Le May 19, 2019 dzi la, Yehowa Ðasefowo ɖe Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia ɖe go le Marshall-gbe me le takpekpe tɔxɛ aɖe si wowɔ le South Pacific Yunivɛsiti le Majuro, si le Marshall Ƒukpowo dzi la me. Fiaɖuƒe Akpata aɖe si le Ebeye ƒukpo dzi, si didi tso Majuro gbɔ kilometa 440 kple edzivɔ hã tsiã ka kple takpekpea hekpɔ wɔna tɔxɛa.

Ame siwo katã va wɔna tɔxɛa la ƒe xexlẽme le 339, gbeƒãɖela 151 siwo le hame ene siwo le Marshall Ƒukpowo dzi la hã le xexlẽme sia me. Gbeƒãɖela siawo kple gbeƒãɖela 325 siwo le Marshall-gbedolawo ƒe hame siwo le United States me la ate ŋu azã gɔmeɖeɖe sia azɔ le woƒe kpekpewo, ɖokuisinusɔsrɔ̃ kple gbeadzisubɔsubɔdɔa me. Wobu akɔnta be Marshall-gbedola 61,000 ye le xexea me godoo.

Nɔviŋutsu aɖe si kpe asi ɖe Biblia sia gɔmeɖeɖe ŋu la gblɔ be: “Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia si le Marshall-gbe me lae nye egbegbe Biblia gɔmeɖeɖe si me wogbugbɔ Mawu ƒe ŋkɔ Yehowa ɖo teƒe siwo katã wòle be wòanɔ. Enye Biblia gɔmeɖeɖe aɖe si dzi nɔviwo ate ŋu aka ɖo, eye akpe ɖe wo ŋu be lɔlɔ̃ si le wo si na Yehowa la nayi edzi anɔ tsitsim ɖe edzi.”

Dzi dzɔ mí ɖe Biblia sia si woɖe ɖe go nyitsɔ laa la ŋu ŋutɔ. Ena míekpɔe be Yehowa le yayram ɖe gbegɔmeɖeɖedɔ siwo wɔm wole le gbegbɔgblɔ geɖewo, suewo kple gãwo siaa, me la dzi.—Psalmo 49:1, 2.