“Yɔm, ekema matɔ na wò, eye magblɔ nu gã siwo gɔme womate ŋu ase o, eye mènya o la, na wò.”—Yeremiya 33:3, Xexe Yeye Gɔmeɖeɖe.

 “Yɔm eye matɔ na wò, magblɔ nu gã siwo mènya o eye wo me dzodzro hã meli o la na wò!”—Yeremiya 33:3, Agbenya La.

 Mawu gblɔ nya siawo tsɔ le amewo kpem be woado gbe ɖa na ye. Ne wowɔ ɖe amekpekpea dzi do gbe ɖa na Mawu la, ana woanya nu siwo ava dzɔ le etsɔme.

 “Yɔm, ekema matɔ na wò.” Nya, “yɔm” si wozã le afi sia mefia be woanɔ ɣli dom anɔ Mawu ƒe ŋkɔ yɔm dzro ko o. Ke boŋ efia be ame nanɔ gbe dom ɖa anɔ Mawu biam be wòakpe ɖe ye ŋu eye wòafia mɔ ye.—Psalmo 4:1; Yeremiya 29:12.

 Anɔ eme be blema Israel-dukɔae nya siawo yi na. Womewɔ nuteƒe na Mawu o. Babilon-srafowo va ɖe to ɖe dua. (Yeremiya 32:1, 2) Eya ta Yehowa a nɔ Israel-viwo kpem be woatrɔ ɖe ye ŋu ado gbe ɖa na ye.

 “Magblɔ nu gã siwo gɔme womate ŋu ase o, eye mènya o la, na wò.” Nu siwo Mawu do ŋugbe be yeagblɔ la nye nu siwo gɔme “womate ŋu ase o,” le mɔ sia nu be amegbetɔwo mate ŋu anya nu mawo le wo ɖokui si gbeɖegbeɖe o. Nya, “nu . . . siwo gɔme womate ŋu ase o” agate ŋu afia “nu siwo le ɣaɣla.”

 Nu kawoe nye “nu siwo le ɣaɣla” siwo Mawu aɖe afia? Woawoe nye nu siwo ava dzɔ le etsɔme—ale si woatsrɔ̃ blemadu Yerusalem wòazu aƒedo, kple ale si woagbugbɔe atso amewo nagava nɔ eme. (Yeremiya 30:1-3; 33:4, 7, 8) Gake, Mawu do ŋugbe hã be womatsrɔ̃ yeƒe amewo ƒe ƒuƒoƒo bliboa keŋkeŋ o.—Yeremiya 32:36-38.

 Ƒe 608 D.Y., si nye Fia Zedekiya ƒe ƒe ewolia mee Nyagblɔɖila Yeremiya xɔ gbedeasi sia tso Yehowa gbɔ. Yeremiya gblɔe ɖi be woatsrɔ̃ Yerusalem eye woakplɔ Zedekiya ayi aboyo me. Esi gbedeasia medzɔ dzi na fia la o ta, ena wolé Yeremiya de gaxɔ me.—Yeremiya 32:1-5; 33:1; 37:21.

 Nu siawoe nɔ dzɔdzɔm esime Mawu gblɔ nya siwo dze le Yeremiya 33:3. Nublanuitɔe la, Fia Zedekiya kple Israel-vi akpa gãtɔ do toku Mawu ƒe nyawo eye woyi edzi dze glã. (Yeremiya 7:26; 25:4) Womedo gbe ɖa na Mawu bia eƒe mɔfiame o. Ƒe ɖeka megbe la, woɖe Zedekiya le zi dzi, wotsrɔ̃ Yerusalem, eye wolé ame siwo tsi agbe la dometɔ akpa gãtɔ yi Babilon.—Yeremiya 39:1-7.

 Nya siwo dze le Yeremiya 33:3 ɖo ŋku edzi na mí egbea be Mawu ate ŋu ana “eƒe lɔlɔ̃nu ŋuti sidzedze vavãtɔ” nasu ame siwo doa gbe ɖa nɛ eye wosrɔ̃a eƒe Nya Biblia la si. Ate ŋu aɖe eƒe “nu goglowo” hã afia wo. (Kolosetɔwo 1:9; 1 Korintotɔwo 2:10) ‘Nu goglo’ siawo ƒe ɖee nye ŋugbe siwo Mawu do ku ɖe etsɔme ŋu.—Nyaɖeɖefia 21:3, 4.

 Kpɔ video kpui sia be nànya nu si ŋu Yeremiya ƒe agbalẽa ku ɖo.