ST. PETERSBURG, Russia​—Le July (Siamlɔm) 21, 2015 dzi la, Russia Dziɖuɖua ɖo asi Yehowa Ðasefowo ƒe nyatakakadzraɖoƒe si nye jw.org dzi, eye esia wɔe be woabu ame sia ame si ade dzi ƒo na amewo be woazã nyatakakadzraɖoƒe sia le Russia-dukɔa me nu vlo wɔlae. Le xexea me godoo la, Russia ɖeka koe xe mɔ ɖe jw.org nu.

Aƒetɔ Yekaterina Elbakyan, si nye subɔsubɔhawo ŋuti nunyala kple nufialagã le Dɔwɔnyawo Kple Hadomegbenɔnɔ Suku si le Moscow gblɔ tso jw.org ŋu be: “Mekpɔe be nyatakakadzraɖoƒe sia le vevie, elabe afi siae nàkpɔ nya siwo Yehowa Ðasefowo ŋutɔ gblɔ tẽe tso woƒe habɔbɔa ŋu le, ke menye tso segblɔtɔwo gbɔ o. . . . Woƒe hameviwo kpɔa dzidzɔ ɖe nyatakakadzraɖoƒe sia ŋu, eye ame siwo tsɔa ɖe le subɔsubɔha vovovowo me hã kpɔa dzidzɔ ɖe eŋu. Menye subɔsubɔhawo ŋuti nunyalawo abe nye ene koe mewɔnɛ o, ke boŋ nyakakadɔwɔlawo kple agbalẽŋlɔla siwo ŋlɔa nu tso subɔsubɔhawo ŋu hã tsɔ ɖe le eme vevie.”

Aƒetɔ Lev Levinson si nye senyawo ŋuti nunyala bibi aɖe le Amegbetɔ Ƒe Gomenɔamesinyawo Ƒe Dɔwɔƒe le Moscow gblɔ ale si dziɖuɖua ƒe nuwɔna sia ɖi nane si dzɔ kpɔ va yi la ale: “Egbegbe ƒe alafa 21 lia me Russia ƒe dukplɔse na mawusubɔsubɔ ƒe ablɔɖe kple habɔbɔ hena mawusubɔsubɔ ƒe sɔsɔminasɔe ƒe gome amewo. Gake abe ale si Russia wɔe le ƒe alafa 19 lia me ene la, egale mawunyagbɔgblɔ ƒe ablɔɖe xɔm le dukɔmeviwo si to woƒe agbalẽwo xɔxɔ kple mɔxexe ɖe woƒe nyatakakadzraɖoƒea nu me. Eye ʋɔnudrɔ̃lawo kple nunyalagãwoe trɔ gbo sea tsɔ le nu siawo wɔm tso vɔ nɔ gbɔgblɔm be ɖe wole avu wɔm kple ame siwo dea aglãdzedze ƒe dzi ƒo.”

Mɔxexe ɖe nyatakakadzraɖoƒea nu ƒe nya sia nye senya si gɔme wodze tso ƒe 2013 me la dzi yiyi. Le August (Dasiamime) 7 dzi le ƒe ma me la, Russia ʋɔnudrɔ̃ƒe sue aɖe drɔ̃ nya la le adzame hetso nya me be nyatakakadzraɖoƒea “dea aglãdzedze ƒe dzi ƒo.” Gake nutomeʋɔnudrɔ̃ƒea te fli ɖe nyametsotso ma me le January (Dzove) 22, 2014 dzi. Ke hã Russia Nyagbugbɔdrɔ̃ƒea ƒe Amesamala ƒe Kpeɖeŋutɔ bia tso Russia-dukɔa ƒe Ʋɔnudrɔ̃ƒe Kɔkɔtɔ si be wòagbugbɔ ʋɔnudrɔ̃ƒe suea ƒe nyametsotsoa aɖo te. Le December (Dzome) 2, 2014 dzi la, Ʋɔnudrɔ̃ƒe Kɔkɔtɔ gbugbɔ drɔ̃ nya la evɔ Yehowa Ðasefowo menɔ kodzoa me aʋli wo ɖokuiwo ta o, elabena womena nyanya wo ale si dze o. Ʋɔnudrɔ̃ƒe Kɔkɔtɔ de ʋɔnudrɔ̃ƒe suetɔ ƒe nyametsotsoa dzi eye wògblɔ be nu siwo katã le nyatakakadzraɖoƒea “dea aglãdzedze ƒe dzi ƒo” togbɔ be ʋɔnudrɔ̃ƒea ŋutɔ lɔ̃ ɖe edzi be mawusubɔsubɔgbalẽ siwo nu dziɖuɖua de se ɖo la mele nyatakakadzraɖoƒea o hã. Ðasefoawo meda asi ɖe nyametsotso sia dzi o eye wobia tso Ʋɔnudrɔ̃ƒe Kɔkɔtɔa ƒe zimenɔla si be wòagbugbɔ ŋku alé ɖe nya sia ŋu na yewo, gake ɖeko wògbe. Le nyametsotso sia ta la, Russia Dukɔa Ƒe Dudɔwɔƒe Si Kpɔa Ʋɔnudrɔ̃nyawo Gbɔ bu nyatakakadzraɖoƒe sia de Agbalẽ Siwo Dziɖuɖua Buna Be Wodea Aglãdzedze Ƒe Dzi Ƒo me le July (Siamlɔm) 21, 2015 dzi eye wòde se ɖe nyatakakadzraɖoƒe sia nu le Russia dukɔ bliboa me.

Aƒetɔ Yaroslav Sivulskiy, si nye Yehowa Ðasefowo ƒe nyanuɖela le Russia gblɔ nu si gbegbe nyametsotso sia gblẽ la ale: “Ete ɖe mía dzi ŋutɔ be Russia dziɖuɖumegãwo ɖe afɔ sia si mehiã hafi o la. Mɔxeɖenu sia do kplamatsɛ Yehowa Ðasefo 170,000 kple edzivɔ siwo le dukɔa me godoo la ƒe mawusubɔsubɔ. Gake ne èbu ame 285,000 siwo ʋua nyatakakadzraɖoƒe sia gbe sia gbe le Russia ŋu la, àkpɔe kɔtɛe be wona Biblia-sɔsrɔ̃ ƒe mɔnu nyui sia le ame siwo menye míaƒe haxɔsetɔwo o gɔ̃ hã la ŋu tom.”

Aƒetɔ J. R. Brown, si nye Yehowa Ðasefowo ƒe nyanuɖela le xexea me godoo gblɔ le woƒe dɔwɔƒegã le Brooklyn le New York be: “Nu siwo le míaƒe nyatakakadzraɖoƒe si nye jw.org la dometɔ aɖewoe nye video siwo ta woxɔ nunana ɖo, Biblia-srɔ̃gbalẽ siwo le gbe alafa geɖewo me, kple Gbetakpɔxɔ kpakple Nyɔ! siwo nye magazine eve siwo womana wu le xexea me godoo. Woɖenɛ fiana le dukɔwo dome agbalẽɖeɖefia ƒe wɔna gãwo me eye wozãnɛ geɖe le sukuwo hã me. Eɖe vi na ame geɖewo le xexea me eye ame geɖewo hã zãnɛ le Russia-dukɔa me. Le nyateƒe me la, ɖe wòle be woado alɔ nyatakakadzraɖoƒe sia hafi.”