Le egbexexea me la, ewɔna na ame aɖewo be anukwareɖiɖi gblẽa nu le ame ŋu. Wo dometɔ aɖewo gblɔna be:

• Ne nyemeble dzinyelawo o la, womaɖe mɔ nam o.’

• ‘Ne nyemefi dɔ kpɔ le dodokpɔ sia me o la, mage..’

• ‘Ne nyemefi nu sia o la, ava hiã be nye ŋutɔ madzra ga ɖo aƒlee.’

Ame bubuwo hã abia be: ‘Ðe wòhiã be míatsi dzi ɖe nya sia ŋu fũua? Menye ame sia ame koe le alakpa dam oa?’

Nyabiase ma ƒe ŋuɖoɖoe nye ao. Ame gbogbo aɖewo, siwo dometɔ aɖewo nye sɔhɛwo, ka ɖe edzi be anukwareɖiɖi ɖea vi, eye kpeɖodzi hã le eŋu. Biblia gblɔ be: “Nu si ame ƒãna la, esia kee wòaŋe.” (Galatiatɔwo 6:7) Ne míagblɔe kpuie la, míekpɔa míaƒe nuwɔnawo me tsonuwo godoo​—eɖanye nyuia alo vɔ̃a o.

Na míakpɔ ale si alakpadada gblẽ nu le ame aɖewo ŋu la ɖa.

“Meɖoa dze kple ŋutsuvi aɖe, gake esi Dada biam la, meda alakpa nɛ. Enya nyuie be alakpa dam mele. Gake esi megable Dada zi etɔ̃lia la, edo dziku ɖe ŋunye vevie. Exe mɔ nam be nyemegado go o kwasiɖa eve sɔŋ, eye nyemekpɔ mɔ azã nye asitelefon alo akpɔ television o ɣleti ɖeka sɔŋ. Tso ema dzi la, nyemegada alakpa na dzinyelawo kpɔ o!”​—Anita.

Bu nya sia ŋu: Nu ka tae eteƒe adidi hafi Anita nɔ agava ka ɖe edzi?

Biblia gblɔ be: “Azɔ la, mia dometɔ ɖe sia ɖe nato nyateƒe na ehavi.”—Efesotɔwo 4:25.

“Meble dzinyelawo eye mesusui be womanya gbeɖe o va se ɖe esime wobia tso asinye be magbugbɔ gblɔ ale si nua dzɔe. Esi wònye be nyateƒe kui ɖeka pɛ hã mele nye si megblɔ va yi me o ta la, nyemegate ŋu ɖo ŋku nya siwo tututu megblɔ na wo va yi la dzi o. Ne èto nyateƒe le gɔmedzedzea la, nu sia tɔgbi madzɔ ɖe dziwò o!”​—Anthony.

Bu nya sia ŋu: Aleke Anthony awɔ aƒo asa na ŋukpedoameɖokui sia hafi?

Biblia gblɔ be: “Yehowa nyɔa ŋu alakpanuyiwo, ke ame siwo wɔa nuteƒe la ƒe nu dzea eŋu.”—Lododowo 12:22.

“Xɔ̃nye aɖe lɔ̃a amiɖeɖe ɖe eƒe nyawo. Ekpaa nya kpea eƒe nyawo eye wòvivia nu me ŋutɔ. Eƒe nu dzɔa dzi nam, eye medzea agbagba be nyemagake ŋku ɖe eƒe nyawo me fũu akpa o. Gake eƒe amiɖeɖe ɖe nya wɔe be esesẽna nam be maka ɖe edzi alo axɔ eƒe nyawo dzi ase.”​—Yvonne.

Bu nya sia ŋu: Aleke amiɖeɖe ɖe nya kple alakpa “suesuewo” ate ŋu ana be womagaka ɖe Yvonne ƒe xɔlɔ̃ sia dzi o?

Biblia gblɔ be: “Míedina be míaɖi anukware le nuwo katã me.”—Hebritɔwo 13:18.

Azɔ na míakpɔ nu nyui siwo dona tso anukwareɖiɖi me la dometɔ aɖewo ɖa.

“Nyɔnu aɖe si nɔ zɔzɔm le ŋgɔnye la ƒe ga ge. Meyɔe tsɔ ga la nɛ. Eda akpe nam kaka. Egblɔ be: ‘Èdze agbagba ŋutɔ. Ame geɖe mate ŋu awɔ nu alea o.’ Edzɔ dzi nam ŋutɔ be wode dzesii be mewɔ nu nyui!”​—Vivian.

Bu nya sia ŋu: Nu ka tae Vivian ƒe anukwareɖiɖi sia wɔ nuku na nyɔnua? Vi kae anukwareɖiɖi ɖe na Vivian?

Biblia gblɔ be: “Dzidzɔtɔwoe nye ame siwo . . . wɔa nu dzɔdzɔe ɣeawokatãɣi.”—Psalmo 106:3.

“Míaƒe ƒomea dzraa dɔwɔxɔ me ɖo na amewo, eye ɣeaɖewoɣi ne míele xɔawo me dzram ɖo la, míekpɔa gakuwo le anyigba. Ne edzɔ alea la, míetsɔa gaa dana ɖe dɔwɔkplɔ̃ si ŋu wòte ɖo la dzi. Dɔwɔla ɖeka kpɔ dziku ɖe mía ŋu le míaƒe anukwareɖiɖi alea ta. Egblɔ be: ‘Ga sue aɖe koe nye emae!’ Gake ènya? Dɔwɔla sia kana ɖe mía dzi ɣesiaɣi.”​—Julia.

Bu nya sia ŋu: Vi kae ale si wonya Julia be eɖia anukware aɖe nɛ ne ehiã be dɔwɔƒe si wòle naŋlɔ ɖaseɖigbalẽ tso eŋu na dɔwɔƒe bubu aɖe si wòdi be yeayi aɖawɔ dɔ le?

Biblia gblɔ be: “Wɔ wò ŋutete ɖe sia ɖe nàɖe ɖokuiwò afia Mawu abe ame si dze eŋu, dɔwɔla si ƒe dɔ mekpea ŋu nɛ le mɔ aɖeke nu o.”—2 Timoteo 2:15.

“Míaƒe dɔwɔƒea xe gaƒoƒo 80 ƒe fe nam le esi teƒe be wòaxe gaƒoƒo 64 boŋ ƒe fe nam. Togbɔ be ade dzinye ŋutɔ ne mezi kpi ɖe edzi hã la, nyemate ŋu awɔ nu ma gbeɖe o. Megblɔe na míaƒe dɔwɔƒea ƒe gadzikpɔla, eye wòda akpe nam kakaka. Ga le dɔwɔƒea si zã, gake nyemate ŋu awɔ nu si anye gafifi o.”​—Bethany.

Bu nya sia ŋu: Ðe dɔwɔƒe ƒe ga fifi megblẽ boo abe ame ɖekaɖekawo ƒe ga fifi ene oa?

Biblia gblɔ be: “Yehowa nyɔa ŋu ameflula, ke tsi metoa Eya kple nu dzɔdzɔe wɔlawo dome o.”—Lododowo 3:32.