Le February 24, 2022 ƒe ŋdi mea, Russia dukɔa na eƒe asrafowo va dze Ukraine dukɔa dzi, togbɔ be xexemedziɖulawo le agbagba geɖe dzem be yewoaƒo asa na amedzidzedze sia hã. Aleke amedzidzedze sia ate ŋu agblẽ nu le xexea ŋui? Dukɔ Ƒoƒuawo ƒe dɔdzikpɔlagã António Guterres gblɔ ŋkeke ʋɛ aɖewo do ŋgɔ be: “Fukpekpe kple tsɔtsrɔ̃ si gbegbe masɔmasɔ sia ahe vɛ la manye nya vi kura o eye esia ana hã be Europa dukɔwo kple dukɔ bubu siwo le xexea me godoo ƒe dedienɔnɔ naɖo afɔku gã aɖe me.”

•   Yesu Kristo gblɔe ɖi be ɣeyiɣi aɖe ava si “dukɔ atso ɖe dukɔ ŋu, eye fiaɖuƒe ɖe fiaɖuƒe ŋu.” (Mateo 24:7) Xlẽ nyati si nye “Nu Kae Nye ‘Ŋkeke Mamlɛawo’ Alo ‘Nuwuɣi’ La Ƒe Dzesi?” be nàkpɔ ale si aʋawɔwɔ siwo le edzi yim egbea la nye Yesu ƒe nyagblɔɖia me vava.

•   Nyaɖeɖefia ƒe agbalẽa ƒo nu tso sɔ aɖe si ‘biã hɛ̃’ la ŋu eye woɖe mɔ na edola be “wòaɖe ŋutifafa ɖa le anyigba dzi.” Eye esia tsi tre ɖi na aʋawɔwɔ. (Nyaɖeɖefia 6:4) Xlẽ nyati si nye “Sɔdola Eneawo—Ame Kawoe Wonye?” be nàkpɔ ale si nyagblɔɖi sia ku ɖe aʋawɔwɔ ŋu egbea ɖa.

•   Daniel ƒe agbalẽa ƒo nu tso fuléle aɖe si anɔ “dziehefia” kple “anyiehefia” la dome. (Daniel 11:25-45) Kpɔ video si nye Nyagblɔɖi Siwo Va Eme—Daniel Ta 11 be nàkpɔ nu si tae míate ŋu agblɔ be Russia kple dukɔ siwo wɔ ɖeka kplii lae nye dziehefia la. a

•   Nyaɖeɖefia ƒe agbalẽa gaƒo nu tso “Mawu Ŋusẽkatãtɔ la ƒe ŋkeke gã la ƒe aʋawɔwɔ” ŋu. (Nyaɖeɖefia 16:14, 16) Ke hã, aʋawɔwɔ sia menye aʋawɔwɔ si ayi edzi le dukɔwo dome abe ale si míele ekpɔm egbea ene o. Xlẽ nyati si nye “Nu Kae Nye Armagedon-ʋa La?” be nànya nu geɖe tso aʋa ma ŋu.

•   Biblia gblɔ be Mawu atsi “aʋawɔwɔwo nu le anyigba bliboa dzi.” (Psalmo 46:9) Xlẽ nyati si nye “Mɔkpɔkpɔ Vavã Si Li Be Nuwo Anyo Le Etsɔme” be nànya nu geɖe tso ŋugbe siwo Mawu do ku ɖe etsɔme ŋu la ŋu.

•   Yesu fia eyomedzelawo be woado gbe ɖa be Mawu Fiaɖuƒea nava. (Mateo 6:9, 10) Fiaɖuƒe ma nye dziɖuɖu si le dziƒo si ana Mawu ƒe lɔlɔ̃nu na anyigbaa nava eme, eye Mawu ƒe lɔlɔ̃nue nye be ŋutifafa naxɔ xexea me. Be nàkpɔ ale si Fiaɖuƒe sia aɖe vi na wòe la, kpɔ video si nye Nu Kae Nye Mawu Fiaɖuƒe La?

 Yehowa Ðasefo siwo wu 129,000 ye le Ukraine. Abe Yehowa Ðasefo siwo le dukɔ bubuwo me ke enea, Ðasefo siwo le Ukraine hã srɔ̃a Yesu eye womedea akpa aɖeke dzi le dunyahehe me o, eye womeƒoa wo ɖokui ɖe aʋawɔwɔ me hã o. (Yohanes 18:36) Le xexea me godooa, Yehowa Ðasefowo yi edzi le gbeƒã ɖem ‘Fiaɖuƒe ŋuti nya nyuia’ be Fiaɖuƒeae akpɔ amegbetɔwo ƒe kuxiwo, siwo dome aʋawɔwɔ le, la gbɔ. (Mateo 24:14) Míele kpewòm be nàdo ka kpli mí asrɔ̃ nu tso mɔkpɔkpɔ si ŋu Biblia ƒo nu tsoe la ŋu.