“Mele be nàto vovo le mia tɔwo dome o, ne menye nenema o la, xɔlɔ̃ aɖeke manɔ asiwò o, màkpɔ ta na agbea o, eye etsɔme nyui aɖeke manɔ asiwò o. Ame aɖeke manya wò o eye àtsi akogo.”—Carl.

 Ðe nya mawo nye amiɖeɖe ɖe nyaa? Anɔ eme nenema. Gake ame aɖewo awɔ nu sia nu si woate ŋui be nya si Carl gblɔ la nagadzɔ ɖe yewo dzi o. Nu kae wò ya nàwɔ? Nyati sia akpe ɖe ŋuwò nànya nu nyuitɔ si wòle be nàwɔ.

•  Nu ka tae amewo dina be yewoawɔ nu wòadze amewo ŋu?

•  Nu si wòle be nànya

•  Nya siwo hawòtiwo gblɔ

•   Elabena womedina be yewo tɔwo naɖe yewo le woƒe ha me o. “Mekpɔ mía tɔ aɖewo siwo yi vɛ ɖe modzaka le afi aɖe la ƒe fotowo le Internet dzi evɔ womekpem o. Meva nɔ ɖokuinye biam be ɖe nane gblẽ le ŋunye hã, eye meva tsi dzimaɖi vevie henɔ susum be ɖe nyemedze be manɔ woƒe ha me o hã.”—Natalie.

   BU NYA SIA ŊU KPƆ: Ðe nèse le ɖokuiwò me kpɔ be xɔ̃wòwo ɖe wò le woƒe ha mea? Ðe nèdze agbagba trɔ wò nɔnɔme ale be wò nu nadze wo ŋua? Nu kae nèwɔ?

•   Elabena womedina be yewoato vovo le yewo tɔwo dome o. “Dzinyelawo meɖe mɔ nam be asitelefon nanɔ asinye o. Ne nye sukuhatiwo bia nye kaƒodzesim la, megblɔna na wo be asitelefon mele asinye o, eye wogblɔna be: ‘Nu ka? Ƒe nenie nèxɔ?’ Ne megblɔ na wo be mexɔ ƒe 13 la, ɖeko wokpɔam dũu be nye nu wɔ nublanui.”—Mary.

   BU NYA SIA ŊU KPƆ: Dziwòlawo ƒe sedede kae nana nèsena le ɖokuiwò me be yeto vovo na amewo? Aleke nèbua sedede mae?

•   Elabena womedina be woawɔ anyra le yewo ŋu o. “Ne sukuvi aɖe ƒe nuwɔna, nuƒoƒo, alo subɔsubɔha si me wòle gɔ̃ hã toto vovo la, eƒe nu medzɔa dzi na nye sukuhatiwo o. Ne èto vovo le go siawo tɔgbi me la, woatɔ ŋku wò.”—Olivia.

   BU NYA SIA ŊU KPƆ: Ðe wowɔ nu manyomanyowo ɖe ŋuwò kpɔ le esi wò nuwɔna to vovo na mia tɔwo tɔ ta? Aleke nèwɔ nui?

•   Elabena womedi be yewo kple yewo xɔlɔ̃wo dome nagblẽ o. “Medze agbagba be mawɔ nu wòadze ame siwo dome mele la ŋu. Meƒoa nu abe ame bubuwo ene. Mekoa nu ne nane meɖi kokoe o gɔ̃ hã. Ne nye sukuhatiwo le ame aɖe kom la, nye hã mekpena ɖe wo ŋu, togbɔ be menya nyuie be ave amea gɔ̃ hã.”—Rachel.

   BU NYA SIA ŊU KPƆ: Aleke gbegbee wòle vevie na wò be nàdze hawòtiwo ŋu? Ðe wòdzɔ kpɔ be nètrɔ wò nɔnɔme be yeawɔ nu wòadze wo ŋua?

•   Hawòtiwo ƒe nuwɔnawo sɔsrɔ̃ mana wò nu nadze wo ŋu kokoko o. Nu ka tae? Elabena zi geɖe la, amewo dea dzesii be ame bubu ƒe nuwɔna srɔ̃mee nèle. Brian, si xɔ ƒe 20, gblɔ be: “Ne mele nu wɔm abe ame bubuwo ene la, nye nu medzea nye sukuxɔmehatiwo ŋu o. Meva srɔ̃e be menyo be nàtrɔ wò nɔnɔme be yeadze ame bubuwo ŋu o, elabe woade dzesii be alakpanu wɔm nèle.”

   NU NYUITƆ SI NÀWƆ: Nya nu siwo le vevie na wò wu. Biblia gblɔ be: ‘Mikpɔ nu siwo le vevie wu la dze sii.’ (Filipitɔwo 1:10) Eya ta bia ɖokuiwò be, ‘Kae le vevie wu—be mawɔ nu wòadze ame siwo ƒe agbenɔnɔ to vovo na tɔnye la ŋu loo alo be manɔ ko abe ale si nye ŋutɔ mele ene?’

