Ame ka ƒe dɔe wònye be wòafia nu ɖeviwo tso gbɔdɔnyawo ŋu? Biblia gblɔ be dzilawo ƒe dɔe, eye aɖaŋuɖoɖo siwo gbɔna ɖe vi na dzila geɖewo:

•   Megakpe ŋu na wò o. Biblia ƒo nu tso gbɔdɔnyawo kple míaƒe vidzinuwo ŋu tẽe. Gakpe ɖe eŋu la, Mawu gblɔ na Israel-dukɔa be woafia nu “ɖeviwo” ku ɖe nu siawo ŋu. (5 Mose 31:12; 3 Mose 15:2, 16-19) Àte ŋu azã nya siwo dze to atsɔ afia nu viwòa tso gbɔdɔnyawo ŋu evɔ manye nya siwo ana wòabu vidzinuwo be wonye ŋukpenanuwo o.

•   Nɔ efiam vivivi. Le esi nàfia nu gbogbo aɖewo viwòa tso gbɔdɔnyawo ŋu gbe ɖeka ko ne ele sɔhɛme ɖom la, nɔ nu fiamee vivivi tso eŋu le ale si wòate ŋu ase egɔmee nu.​—1 Korintotɔwo 13:11.

•   Fia agbe nyui nɔnɔe. Wotea ŋu fiaa nanewo ɖeviwo tso gbɔdɔnyawo ŋu le suku. Ke hã, Biblia de dzi ƒo na dzilawo be woafia nu wo viwo ku ɖe gbɔdɔnyawo ŋu, menye tso vidzinuwo ŋu ɖeɖe ko o. Ele be woafia nɔnɔme nyuitɔ kple susu nyuitɔ si dze be wòanɔ wo si ku ɖe gbɔdɔnyawo ŋu la wo.​—Lododowo 5:1-23.

•   Lé to ɖe viwò ƒe nyawo ŋu. Mègado dziku alo atsi klokloklo abu fɔ viwòa ne ele nya biam wò tso gbɔdɔnyawo ŋu o. Ke boŋ ‘ɖe abla le nusese me, eye nànɔ blewu le nuƒoƒo me.”—Yakobo 1:19..

Ale si nàwɔ akpɔ viwò ta tso ɖevigbɔdɔlawo si me

•   Srɔ̃ nu tso wo ŋu. Srɔ̃ nu tso ale si ɖevigbɔdɔlawo wɔa nui la ŋu​—Lododowo 18:15; kpɔ agbalẽ si nye Questions Young People Ask—Answers That Work, Babla 1 ƒe ta 32 (Les jeunes s’interrogent — Réponses pratiques, Babla 1 ƒe ta 32).

•   Wò ŋku nenɔ viwòa ŋu. Hafi nàda viwòa ɖe ame aɖe gbɔ la, ehiã be wòanye ame si ŋu kakaɖedzi le, eye mègaɖe mɔ viwòa nazu ‘vi si womekpla o.’​—Lododowo 29:15.

•   Fia nu siwo me masɔ le be wòaɖo to ame tsitsiwo o lae. Ele be woafia ɖeviwo be woabu wo dzilawo. (Kolosetɔwo 3:20) Gake ne èfia viwòa be ele be wòaɖo to ame tsitsiwo le nu sia nu me la, ke èle edem afɔku me, amewo ate ŋu agblẽe. Dzila Kristotɔwo ate ŋu agblɔ na wo viwo be, “Ne ame aɖe gblɔ na wò be nàwɔ nane si Yehowa de se be míagawɔ o la, gbe.”​—Dɔwɔwɔwo 5:29.

•   Fia mɔnu bɔbɔe aɖewo siwo dzi wòato akpɔ eɖokui ta lae. Fia viwòa nu si wòawɔ ne ame aɖe di be yeade asi eŋu ne mèle aƒe me o. Ne èhe eƒe susu yi nu siwo ate ŋu adzɔ dometɔ aɖe dzi eye nèwɔ ale si tututu wòle be wòawɔ nui wòkpɔ la, dzi aɖo eƒo wòagblɔ na ɖevigbɔdɔla ɖe sia ɖe be, “Dzudzɔ! Ne mèdzudzɔ oa, magblɔe na papa kple dada!” ahasi le teƒea kaba. Ate ŋu ahiã be nànɔ ‘eku ɖe to me’ nɛ edziedzi, elabe ɖeviwo tea ŋu ŋlɔa nu be kaba.—5 Mose 6:7.