Le August (Dasiamime) 5, 2015 dzi la, Russia-dukɔa Ƒe Ʋɔnudrɔ̃ƒe Kɔkɔtɔ agbugbɔ adrɔ̃ nya si fɔ ɖe te ku ɖe asiɖoɖo Yehowa Ðasefowo ƒe dɔwɔha si le Abinsk la dzi. Dziɖuɖumegãwo zã mɔnu si wozã tsɔ ɖo asi Yehowa Ðasefowo ƒe dɔwo dzi le Taganrog kple Samara le ƒe sia ƒe gɔmedzedze me va yi la ke tsɔ ɖo asi Ðasefowo ƒe dɔwɔha si le Abinsk hã dzi.

Ame siwo ade 100 kloe ye le Yehowa Ðasefowo ƒe hame si le Abinsk la me. Wo dometɔ aɖewo nye amegãɖeɖiwo kple nyagãɖeɖiwo. Wode Abinsk dɔwɔha agbalẽ me le se nu le November (Adeɛmekpɔxe) 1999 me, eye dɔwɔha sia tɔe Fiaɖuƒe Akpata si me Ðasefoawo subɔna le la nye.

Wotsɔ nya ɖe Yehowa Ðasefo eve ŋu le Abinsk le December (Dzome) 2012 me be woda le se dzi esi wole agbalẽ siwo wogblɔ be wodea aglãdzedze ƒe dzi ƒo la mam, eye wogatsɔ nya ɖe wo ŋu ake le October (Kele) 2013 me. Ŋutsu eveawo katã nye Ðasefowo, gake womele Yehowa Ðasefowo ƒe dɔwɔha si le se nu le Abinsk la te o. Togbɔ be ʋɔnudrɔ̃la amesamala la nya esia nyuie hã la, enɔ te ɖe alakpanya siwo wotsɔ ɖe ŋutsu siawo ŋu la dzi bia be woabu mo na dɔwɔha sia.

Krasnodar Nutomeʋɔnudrɔ̃ƒe nɔ te ɖe alakpanya sia dzi tso nya me le March (Tedoxe) 4, 2015 dzi be “Yehowa Ðasefowo ƒe dɔwɔha si le Abinsk la . . . nye aglãdzeha, eya ta ele be woabu mo nɛ, eye womagabui de Dukɔa Ƒe Dɔwɔha Nɔsenuwo dome o.” Ʋɔnudrɔ̃ƒea tso nya me be woƒe Fiaɖuƒe Akpata si le Abinsk la nazu Dukɔa tɔ. Ne Ʋɔnudrɔ̃ƒe Kɔkɔtɔ da asi ɖe nya sia dzi la, Fiaɖuƒe Akpata la maganye Ðasefo siwo le Abinsk la tɔ o.

Dziɖuɖumegãwo zã Dukɔa Ƒe Se Hena Aglãdzenuwɔnawo Nu Tsitsi tsɔ ɖo asi Ðasefowo ƒe dɔwɔha si le Abinsk ƒe dɔwo dzi madzemadzee abe ale si tututu dziɖuɖumegã siwo le Taganrog kple Samara zãe do ŋgɔ ene. Kpeɖodzi aɖeke mele nya siwo wotsɔ ɖe Ðasefoawo ŋu le Abinsk la ŋu o. Yehowa Ðasefo siwo le Taganrog kple Samara le wo ɖokuiwo ta ʋlim vevie le ʋɔnu le esi wotso wo nu madzemadzee ta. Wotsɔ nyaa yi Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒe ale be woaʋli woƒe mawusubɔsubɔ ƒe ablɔɖe ta.

Yehowa Ðasefowo ƒe ƒuƒoƒo sue si le Abinsk ayi woƒe mawusubɔsubɔdɔwo dzi, eye woayi edzi asubɔ abe ale si wo hatitadeagula siwo le xexea me godoo le ewɔm ene. Gake Yehowa Ðasefowo le mɔ kpɔm be Russia ƒe Ʋɔnudrɔ̃ƒe Kɔkɔtɔ akpɔ ʋɔnu madzɔmadzɔ si nutomeʋɔnudrɔ̃ƒea drɔ̃ yewo la ƒe nyaa gbɔ eye wòaɖe mɔ na Ðasefo siwo le Abinsk woawɔ woƒe kpekpewo le ŋutifafa me le woawo ŋutɔ ƒe tadeaguƒe.