Yehowa Ðasefowo ƒe habɔbɔa dea bubu gome si le amewo si be woana wo ŋu nyatakakawo nanɔ ɣaɣla ahanɔ dedie la ŋu. Habɔbɔa kpɔe be ele vevie be yewoaɖe nu sia nu me na Yehowa Ðasefo ɖekaɖekawo tsitotsito tso wo ŋu nyatakaka veviwo xɔxɔ be woatsɔ akpɔ woƒe hiahiãwo gbɔ ŋu, eye wɔwɔa esia le ameŋunyatakaka bubu ɖe sia ɖe si woxɔna be woatsɔ awɔ woƒe subɔsubɔ kple dɔmenyo dɔwo ade goe hã gome; wonya hã be ele vevie be yewoagaʋu go amewo ŋuti nya ɣaɣlawo o, ke boŋ yewoakpɔ egbɔ be wokpɔ nyatakakawo ta nyuie wole dedie. (Lododowo 15:22; 25:9) Míedea asixɔxɔ gã aɖe amewo ŋuti nyatakakawo ta kpɔkpɔ ŋu.—Lododowo 20:19.

Dukɔ geɖewo de sewo be woatsɔ akpɔ gome si le amewo si be wo ŋu nyatakakawo nanɔ ɣaɣla la ta. Yehowa Ðasefowo ƒe habɔbɔa, si dome woƒe alɔdzedɔwɔƒewo le, ya kpɔa gome si le amewo si be woade bubu wo ŋuti nyatakakawo ŋu ahana woanɔ dedie la ta xoxoxo hafi dukɔ mawo va de se siawo gɔ̃ hã. Yehowa Ðasefowo ƒe habɔbɔa ayi edzi anɔ amewo ŋuti nyatakaka siwo wòxɔ la ta kpɔm abe ale si wòwɔnɛ xoxoxo ene.

Ameŋunyatakakawo Ta Kpɔkpɔ Ƒe Ðoɖo Siwo Le Mía Si. Ðoɖo siwo le Yehowa Ðasefowo ƒe habɔbɔa si le amewo ŋuti nyatakakawo ŋu dɔ wɔwɔ mee nye esi:

1. Míewɔa amewo ŋuti nyatakakawo ŋu dɔ le mɔ si sɔ hele se nu la nu.

2. Míexɔa amewo ŋuti nyatakakawo hewɔa wo ŋu dɔ le mɔ siwo hiã be woatsɔ awɔ Yehowa Ðasefowo ƒe subɔsubɔ kple dɔmenyo dɔwo la ɖeɖe ko nu.

3. Míekpɔa egbɔ be amewo ŋuti nyatakakawo de pɛpɛpɛ eye míetrɔa asi le wo ŋu ne ameawo na nyatakaka yeyewo mí. Ne habɔbɔa nya nya nu tso vodada aɖe ŋu ko la, eɖɔnɛ ɖo enumake.

4. Míedzraa amewo ŋuti nyatakaka siwo míexɔ la ɖo va se ɖe ɣeyiɣi didi si míehiã na wo be míatsɔ awɔ nu si(wo) tae míexɔ wo ɖo la ko.

5. Míedzea agbagba dea bubu gome si le amewo si be woƒe nyatakakawo nanɔ dedie la ŋu.

6. Míeɖea afɔ siwo hiã le mɔ̃ɖaŋununya kple hakplɔɖoɖowo gome tsɔ kpɔa egbɔ be míagaʋu go amewo ŋuti nyatakakawo le mɔ si mele se nu o la nu o. Míetrɔa asi le kɔmpiuta siwo katã dzi amewo ŋuti nyatakakawo le la ŋu be ame siwo awɔ dɔ tso wo ŋu koe kpɔ mɔ aʋu wo. Míedoa ɔfisiwo ƒe ʋɔtruwo ne míekpã le dɔ me eye ame siwo wɔa dɔ le afi ma koe ate ŋu aʋu wo.

7. Míaƒe alɔdzedɔwɔƒewo menɔa amewo ŋuti nyatakakawo ɖom ɖe wo nɔewo o negbe ɖe habɔbɔa hiã wo be wòatsɔ awɔ eƒe mawusubɔsubɔ kple dɔmenyo dɔwo. Yehowa Ðasefowo katã lɔ̃ ɖe esia dzi esi woawo ŋutɔ lɔ̃ faa tso nya me be yewoazu Yehowa Ðasefowo.

Ameŋunyatakakawo ta kpɔkpɔ ƒe ɖoɖo siawo ke dzie míezɔna ɖo le ameŋunyatakakawo zazã si ŋu woƒo nu tsoe le agbalẽ si nye Ðoɖo Hena Yehowa Ƒe Lɔlɔ̃nu Wɔwɔ, si Yehowa Ðasefo ɖe sia ɖe xɔna esime wòzu gbeƒãɖela la gome. Àte ŋu akpɔ esia ŋu nya bubuwo le Ðoɖo Hena Yehowa Ƒe Lɔlɔ̃nu Wɔwɔ gbalẽa me.

Yehowa Ðasefowo kpɔa gome si le ame si be woana eŋu nyatakaka veviwo nanɔ dedie, be woagatrɔ asi le eŋu alo agblẽ edome le eƒe manyamanya me o la ta le ɖekawɔwɔ me kple nya siwo le Ameŋunyatakakawo Zazã Ƒe Ðoɖo Siwo Le Yehowa Ðasefowo Si ƒe tanya sue si nye Wò Gomenɔamesiwo te.

Ameŋunyatakakawo Ta Kpɔkpɔ Ƒe Ðoɖo Siwo Le Yehowa Ðasefowo Si, si dze le etame la dzie Yehowa Ðasefowo nɔa te ɖo zãa amewo ŋu nyatakakawo le xexea me godoo.