Israel Ʋɔnudrɔ̃ƒe Kɔkɔtɔ kple nutomekpovitɔwo tso nya me be Yehowa Ðasefowo kpɔ mɔ akpe hena mawusubɔsubɔ. Le Ʋɔnudrɔ̃ƒe Kɔkɔtɔ ƒe nyametsotso aɖe si wòwɔ nyitsɔ laa me la, ebia tso Ra’anana-dua si be wòawɔ ɖe ɖoɖo si le eya kple Yehowa Ðasefowo dome la dzi ahaya Metro West Kamedefefewɔƒea na wo woawɔ mawusubɔsubɔ ƒe takpekpe eve le teƒea. Subɔsubɔha bubuwo ƒoe ɖe nutoa me dziɖulawo nu wote fli ɖe Ðasefoawo ƒe teƒea hayahaya me esi wòsusɔ ŋkeke ɖeka kple afã pɛ ko ne woadze takpekpea gɔme.

Yehowa Ðasefowo wɔ ɖoɖo kple Ra’anana-dua be woahaya teƒe na yewo yewoawɔ takpekpe le April (Afɔfiɛ) 18 kple May (Damɛ) 2, 2015 dzi. Ðasefoawo kpɔe do ŋgɔ be nutoa me dziɖulawo ate ŋu ate fli ɖe ɖoɖoa me elabena le April (Afɔfiɛ) 15 dzi la, nutodziɖulagã gblɔ be yetsi dzi ɖe wɔna si ayi edzi le April (Afɔfiɛ) 18 la valawo ƒe dedienɔnɔ ta. Togbɔ be nutoa me kpovitɔwo ƒe amegã ka ɖe edzi nɛ be kpovitɔwo akpɔ egbɔ be dua le dedie hã la, Ra’anana dumegãwo te fli ɖe teƒea hayahaya ƒe ɖoɖoa me le ŋkeke si kplɔe ɖo dzi. Nyadzɔdzɔgblɔlawo ka nya ta be esi subɔsubɔhawo ƒe adaŋudeha me tɔwo ƒoe ɖe dumegãwo nu be ne woɖe mɔ na Ðasefoawo wowɔ takpekpea la, ke yewomagana kpekpeɖeŋu wo azɔ o ta la, wote fli ɖe ɖoɖoa me.

Togbɔ be Ðasefoawo tsɔ nyaa yi Lod Nutomeʋɔnudrɔ̃ƒea enumake be woana dumegãwo naɖe mɔ na yewo yewoawɔ takpekpea hã la, ɣeyiɣi meli be woakpɔ nyaa gbɔ ale be teƒea hayalawo naɖe mɔ woazã teƒea le April (Afɔfiɛ) 18 dzi o. Ðasefoawo va haya teƒe bubu hena takpekpea wɔwɔ, gake ehiã be woaxe ga si woxe ɖe teƒe gbãtɔa ta la ƒe teƒe ade sɔŋ na teƒe yeyea zazã.

Le April (Afɔfiɛ) 29 dzi la, Lod Nutomeʋɔnudrɔ̃ƒea ɖe gbe na dumegãwo be woawɔ ɖe ɖoɖo si le wo kple Ðasefoawo dome dzi esi wògblɔ be “[Ra’anana] dumegãwo tu afɔkpo [Yehowa Ðasefowo] ƒe mawusubɔsubɔ, subɔsubɔnuwɔnawo, ƒuƒoƒo ɖekae ƒe ablɔɖe, bubudedeameŋu ƒe gomenɔamesi kple sɔsɔminasɔe ƒe ablɔɖe kpakple gomenɔamesi.” Kasia la, dumegãwo bia be woaɖe mɔ na yewo yewoaɖo asi ɖoɖoa dzi wɔwɔ dzi gbɔ, gake Ʋɔnudrɔ̃ƒe Kɔkɔtɔ gbe woƒe biabia sia le May (Damɛ) 1 dzi. Eye dumegãwo gabia ake be woagbugbɔ nyaa adrɔ̃, gake Ʋɔnudrɔ̃ƒe Kɔkɔtɔ te fli ɖe eya hã me, eye nutomeʋɔnudrɔ̃ƒea ƒe nyametsotsoa ɖu dzi.

Ale si Ʋɔnudrɔ̃ƒe Kɔkɔtɔ ƒe nyametsotsoa va ɖe game dzi la ɖe mɔ na Yehowa Ðasefowo be woawɔ woƒe takpekpea le May 2 dzi. Nutoa me subɔsubɔhakplɔlawo, siwo dome dua ƒe rabiwo ƒe tatɔ kpakple ortodɔks-ha ƒe zazɛ̃nyahelawo siwo wɔa nu adãtɔe le la hã ƒo amehawo nu ƒu be “yewoado gbe ɖa ɖekae” atsɔ aɖee afia be yewomeda asi ɖe nyametsotso ma dzi o eye ame 1,500 ye lɔ hoo dze wo yome. Wova ƒo ƒu ɖe kamedefefewɔƒea ƒe mɔnu xoxo hafi Ðasefo 600 va ɖo hena takpekpea wɔwɔ. ‘Gbedodoɖa ɖekae’ sia va trɔ zu gbɔlɔlɔ blibo. Tsitretsiɖeŋula siawo dometɔ aɖewo dze Ðasefoawo, siwo dome nyɔnuwo kple ɖeviwo le la dzi. Wodzu wo, ɖe ta ɖe wo ŋu, do ɣli ɖe wo ta, wɔ gbɔɖiamenuwo ɖe wo ŋu, eye wogblẽ woƒe ʋuwo hã dome. Enumake kpovitɔwo tso kpla de nu nyaa me be yewoatsi gbɔlɔlawo ƒe nuwɔnawo nu. Ale si kpovitɔawo de nu nyaa me wɔe be Ðasefoawo te ŋu wɔ takpekpea eye wotrɔ yi aƒe dedie le kpakpã megbe.

Yehowa Ðasefo siwo le Israel kpɔ ŋudzedze ɖe ale si Israel dziɖuɖumegãwo tso ɖe nu madzɔmadzɔ wɔwɔ ɖe amewo ŋu le woƒe mawusubɔsubɔ ta alo fulelé wo le subɔsubɔha si me wole la ta la ŋu eye woʋli gome si le wo si be woakpe ahade ta agu le ŋutifafa me la ta.