ZAGREB, Croatia—Kpekpeɖeŋunakɔmiti siwo me tɔwo nye lɔlɔ̃nu faa dɔwɔlawo kple Yehowa Ðasefowo ƒe alɔdzedɔwɔƒe si le Germany ƒe ame dɔdɔwo le kpekpem ɖe ame siwo ŋu tsiɖɔɖɔ dziŋɔtɔ si teƒe wokpɔ kpɔ le Bosnia-Herzegovina, Croatia kple Serbia la gblẽ nu le la ŋu. Tsi gã aɖe si dza le Balkan-nutowo me tso May 13 va se ɖe May 15, 2014 dzi na tsi ɖɔ ɖe nutoa eteƒe mekɔ o eye agaɖevi (si fia agakpe siwo fli le towo ŋu) 3,000 aɖewo hã gblẽ nu le nutoa me.

Kpekpeɖeŋunakɔmitiawo wɔ ɖoɖo ɖe mɔzɔnyawo, nuɖuɖu, nudodo kple teƒe siwo woanɔ gbɔ la ŋu enumake. Togbɔ be Ðasefo aɖeke meku o eye nu vevi mewɔ ɖeke o hã la, woƒe aƒe 14 ya teti dome gblẽ. Gakpe ɖe eŋu la, Yehowa Ðasefowo ƒe tadeaguƒe ɖeka gbã. Kɔmitiawo gbugbɔ le aƒe siwo gbã kple esiwo ŋu nu gblẽ le la ɖɔm ɖo, eye wole xɔ siwo me ame siwo ƒe aƒewo dome gblẽ la anɔ gbɔ la hã tum.

Aƒetɔ Josip Liović, si nye Yehowa Ðasefowo ƒe nyanuɖela le Croatia, gblɔ be: “Míaƒe dzi dze eme esi míese be nu vevi mewɔ míaƒe haxɔsetɔ aɖeke o, gake míese veve ɖe ame siwo le nu xam ɖe woƒe ƒometɔwo kple wo xɔlɔ̃wo ƒe ku ta la ŋu. Míele agbagba dzem etɔxɛe be míakpe ɖe amewo ŋu le Balkan-nuto bliboa me. Míeda akpe na mía xɔlɔ̃ siwo tso Germany va kpe ɖe mía ŋu míewɔ ɖoɖo ɖe kpekpeɖeŋunu siwo ahiã le kwasiɖa kple ɣleti siwo gbɔna me la ŋu.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Croatia: Josip Liović, tel. +385 91 5336 511

Serbia: Daniel Domonji, tel. +381 11 405 99 00