“Megblɔ nya siawo na mi, be miato dzinye akpɔ ŋutifafa. Le xexea me la, miele xaxawo me tom, gake milé dzi ɖe ƒo! Nye la meɖu xexea dzi.”—Yohanes 16:33, Xexe Yeye Gɔmeɖeɖe Biblia.

 “Megblɔ nya siawo na mi, be miato dzinye akpɔ ŋutifafa. Le xexea me la, miekpɔa xaxa, gake milé dzi ɖe ƒo! Nye la meɖu xexea dzi.”—Yohanes 16:33, Eʋegbe Biblia.

 Yesu gblɔ nya mawo tsɔ de dzi ƒo na eyomedzelawo be woawo hã woate ŋu awɔ nu wòadze Mawu ŋu togbɔ be woatsi tre ɖe wo ŋu eye woato dodokpɔ sesẽwo me hã.

 “Megblɔ nya siawo na mi, be miato dzinye a akpɔ ŋutifafa.” Kpukpuia ƒe akpa susɔea ɖee fia be ŋutifafa sia mefia be kuxiwo mava mía dzi o. Ke boŋ efia be míaƒe dzi nadze eme eye míaƒe susu nadze akɔ anyi. Yesu ‘dzi koe míato’ akpɔ ŋutifafa sia; eye edo ŋugbe be yeaɖo gbɔgbɔ kɔkɔea ɖa. Gbɔgbɔ kɔkɔe sia si nye “kpeɖeŋutɔ” sẽŋu la ana Yesu ƒe nusrɔ̃lawo nanɔ te ɖe kuxi ɖe sia ɖe si ava wo dzi nu.—Yohanes 14:16, 26, 27.

 “Le xexea me la, miele xaxawo me tom, gake milé dzi ɖe ƒo!” Yesu lɔ̃ ɖe edzi be yeƒe nusrɔ̃lawo ado go dodokpɔ sesẽwo abe nu madzɔmadzɔ wɔwɔ kple yometiti ene. (Mateo 24:9; 2 Timoteo 3:12) Ke hã, susu nyuiwo li si ta wòle be ‘woalé dzi ɖe ƒo.’—Yohanes 16:33.

 “Meɖu xexea dzi.” Nya “xexea” si wozã le afi sia la fia ameƒome madzɔmadzɔ si te eɖokui ɖe aga tso Mawu gbɔ. b Biblia gblɔ le 1 Yohanes 5:19 be: “Xexe blibo la katã le vɔ̃ɖitɔ la [si nye Satana] ƒe ŋusẽ te.” Eya ta, ame siwo le “xexe” sia si ŋu woƒo nu tsoe me la ƒe nuŋububu kple nuwɔnawo mewɔa ɖeka kple Mawu ƒe lɔlɔ̃nu o.—1 Yohanes 2:15-17.

 Satana kple eƒe xexea dze agbagba be yewoana Yesu nadzudzɔ Mawu ƒe lɔlɔ̃nu wɔwɔ, ale be wòagafia nu amewo tso Mawu ŋu alo atsɔ eƒe agbe deblibo la ana wòanya tafe o. (Mateo 20:28; Luka 4:13; Yohanes 18:37) Gake Yesu meɖe mɔ xexea kpɔ ŋusẽ ɖe eƒe nuŋububu dzi alo na wòdzudzɔ nuteƒewɔwɔ na Mawu o. Ewɔ nuteƒe yi ɖase ku me gɔ̃ hã. Esia ta Yesu te ŋu gblɔ be yeɖu xexea dzi, eye be “xexea dzi ɖula” Satana “mekpɔ ŋusẽ aɖeke” ɖe ye dzi o.—Yohanes 14:30.

 Yesu to kpɔɖeŋu si eya ŋutɔ ɖo dzi ɖee fia eyomedzelawo be woawo hã woate ŋu ayi edzi awɔ nuteƒe na Mawu ne woto dodokpɔ sesẽwo me gɔ̃ hã. Ele ko abe Yesu nɔ gbɔgblɔm be: “Ne mete ŋu ɖu xexea dzi la, ke miawo hã miate ŋui.”

 Yesu gblɔ nya siawo le zã si do ŋgɔ na eƒe ku me. Esi wònya be yegbɔna kuku ge kpuie ta la, ezã mɔnukpɔkpɔ mamlɛ sia tsɔ ɖo aɖaŋu na eƒe apostolo wɔnuteƒewo. Egblɔ nya vevi aɖewo hã na wo. Le kpɔɖeŋu me, ena wonya be womagakpɔ ye azɔ o, woati wo yome, eye woawu wo gɔ̃ hã. (Yohanes 15:20; 16:2, 10) Nya siawo ate ŋu ana apostoloawo navɔ̃, eya ta Yesu gblɔ nyataƒonya si dze le Yohanes 16:33 tsɔ de dzi ƒo na wo.

 Yesu ƒe nyawo kple eƒe kpɔɖeŋua ate ŋu ade dzi ƒo na eyomedzelawo egbea hã. Kristotɔwo katã ate ŋu ayi edzi awɔ nuteƒe na Mawu ne xaxawo va wo dzi gɔ̃ hã.