Ɣeaɖewoɣia, Mawu subɔla aɖewo sena le wo ɖokui me be agbenɔnɔ ɖe Biblia ƒe nufiafiawo nu bia ɣeyiɣi kple agbagbadzedze geɖe akpa. (Psalmo 73:2, 3) Ete ŋu dzɔna gɔ̃ hã be wova nɔa nu siwo tsi tre ɖe Yehowa ƒe sewo ŋua wɔm, eye wodzea agbagba be yewoaɣla yewoƒe nuwɔna gbegblẽawo atsɔ aflu haxɔsetɔwo.

 Wotrɔ asi le nyati sia ŋu be wòakpe ɖe ame siwo le nɔnɔme sia me gake wodi be yewoaɖe asi le alakpanuwɔwɔ sia ŋua ŋuti.

Nu siwo me míadzro le nyati sia me

•  Nu kae nye agbe eve nɔnɔ?

•  Ne menɔa agbe evea, ɖe wòfia be menye ame baɖa?

•  Aleke mawɔ adzudzɔ agbe eve nɔnɔ?

•  Nya siwo hawòtiwo gblɔ

 Agbe eve nɔnɔ fia be ne èle xɔ̃wò siwo meɖoa to Yehowa o domea, èwɔa nu siwo nènya be womenyo o; gake ne èle hamea me tɔ siwo nye nuteƒewɔlawo domea, èwɔa nu wòdzena abe ɖe nèdi be yeasubɔ Yehowa ene. Ðeko wòle abe èle agbe vovovo eve nɔm, eye le wo dɔmetɔ ɖe sia ɖe mea, èle nane ɣlam ɖe ame siwo dome nèle.

 “Ne èle agbe eve nɔma, ke efia be èle nane ɣlam ɖe akpa evea siaa, eya ta ame aɖeke menya ame si tututu nènye o. Nu si wòfia koe nye be èle alakpanu wɔm ɖe ame sia ame ŋu.”—Erin.

 Ènyaa? Ne èle nane si nènya be medzea Yehowa ŋu o wɔm le adzamea, esia hã nye agbe eve nɔnɔ.

 “Esi mexɔ ƒe 14 la, meva nɔ foto kple video siwo nyɔa gbɔdɔdɔ ƒe dzodzro ɖe ame mea kpɔm le Internet dzi. Evɔa ne mele amewo domea, mewɔa nu abe ɖe melé fu amamaɖeɖenuwɔnawo kpɔkpɔ ene, gake le nye dzi mea, menya be nyemelé fui hafi o.”—Nolan.

 Biblia ƒe mɔfiame: “Ame aɖeke mate ŋu anye kluvi na aƒetɔ eve o; elabena alé fu ɖeka, eye wòalɔ̃ evelia, alo alé ɖe ɖeka ŋu, eye wòado vlo evelia.”—Mateo 6:24.

 Mefia nenema kokoko o. Ele eme be ame aɖewo tiae be yewomanɔ agbe ɖe Biblia ƒe nufiafiawo nu o ya. Gake nenemae wòle le gowòmea? Alo nu siwo gbɔna dometɔ aɖe gbɔe wòtso be nèle agbe eve nɔm:

•   Èle vɔvɔ̃m be yeava to vovo le hawòtiwo dome.

•   Nu geɖe li siwo ŋu wò kple wò sukuhatiwo siaa miekpɔa dzidzɔ ɖo, gake mele nenema le wò kple nɔvi siwo le hamea me ya gome o.

•   Èsena le ɖokuiwò me be manya wɔ na ye be yeawɔ Mawu ƒe sewo katã dzi o.

 “Ewɔ nam be nu si gbɔ wòtsona be sɔhɛ siwo nɔa agbe evea dometɔ aɖewo ƒe dzi dzea eme le ame siwo menɔa agbe nyui o domee nye be, womedina be yewoatsi anyi le yewo tɔwo dome o.”—David.

 Togbɔ be nya mawo dometɔ aɖeke mefia be esɔ be ame nanɔ agbe eve o hã, ena míekpɔ nu si tae wòate ŋu adzɔ be mɔ̃ sia naɖe ame nyuiwo gɔ̃ hã. Ne esia dzɔ ɖe dziwòa, nu kae nàte ŋu awɔ?

1.  1. Lé ŋku ɖe ale si nèle agbe nɔm fifia ŋu. Bia ɖokuiwò be: ‘Alea tututue medi be manɔa? Ne meyi edzi le agbe nɔm alea ɖe, nu kae ava do tso eme mlɔeba?’

    Biblia ƒe mɔfiame: “Aɖaŋudzela kpɔa afɔku gbɔna . . . , ke ame makpɔnuteƒe yina ɖadea ta eme, eye wòkpɔa emetsonua.”—Lododowo 27:12.

2.  2. To nyateƒe. Ƒo nu tso wò nɔnɔmea ŋu na dziwòlawo alo xɔ̃wò kpɔnuteƒe aɖe si dea bubu Yehowa ƒe sewo ŋu. Adzɔ dzi na wo be nèva bia kpekpeɖeŋu tso yewo gbɔ. Eye wò nu adze wo ŋu ne wokpɔe be èle didim be yeawɔ nu si sɔ!

    “Esesẽ nam ŋutɔ be maʋu eme be menɔ agbe ma nɔm, gake esi mewɔea, nye dzi dze eme ale gbegbe.”—Nolan.

    Biblia ƒe mɔfiame: “Ame si tsyɔa nu eƒe dzidadawo dzi la, madze edzi nɛ o, ke ame si ʋua eme, eye wòɖea asi le wo ŋu la, woakpɔ nublanui nɛ.”—Lododowo 28:13.

3.  3. Kpɔ mɔ na wò nuwɔnawo me tsonuwo. Ðo ŋku edzi be esi nèɣla nanewo ɖe dziwòlawo kple hamea taa, ate ŋu axɔ ɣeyiɣi hafi woagaka ɖe dziwò. Eya ta ɖewohĩ dziwòlawo alo hamemetsitsiwo magaɖe mɔ ɖe nanewo ŋu na wò o hena ɣeyiɣi aɖe. Lɔ̃ faa nàxɔ tohehea eye nàɖoe kplikpaa tso gbe ma gbe be yeaɖi “anukware le nuwo katã me.”—Hebritɔwo 13:18.

    Biblia ƒe mɔfiame: “Se aɖaŋuɖoɖo, eye nàxɔ amehehe, ne nàdze nunya le etsɔ si gbɔna me.”—Lododowo 19:20.

4.  4. Ka ɖe edzi bliboe be Mawu lɔ̃ wò. Esi wònye be Yehowa lɔ̃ mí taa, nu sia nu si míewɔnaa le nyanya nɛ nyuie. Eya ta ne ènɔa agbe evea, ele nyanya nɛ eye etena ɖe edzi. Gake esi wòtsɔa ɖe le eme na wò taa, edi vevie be yeakpe ɖe ŋuwò nàɖɔ wò mɔwo ɖo.—1 Petro 5:7.

    Biblia ƒe mɔfiame: “Yehowa ƒe ŋkuwo kpɔa afi sia afi le anyigba blibo la dzi, ne wòazã eƒe ŋusẽ atsɔ axɔ na ame siwo ku ɖe eŋu kple woƒe dzi blibo.”—2 Kronika 16:9.