Le November 5, 2019 dzi la, Oktyabrsky Nutome Ʋɔnudrɔ̃ƒe si le Tomsk la ka ƒe ade na Nɔviŋutsu Sergey Klimov be wòatsɔ anɔ gaxɔ me. Dennis Christensen koe ganye nɔviŋutsu si woka ƒe mawo gbegbe na be wòatsɔ anɔ gaxɔ me le Russia. Gake le Nɔviŋutsu Klimov ya gome la, ʋɔnudrɔ̃ƒea gada mɔxenu bubu geɖewo ɖe edzi, si wɔe be etɔ va nye fɔbuame sesẽtɔ kekeake si yi na mía nɔviwo dometɔ ɖeka tso esime Ʋɔnudrɔ̃ƒe Kɔkɔtɔ ɖo asi Ðasefowo dzi le ƒe 2017 me.

Wolé Nɔviŋutsu Klimov le June 3, 2018 dzi esi poliswo kple gbadagbawo va dze Yehowa Ðasefowo ƒe aƒe eve dzi. Wolé nɔviŋutsu kple nɔvinyɔnu 30 aɖewo be woabia gbe wo—nɔvinyɔnu aɖe si xɔ ƒe 83 hã nɔ ame siwo wolé la dome. Woɖe asi le nɔviawo katã ŋu, negbe Nɔviŋutsu Klimov ko. Wotso enu be ewɔ nu vlowo, eye ʋɔnudrɔ̃ƒe aɖe na wolée tu ɣleti eve hafi woava drɔ̃ ʋɔnui. Hafi woava drɔ̃ ʋɔnui la, wodidi ɣeyiɣi si wolée tu la ɖe edzi zi gbɔ zi adre, si fia be hafi eƒe gaxɔmenɔnɔ ŋutɔŋutɔ si axɔ ƒe ade nadze egɔme la, wokplɔe dzoe le srɔ̃a kple eƒe ƒomeawo gbɔ ƒe ɖeka kple ɣleti atɔ̃.

Senyala siwo le Nɔviŋutsu Klimov ta ʋlim la abia be woagbugbɔ nyaa adrɔ̃. Tsɔ kpe ɖe eŋu la, le August 20, 2018 dzi la, wotsɔ Klimov v. Russia ƒe nyaa yi na Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒea ɖe ale si wolée tu la ta.

Le ƒe 2019 bliboa me la, Ðasefowo dzi dzedze kple wo léle tu dzi ɖe edzi ŋutɔ le Russia. Ke hã, mía nɔviawo lé dzi ɖe ƒo heyi edzi le nuteƒe wɔm. Nu siwo ɖo kpe edzi be Yehowa le mía nɔviwo yram ɖe ale si woɖoa dzi ɖe eŋu bliboe ta la dea dzi ƒo na mí ŋutɔ.—Psalmo 56:1-5, 9.