   “Agbagbadzedze be yeasrɔ̃ ame bubuwo ƒe nɔnɔme maɖe vi aɖeke o. Mana be amewo nalɔ̃ wò wu o, eye mana be nàva nye ame ɖɔʋu wu hã o.”—James.

•   Nuwɔwɔ be yeadze amewo ŋu ate ŋu ana nàtrɔ ame si tɔgbi nènye. Ate ŋu ana nàva zu amewo ŋu dzela si wɔa nu sia nu si ame bubuwo dina be nàwɔ. Ðekakpui aɖe si ŋkɔe nye Jeremy gblɔ be: “Tsã la, mewɔa nu sia nu si mate ŋui be madze xɔ̃nyewo ŋu, nenye be esia ana maxɔ ŋkɔ gbegblẽ gɔ̃ hã. Gake ɖeko esia na wova nɔ nu ɖom nam. Eye mezu sɔ na wo wonɔ dodom.”

   NU NYUITƆ SI NÀWƆ: Nu si nènya le nyui kple vɔ̃ ŋu nenɔ susu me na wò eye nànɔ agbe ɖe enu, tsɔ wu be nànɔ wò nɔnɔme trɔm abe agama ene be nàdze ame siwo dome nèle la ŋu. Eya ta esɔ ŋutɔ be Biblia gblɔ be: “Mègadze amehawo yome . . . o.”—2 Mose 23:2.

   “Medze agbagba be mana nu siwo dzɔa dzi na xɔ̃nyewo, abe woƒe hadzidziwo, fefewo, nudodowo, television dzi wɔnawo kple atsyɔ̃ɖonuwo ene, nadzɔ dzi na nye hã . . . Medze agbagba be manɔ abe woawo ke ene. Mekpɔe be wo katã wode dzesii be ameŋkumenu ko wɔm menɔ. Eye nye ŋutɔ hã menya. Nyemegava nɔ dzidzɔ kpɔm o, metsi akogo eye nyemeganya ame si tututu menye gɔ̃ hã o. Nyemegava nya nye ɖusi tso mia gbɔ o. Meva de dzesii be menye ame sia ame ŋue nàte ŋu adze o eye menye ame sia amee alɔ̃ wò nya gbɔ hã o. Gake esia mefia be màgadze agbagba aɖeke be yeadze xɔlɔ̃wo o; wò ya gbɔ dzi ɖi ko eye ɖo ŋku edzi be exɔa ɣeyiɣi be ame nadze xɔlɔ̃ nyuiwo eye wòatsi le susu me.”—Melinda.

•   Nuwɔwɔ be yeadze amewo ŋu ate ŋu akpɔ ŋusẽ gbegblẽ ɖe dziwò. Ðekakpui aɖe si ŋkɔe nye Chris de dzesii be nya sia nye nyateƒe le yeƒe ƒometɔ aɖe gome. Chris gblɔ tso eƒe ƒometɔ ma ŋu be: “Eva te nu siwo eya ŋutɔ mawɔ hafi o la wɔwɔ—abe atike vɔ̃ɖiwo zazã ene—ale be yeadze ye tɔwo ŋu. Atike vɔ̃ɖiwo zazã va zu numame nɛ ale gbegbe be egblẽ eƒe agbe dome kloe.”

   NU NYUITƆ SI NÀWƆ: Ƒo asa na ame siwo ƒe nuƒoƒo kple agbenɔnɔ mesɔ o. Biblia gblɔ be: “Ame si zɔna kple nunyalawo la, adze nunya, ke ame si dea ha kple bometsilawo la, eme manyo nɛ o.”—Lododowo 13:20.

   “Ɣeaɖewoɣi la, enyo be nàdze xɔlɔ̃ amewo eye nàdze agbagba be yemato vovo le wo dome o. Gake megadzɔ gbeɖe be nàwɔ nu si nènya be menyo o kple susu be yeadze wo ŋu o. Xɔlɔ̃ nyuiwo alɔ̃ wò nya gbɔ le ame si nènye ta.”—Melanie.

   Kpekpeɖeŋu: Ne èle agbagba dzem be yeate ɖe amewo ŋu adze xɔlɔ̃ yeyewo la, mègadze xɔlɔ̃ ame siwo lɔ̃ nu siwo doa dzidzɔ na wò la ɖeɖe ko o. Dze xɔlɔ̃ ame siwo nɔa agbe nyui abe wò ke ene, si fia be woanye ame siwo ƒe susu wɔ ɖeka kple tɔwò le mawusubɔsubɔ, agbenɔnɔ kple nu si nye nyui kple vɔ̃ gome.