“Tetekpɔ aɖeke mevaa mia dzi o, negbe esi tɔgbi vaa amegbetɔwo dzi la ko. Ke nuteƒewɔlae Mawu nye, eye maɖe mɔ woate mi akpɔ wu esi nu miate ŋu anɔ te ɖo o, gake ne tetekpɔa va la, ana mɔ si dzi miato ado le eme la hã, ale be miate ŋu ado dzi atsɔe.”—1 Korintotɔwo 10:13, Xexe Yeye Gɔmeɖeɖe Biblia.

 “Tetekpɔ aɖeke meva mia dzi kpɔ o negbe ame tɔ ɖeɖeko, gake nuteƒewɔla enye Mawu, ame si mana mɔ bena, woate mi akpɔ awu ale si miate ŋui la o; ke ana gododo le eme hã akpe ɖe tetekpɔ ŋuti, bene miate ŋu atsɔe.”—1 Korintotɔwo 10:13, Eʋegbe Biblia.

 Kpukpui sia he susu yi Mawu ƒe nɔnɔme aɖe si nana eƒe nu nyoa mía ŋua dzi. Eyae nye nuteƒewɔwɔ. Mawu subɔla wɔnuteƒewo ate ŋu aka ɖe edzi be akpe ɖe yewo ŋu, vevietɔ ne tetekpɔwo alo nɔnɔme sesẽwo va wo dzi.

 “Tetekpɔ aɖeke mevaa mia dzi o, negbe esi tɔgbi vaa amegbetɔwo dzi la ko.” Ete ŋu dzɔna be Mawu subɔlawo nado go nɔnɔme aɖe si ate wo kpɔ be woawɔ nu si madze eŋu o. Togbɔ be nuteƒewɔwɔ le nɔnɔme mawo me menɔa bɔbɔe o hã, menye nu madzɔkpɔwoe wonye o, elabe wodzɔna ɖe ame geɖe dzi. a Eya ta Mawu subɔlawo ate ŋu aka ɖe edzi be yewo hã yewoate ŋu ado dzi le nɔnɔme mawo me.

 “Nuteƒewɔlae Mawu nye.” Míate ŋu aka ɖe Yehowa b Mawu dzi ahaɖo ŋu ɖe eŋu bliboe. Edo ŋugbe be yemagblẽ ame siwo lɔ̃ ye hewɔa nuteƒe na ye eye woɖoa to ye la ɖi akpɔ o, eye ewɔna ɖe eƒe ŋugbedodo sia dzi ɣesiaɣi. (5 Mose 7:9; Psalmo 9:10; 37:28) Eya ta esubɔlawo ate ŋu aka ɖe edzi be awɔ ɖe ŋugbedodo dedziƒoname eve siwo kplɔe ɖo le kpukpui sia mea hã dzi.

 “Maɖe mɔ woate mi akpɔ wu esi nu miate ŋu anɔ te ɖo o.” Ale si Mawu ɖenɛ fiana be yenye nuteƒewɔlae nye be meɖea mɔ tetekpɔa nu sẽna ale gbegbe be manya wɔ na mí be míado dzi atsɔe o. Enya esubɔlawo katã ƒe ŋutetewo.—Psalmo 94:14.

 “Ne tetekpɔa va la, ana mɔ si dzi miato ado le eme la hã, ale be miate ŋu ado dzi atsɔe.” Mawu ate ŋu aɖe nɔnɔme sesẽa ɖa le esubɔlawo dzi alo akpe ɖe wo ŋu be woanɔ te ɖe enu. Le kpɔɖeŋu me, ate ŋu afia mɔ wo to eƒe gbɔgbɔ kɔkɔea dzi, ate ŋu ato Biblia dzi afa akɔ na wo, alo ato haxɔsetɔwo dzi akpe ɖe wo ŋu.—Yohanes 14:26; 2 Korintotɔwo 1:3, 4; Kolosetɔwo 4:11.

 Kpukpui sia me nyawo dze le lɛta si apostolo Paulo ŋlɔ na Kristo hame si nɔ Korinto la me. Le Paulo ƒe lɛtaa ƒe akpa sia la, etsɔ nu si dzɔ ɖe blema Israel-viwo dzi wɔ kpɔɖeŋui tsɔ xlɔ̃ nu Korintotɔwo. (1 Korintotɔwo 10:11) Paulo ƒo nu tso tetekpɔ kple dodokpɔ vovovo siwo va Israel-viwo dzia ŋu. Wo dometɔ aɖewoe nye trɔ̃subɔsubɔ kple gbɔdɔdɔ manɔsenu. (1 Korintotɔwo 10:6-10) Israel-vi aɖewo mete ŋu wɔ nuteƒe o. Le nu si dzɔ ɖe wo dzi taa, Paulo ɖo ŋku edzi na Kristotɔwo be woagaka ɖe wo ɖokui dzi akpa asusu be tetekpɔwo mate ŋu aɖu yewo dzi gbeɖe o. (1 Korintotɔwo 10:12) Ke hã, etsɔ 1 Korintotɔwo 10:13 me nyawo de dzi ƒo na wo. Mawu subɔla wɔnuteƒewo ate ŋu aɖu tetekpɔ ɖe sia ɖe dzi.

 Kpɔ video kpui sia be nàkpɔ nu si ŋu 1 Korintotɔwo ku ɖo.