MANILA, Philippines—Esi Haiyan Ahom la tu gblẽ nu ŋɔdzitɔe megbe la, Yehowa Ðasefowo tso kpla hede dukɔwo dome kpekpeɖeŋunana ƒe ɖoɖo aɖe to me hena kpekpe ɖe ame siwo ŋu ahom la gblẽ nu le le Philippines la ŋu.

Yehowa Ðasefowo ƒe alɔdzedɔwɔƒe si le Manila ɖo kpekpeɖeŋunakɔmiti atɔ̃ be woana kpekpeɖeŋu ame siwo ŋu ahom la gblẽ nu le. Woɖo kpekpeɖeŋunanu tɔn 190 ɖe ame siwo le Philippines ƒe titinanutowo me. Ne mede ɖeke o la, Ðasefo siwo tso dukɔ ewo me ya teti lɔ̃ faa be yewoava na kpekpeɖeŋu. Lɔlɔ̃nu faa dɔwɔla siawo le kpekpeɖeŋu nam be woatso aƒe 2,000 kple edzivɔwo eye wole kpekpeɖeŋu hã nam le atikewɔnyawo gome.

Ame siwo ade 225 sɔŋ gakpɔtɔ le avɔgbadɔ siwo Ðasefoawo tu ɖe teƒe si te ɖe Calbayog City ŋu le Samar me. Wobu akɔnta be ame siwo ʋu va le avɔgbadɔ siawo me la dometɔ 15 va se ɖe 20 le alafa me menye Ðasefowo o.

Esi ahom sia si wobu be enye ahom sesẽtɔ siwo tu kpɔ dometɔ ɖeka tu megbe la, ame siwo ku ƒe agbɔsɔsɔme va ɖo 6,201 eye womeke ɖe ame 1,785 ŋu o. Ame 28,000 xɔ abi vevie eye aƒe miliɔn ɖeka kple edzivɔ dome gblẽ. Yehowa Ðasefowo ƒe alɔdzedɔwɔƒe si le Philippines ka nya ta be Ðasefo 33 ku, wodi wo dometɔ 10 hã do kpoe, eye wobui be ɖe woku.

Tso December 7, 2013 dzi la, Yehowa Ðasefowo ƒe Dɔdzikpɔhaa me tɔ Mark Sanderson yi ɖakpɔ ame siwo le nuto atɔ̃ siwo me ahom la gblẽ nu me la ɖa ŋkeke adre me sɔŋ. Egblɔ be: “Nu si ahom sia gblẽ la gakpɔtɔ le ŋusẽ gã aɖe kpɔm ɖe Philippinetɔ geɖewo dzi kokoko; ke hã míesɔ gbe be míayi edzi anɔ kpekpeɖeŋunanu siwo hiã ɖom ɖa, azã míaƒe ŋusẽ kple akɔfanyawo atsɔ akpe ɖe ame siwo ŋu ahom la gblẽ nu le la ŋu.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090