Le ƒe 2019 ƒe dzomeŋɔli me le Australia la, dzoxɔxɔa nu sẽ le dukɔa me wu ɣeyiɣi bubu ɖe sia ɖe, eye esia wɔe be dzo dze gbe le teƒeteƒewo, eye enu le sesẽm ale gbegbe. Tso September 2019 me la, dzobibi sẽŋuwo gblẽ nu le Australia ƒe nuto gã ɖe sia ɖe me. Ƒea ƒe ɣeyiɣi si me dzo gblẽa nu le la ƒe gɔmedzedze koe nye esia, gake dzobibia le nu gblẽm ale gbegbe. Ƒutanutowo kple anyieheɣedzeƒe nuto siwo nye Victoria kple New South Wales ye dzobibia gblẽ nu le wu.

Nyatakakawo ɖee fia be mía nɔvi aɖeke meku alo xɔ abi o, gake woƒe nunɔamesi geɖewo dome gblẽ, eye mía nɔviwo ƒe aƒe asieke dome gblẽ keŋkeŋ. Va ɖo fifia la, mía nɔvi 700 kple edzivɔwo ʋu le woƒe aƒewo me. Ðasefo geɖewo ʋu le woƒe aƒewo me le dzudzɔ si gbegbe xɔ nutoa me ta. Nyatakakawo ɖee fia be dzudzɔ kɔtɔɔ megblẽ yaa me nenema gbegbe le dukɔa me kpɔ o, eye be dzudzɔa agblẽ nu le ame sia ame si gbɔe la ƒe lãmesẽ ŋu vevie. Nɔvi geɖe siwo ʋu la yi woƒe ƒometɔwo, wo xɔlɔ̃wo, alo gbeƒãɖela bubu siwo le teƒe siwo dzoa megblẽ nu le o la gbɔ, le hame siwo medidi boo tso wo gbɔ o la me.

Australasia alɔdzedɔwɔƒea ɖo Afɔku Kpekpeɖeŋunakɔmiti eve be woana ŋutilãmekpekpeɖeŋu nɔviawo eye woatsɔ Biblia ade dzi ƒo na wo. Nutome sue dzikpɔla eve kple Alɔdzekɔmitia me tɔwo le mía nɔvi siwo le nuto siwo me afɔkua gblẽ nu le la srãm kpɔ eye wole dzi dem ƒo na wo. Togbɔ be ɖeɖi te mía nɔvi siwo ŋu dzoa gblẽ nu le la dometɔ akpa gãtɔ ŋu eye nu si dzɔ la te ɖe wo dzi hã la, wo dometɔ geɖe da akpe ɖe Kristotɔwo ƒe lɔlɔ̃ akuaku si mía nɔviwo yi edzi le ɖeɖem fia wo la ta.—1 Petro 2:17.