•   “China ka nya ta be ƒe sia me ƒe dzomeŋɔli ye yame xɔ dzo gbãgbãgbã wu, eye wònye kuɖiɖi ‘sesẽtɔ’ etɔ̃lia si teƒe yewokpɔ kpɔ.”—The Guardian, September 7, 2022.

•   “Ƒe atɔ̃liae nye esia kuɖiɖi yi edzi le nu gblẽm le Afrika ƒe akpa aɖewo vevie.”—UN News, August 26, 2022.

•   “Numekulawo ka nya ta be ku aɖi vevie le Europa ƒe akpa gãtɔ kloe, eye esiae anye kuɖiɖi sesẽtɔ kekeake le ƒe 500 me.”—BBC News, August 23, 2022.

 Numekula geɖe le gbɔgblɔm be kuɖiɖi siawo adzi ɖe edzi eye wo nu agasẽ ɖe edzi gɔ̃ hã. Ðe nuwo ava ka ɖe eme le etsɔmea? Nya kae Biblia gblɔ?

 Biblia gblɔ tso míaƒe ŋkekea ŋu be:

•   “Dɔwuame . . . ava teƒeteƒewo.”—Luka 21:11.

 Zi geɖea, kuɖiɖi wɔnɛ be nuɖuɖu vena, eye esia hea dɔwuame vanɛ. Nuɖuɖu ƒe veve siawo kple fukpekpe kple ku si wòhena vɛ nye Biblia ƒe nyagblɔɖi me vava.—Nyaɖeɖefia 6:6, 8.

 Biblia gblɔ nyateƒenya vevi aɖe si na míekpɔ nu si tae kuɖiɖiawo nu le sesẽm ɖe edzi. Egblɔ be:

•   “Ŋusẽ mele amegbetɔ si be eya ŋutɔ nafia mɔ eƒe zɔzɔme o.”—Yeremiya 10:23.

 Esia fia be amegbetɔwo mate ŋu afia “mɔ [woƒe] zɔzɔme” alo aɖu wo ɖokuiwo dzi wòadze edzi o. Woƒe nyametsotso gbegblẽwo gbɔe wòtsona zi geɖe be ku ɖina eye tsi vena.

•   Dzɔdzɔmeŋutinunyala geɖe lɔ̃ ɖe edzi be amegbetɔwo ƒe nuwɔnawoe he xexea me ƒe dzoxɔxɔ vɛ, eye esia wɔe be kuɖiɖi le dzidzim ɖe edzi le xexea me godoo.

•   Ŋuklẽlawo ƒe nuwɔnawo kple nyametsotso siwo amewo wɔna etsɔme ŋu mabumabui hea avewo tsɔtsrɔ̃ kple yame ƒe ɖiƒoƒo vɛ eye esia wɔe be tsi nyuiwo dome le gbegblẽm.

 Gake Biblia na mɔkpɔkpɔ mí.

 Biblia do ŋugbe be Mawu ava ɖɔ tsi ƒe veve si teƒe kpɔm míele egbea ƒe kuxia ɖo. Aleke wòawɔe?

1.  1. Mawu atsrɔ̃ “ame siwo le anyigba la gblẽm.” (Nyaɖeɖefia 11:18) Mawu aɖe ame vɔ̃ɖi ŋuklẽla siwo ƒe nuwɔnawo gblẽa nu le anyigbaa ŋu si wɔnɛ be tsi vena la ɖa.—2 Timoteo 3:1, 2.

2.  2. “Bleziblezi azu ta, eye kuɖiɖinyigba azu tsidzɔƒe.” (Yesaya 35:1, 6, 7) Mawu aɖɔ nu siwo kuɖiɖi gblẽ la ɖo eye wòatrɔ anyigba wòazu paradiso si dzi tsi bɔ ɖo.

3.  3. “Èléa be na anyigba la, ènana wòwɔa nu eye wònyoa nu ale gbegbe.” (Psalmo 65:9) Mawu ƒe yayra awɔe be nuɖuɖu nyuiwo kple tsi dzadzɛwo nado agbogbo ɖe anyigbaa dzi na amewo katã.