ST. PETERSBURG, Russia​—Le August 7, 2013 dzi la, Tsentralniy Nutomeʋɔnudrɔ̃ƒe si le Tver-dua me tso nya me be woaɖo asi jw.org nyatakakadzraɖoƒe si dzi Biblia me nufiamewo nɔna la dzi le Russia-dukɔa me godoo. Tver-du sia le Moscow ƒe dziehe eye wòdidi tso egbɔ abe kilometa 160 ene.

Togbɔ be ame akpe alafa geɖewo zãa jw.org le xexea me godoo, eye numekula geɖewo kpɔa ŋudzedze ɖe nyatakakadzraɖoƒe sia ŋu hã la, ʋɔnudrɔ̃ƒea de dziɖuɖua dzi eye wòbia be woaɖo asi nyatakakadzraɖoƒea dzi. Ʋɔnudrɔ̃ƒea mena nyanya Gbetakpɔxɔ Biblia Kple Trakt Habɔbɔ si le New York si tɔe nyatakakadzraɖoƒe sia nye loo alo se woƒe numenya aɖeke hafi tso nya me o. Yehowa Ðasefowo bia tso Tver Ʋɔnudrɔ̃ƒegã si be woagbugbɔ nya la adrɔ̃ na yewo. Woda nyadɔdrɔ̃ sia ɖe January 22, 2014 dzi.

Ne wogbe be yewomagbugbɔ nya la adrɔ̃ na wo o la, ke efia be woaxe mɔ ɖe nyatakakadzraɖoƒea nu le Russia-dukɔa me godoo. Esia awɔe be nyatakakadzraɖoƒea zazã nabɔ Yehowa Ðasefo 160,000 kple edzivɔ siwo le dukɔa me siwo zãnɛ edziedzi tsɔ srɔ̃a Biblia le woƒe mawusubɔsubɔwɔnawo me, le woƒe ƒomewo me kple wo ɖokuiwo si la siaa. Eye esia ana be woabu ame sia ame si ado boblo nyatakakadzraɖoƒe sia le Russia la hã be enye nu vlo wɔla. Gakpe ɖe eŋu la, esia awɔe be ame miliɔn 142 siwo le Russia-dukɔa me la hã magate ŋu azã jw.org nyatakakadzraɖoƒea, afi si woakpɔ Biblia me nufiamewo le femaxee la o. Xexemenunyalagã Yekaterina Elbakyan si nye mawusubɔsubɔnyawo ŋuti nunyala eye wòganye nufialagã le Dɔwɔwɔ Kple Hadomekadodowo Ƒe Suku le Moscow gblɔ tso jw.org nyatakakadzraɖoƒea ŋu be “nunana nyui aɖee wònye na ame sia ame si kua nu me tso mawusubɔsubɔnyawo ŋu. Nyatakaka gbogbo siwo gɔme sese le bɔbɔe la le edzi. Woɖe mawusubɔsubɔ kple agbe nyui nɔnɔ ƒe nya veviwo me le mɔ bɔbɔe nu. Ne èzã nyatakakadzraɖoƒe sia, ɖeko nàse le ɖokuiwò me abe Yehowa Ðasefo aɖee kpe wò va eƒe me ene.”

Aƒetɔ Grigory Martynov, si nye Yehowa Ðasefowo ƒe nyanuɖela le Russia, gblɔ le St. Petersburg be: “Dɔwɔnu nyui aɖee jw.org nyatakakadzraɖoƒea nye na míaƒe dukɔa me tɔ siwo di be yewoanya nu tso Biblia ŋu, eye nyatakakadzraɖoƒe sia medoa dunyahenyawo alo asitsanyawo ɖe ŋgɔ o. Míele mɔ kpɔm be Tver Ʋɔnudrɔ̃ƒegã akpɔ egbɔ be womaxe mɔ ɖe nyatakakadzraɖoƒe nyui sia nu le Russia o.”

Aƒetɔ J. R. Brown, si nye Yehowa Ðasefowo ƒe nyanuɖela le woƒe dɔwɔƒegã le New York, gblɔ be: “Amewo zãa jw.org nyatakakadzraɖoƒea tsɔ kua nu me eye ƒomewo le xexea me hã kpɔa nyatakaka ɖɔʋuwo le afi ma. Eɖea vi na amewo ale gbegbe be gbe sia gbe kloe la, ame 900,000 ʋunɛ dia nyatakaka ɖɔʋu siwo le gbegbɔgblɔ siwo wu 600 me. Asiɖoɖo nyatakakadzraɖoƒe sia dzi mele se nu o.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691