“Yehowa ƒe nu nenyo ŋuwò vevie, ekema ana nu siwo wò dzi di la wò.”—Psalmo 37:4, Xexe Yeye Gɔmeɖeɖe.

 “Yehowa ƒe nu nenyo ŋuwò, eye wòana nu si wò dzi di la wò.”—Psalmo 37:4, Eʋegbe Biblia.

 Hakpalaa le dzi dem ƒo na Mawu subɔlawo be woakpɔ dzidzɔ le esi ƒomedodo kplikplikpli le wo kple Mawu dome ta. Ame siwo katã le ƒomedodo ma me kple Yehowa a Mawu la ate ŋu aka ɖe edzi be awɔ woƒe didi siwo sɔa dzi na wo.

 “Yehowa ƒe nu nenyo ŋuwò vevie.” Woagate ŋu aɖe nya sia gɔme be “kpɔ dzidzɔ gãtɔ kekeake ɖe Yehowa ŋu,” “kpɔ dzidzɔ ɖe Yehowa subɔsubɔ ŋu,” alo “kpɔ dzidzɔ ɖe nu siwo Yehowa do ŋugbe be yeawɔ na wòa ŋu.” Ne míagblɔe kpuie koa, nya sia fia be míana Mawu vavã la subɔsubɔ nanye nu si ana míakpɔ dzidzɔ gãtɔ kekeake. (Psalmo 37:4) Nu ka tae míate ŋu agblɔ nenema ɖo?

 Ame siwo subɔa Yehowa la dzea agbagba be yewoana yewoƒe susuwo nawɔ ɖeka kple Yehowa tɔ, abe ale si wòdze le Biblia me ene. Menye ɖeko wonya Mawu o, ke wodea dzesii hã be nunya le eme be yewoaɖo toe. Esia wɔnɛ be dzitsinya nyui nɔa wo si eye woƒoa asa na nyametsotso gbegblẽwo wɔwɔ kple agbemekuxi geɖe. (Lododowo 3:5, 6) Le kpɔɖeŋu me, ne edze abe nu le edzi dzem na ŋuklẽlawo alo anukwaremaɖilawo enea, esia mekua dzi na wo alo nana woʋãa ŋu o. (Psalmo 37:1, 7-9) Dzi dzɔa Mawu ƒe amewo elabe wonyae be eteƒe madidi o, Mawu aɖe nu madzɔmadzɔ wɔwɔ katã ɖa eye wòayra nuteƒewɔlawo ɖe woƒe agbe nyui nɔnɔ ta. (Psalmo 37:34) Wonyae hã be yewo Fofo si le dziƒoa kpɔa ŋudzedze ɖe yewo ŋu, eye esia hã nana wokpɔa dzidzɔ geɖe.—Psalmo 5:12; Lododowo 27:11.

 “Ana nu siwo wò dzi di la wò.” Woagate ŋu aɖe nya sia gɔme be “aɖo wò gbedodoɖawo ŋu,” alo “ana wò nu si dim nèle vevie wu.” Gake esia mefia be nu sia nu ko ame aɖe abia la, Yehowa awɔe nɛ o. Abe ale si wòle le dzila nyuiwo gome enea, Yehowa hã nya nu si nyo wu na viawo. Gawua, ele be nu si biam míele kple ale si míenɔa agbee hã nawɔ ɖeka kple Mawu ƒe nudidiwo kple eƒe lɔlɔ̃nu. (Lododowo 28:9; Yakobo 4:3; 1 Yohanes 5:14) Ne míewɔe nenemaa, ekema míate ŋu aka ɖe edzi be “Gbedodoɖasela” la aɖo to mí.—Psalmo 65:2; Mateo 21:22.

 Blema Israel Fia David ye kpa Psalmo 37 me nyawo. Eŋlɔ hagbeawo ɖe atsyã tɔxɛ aɖe me be wòasɔ ɖe ɖoɖo si nu Hebrigbe me alfabetawo le nu. b

 Amewo wɔ nu madzɔmadzɔ geɖe ɖe David ŋu. Eva hiã be wòanɔ sisim le Fia Saul kple ame bubu siwo di be yewoawui la nu. (2 Samuel 22:1) Gake David ɖoa ŋu ɖe eƒe Mawu la ŋu bliboe ɣesiaɣi. Enyae be Yehowa ava drɔ̃ ʋɔnu ame vɔ̃ɖiwo godoo. (Psalmo 37:10, 11) Ne wole abe ‘aŋgba fẽwo’ ene, si fia be nu le edzi dzem na wo gɔ̃ hãa, wo nu ava yi godoo.—Psalmo 37:2, 20, 35, 36.

 Psalmo 37 lia gblɔ nu siwo dona tso eme na ame siwo wɔa Mawu ƒe nudidiwo dzi kple nu si dzɔna ɖe ame siwo doa toku woa dzi. (Psalmo 37, 16, 17, 21, 22, 27, 28) Eya ta psalmo sia kpena ɖe mía ŋu míedzea nunya eye míenyea ame siwo ƒe nu dzea Mawu ŋu.

 Kpɔ video kpui sia be nàkpɔ nu si ŋu Psalmo ƒe agbalẽa ku ɖo.