔm be o, eye megadze nua sɔsrɔ̃ gɔme ake. Juan kple Maite gbɔ dzi ɖi nam ŋutɔ, elabena megabiaa nya siwo mebia wo va yi la ake zi gbɔ zi geɖe. Medi be mase ale si Biblia ɖo nya mawo ŋui la zi geɖe ale be mate ŋu aɖe asi le nye dzixɔse tsãtɔawo ŋu keŋkeŋ. Medi hã be masu te nyuie ate ŋu aɖe Biblia me nyateƒea gɔme na xɔ̃nyewo kple nye ƒometɔwo.

Meva xɔ nyɔnyrɔ mlɔeba esime mexɔ ƒe 87, eye emae nye ŋkeke si dzi mekpɔ dzidzɔ le wu le nye agbe me. Yehowa Ðasefowo ƒe takpekpe aɖe mee mexɔ nyɔnyrɔ le. Kristotɔ hamemetsitsi aɖe ƒo dutoƒonuƒo aɖe si me wòzã Biblia tsɔ ɖe nu me na mí ame siwo le nyɔnyrɔa xɔ ge la. Nuƒo sia me nyawo wɔ dɔ ɖe dzinye ale gbegbe be mefa avi. Menɔ nyawo sem abe Yehowa ŋutɔe le nu ƒom nam tẽe ene. Esi wonyrɔm vɔ la, Ðasefo gbogbo aɖewo va kafum, togbɔ be nyemekpɔ wo dometɔ akpa gãtɔ kpɔ o hã!

Menya xoxoxo be Yesu Kristoe nye “mɔ la.” (Yohanes 14:6) Gake Biblia sɔsrɔ̃a kpe ɖe ŋunye meva nya Yehowa, ame si dɔ Yesu ɖe mí. Fifia metea ŋu doa gbe ɖa na Mawu, si nye Fofonye kple Xɔ̃nye lɔlɔ̃a. Esi mexlẽ agbalẽ si nye Te Ðe Yehowa Ŋu * la, ewɔ dɔ ɖe dzinye ŋutɔ. Zi gbãtɔ si mexlẽe la, mexlẽ agbalẽ bliboa le zã ɖeka me! Ewɔ dɔ ɖe dzinye ale gbegbe eye mekpɔe be Yehowa nye nublanuikpɔla vavã.

Ne meɖo ŋku ɣeyiɣi gbogbo siwo me menɔ nyateƒea dim dzi la, meɖoa ŋku Yesu ƒe nya sia dzi: “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui na mi.” (Mateo 7:7) Esi meva kpɔ ŋuɖoɖo na nya siwo menɔ biabiam ɣeyiɣi didi aɖe la azɔ ta la, edoa dzidzɔ nam ŋutɔ be magblɔe na ame bubuwo.

Togbɔ be mexɔ ƒe 90 fifia hã la, mesena le ɖokuinye me be ɖevi ko menye le mawunyasɔsrɔ̃ gome. Ɣesiaɣi si mede kpekpe le Fiaɖuƒe Akpata me la, enyea mɔnukpɔkpɔ tɔxɛ nam be masrɔ̃ nu veviwo eye made ha kple nɔvinye ŋutsu kple nyɔnu lɔlɔ̃awo. Nye didie nye be magava fia nu ake le Paradiso si ƒe ŋugbe Mawu do la me le anyigba dzi. (Nyaɖeɖefia 21:3, 4) Nu si mele mɔ kpɔm na vevie ye nye be magakpɔ nye ame veviwo ake eye mɔnukpɔkpɔ nasu asinye mafia Biblia me nyateƒea wo. (Dɔwɔwɔwo 24:15) Aleke gbegbe mele mɔ kpɔm be maƒo nu tso kesinɔnu si Yehowa nam le nye nyagãkukume la ŋu na woe nye esi!