NOUMEA, New Caledonia (Nouvelle-Calédonie)—Tso March 13, 2015 ƒe zã me la, Ahom si woyɔna be Pam tu le Vanuatu-dua ƒe Pasifik-ƒukpowo dzi, eye ahomya ƒe sesẽme nye dzidze 5. Nyatakaka gbãtɔ siwo míexɔ tso Yehowa Ðasefowo ƒe alɔdzedɔwɔƒe si le New Caledonia gbɔ la ɖee fia be nu vevi mewɔ Ðasefo siwo le Vanuatu la dometɔ aɖeke o eye wo dometɔ aɖeke hã meku le ahomya sia me o. Wogakpɔtɔ le nu me kum tso nu siwo gbegbe dome gblẽ la ŋu. Gake woɖo kpe edzi be le Efate-ƒukpo dzi la, Ðasefowo ƒe aƒe 31 gbã keŋkeŋ eye nu gblẽ le aƒe 58 hã ŋu. Le Tanna-ƒukpo dzi la, Ðasefowo katã kloe ƒe aƒewo gbã keŋkeŋ loo alo nu gblẽ le wo ŋu. Ahomya la gbã Fiaɖuƒe Akpata etɔ̃ hã, eye ati mu gblẽ nu le ɖeka hã ŋu.

Kpekpeɖeŋunakɔmiti si woɖo le Vanuatu ƒe fiadu Port Vila me la na nuɖuɖu, tsi kple mlɔƒewo Ðasefowo ƒe ƒome 100 aɖewo. Tsɔ kpe ɖe eŋu la, woɖo kpekpeɖeŋunanu tɔn ɖeka ɖe Ðasefo siwo le Tanna be woatsɔ akpɔ woƒe hiahiã kpatawo gbɔ. Alɔdzedɔwɔƒe si le Australia le asi kpem ɖe alɔdzedɔwɔƒe si le New Caledonia ŋu le kpekpeɖeŋunadɔawo wɔwɔ me. Dɔ sia bia be woatu mlɔƒewo, woadzra aƒewo ɖo, eye woana abawo, nudodowo kple nu bubuwo ame siwo ŋu ahom la gblẽ nu le.

Jean-Pierre Francine si nye Yehowa Ðasefowo ƒe nyanuɖela le New Caledonia gblɔ be: “Míekpɔ ŋudzedze ɖe kpekpeɖeŋunu siwo tso duta kple esiwo dziɖuɖudɔwɔƒewo na mí be míatsɔ ana kpekpeɖeŋu míaƒe haxɔsetɔwo la ŋu ŋutɔ. Esi yameʋuwo gate Vanuatu yiyi azɔ ta la, alɔdzedɔwɔƒea teƒenɔla aɖe kple Yehowa Ðasefowo ƒe dzikpɔla siwo srãa hamewo kpɔ la le nɔvi siwo le ƒukpoa dzi la gbɔ yim le kpekpeɖeŋu nam wo, eye wole akɔ fam na wo hetsɔ Biblia le dzi dem ƒo na wo.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

New Caledonia: Jean-Pierre Francine, tel. +687 43 75 00