Coronavirus dɔvɔ̃ si wogayɔna be (COVID-19) la na nu geɖe trɔ le Yehowa Ðasefo miliɔn geɖewo ƒe agbe me, eye dziɖuɖuwo na mɔfiamewo siwo awɔe be dɔvɔ̃a nagakaka o. Eya ta Ðasefowo dzea agbagba be yewoawɔ ɖe dziɖuɖuwo ƒe mɔfiamewo dzi evɔ le ɣeyiɣi ma ke me la, yewoayi edzi awɔ yewoƒe subɔsubɔdɔa. Le dukɔ siwo me dɔvɔ̃ sia kaka le wu me la, mía nɔviŋutsu kple nɔvinyɔnuwo dze agbagba to mɔ vovovowo dzi yi edzi le gbeƒãɖeɖedɔa wɔm.

Nɔviŋutsu aɖe si le Pisa le Italy, gblɔ be: “Gbeƒãɖeɖedɔa le edzi yim nyuie ale gbegbe! Esi ame geɖewo va le aƒe me fifia ta la, nye kple srɔ̃nye míedi amewo ƒe kaƒodzesiwo le míaƒe fon dzi eye míewɔa ɖoɖo yɔa wo to videokadodowo dzi. Míele Biblia nusɔsrɔ̃ kple tɔtrɔyi geɖewo wɔm, eye wo dometɔ aɖewo nye ame yeyewo alo ame siwo míeƒo nu kplii kpɔ. Míezã gaƒoƒo geɖewo tsɔ dzro Biblia me kpli wo, eye nu nyuiwo le dodom tso eme.”

Le South Korea la, dɔvɔ̃a wɔe be gbeƒãɖela geɖewo va le jw.org nyatakakadzraɖoƒea kple JW Library dɔwɔnua zãm geɖe wu. Le kpɔɖeŋu me, gbe ɖeka esi nɔviŋutsu aɖe li ko la, eƒe Biblia nusrɔ̃vi si dzudzɔ nusɔsrɔ̃ ƒe etɔ̃ sɔŋ ye nye ema la ɖo text message ɖee. Biblia nusrɔ̃via gblɔ be ale si dɔvɔ̃ sia le nu gblẽm la wɔe be yeva nɔ ŋugble dem le ŋkeke mamlɛawo ƒe dzesia ŋu. Nɔviŋutsua ɖo nyati siwo ku ɖe ŋkeke mamlɛawo ŋu siwo le JW Library dɔwɔnua dzi ƒe link ɖe Biblia nusrɔ̃via to text message dzi. Nɔviŋutsua gblɔ be “dɔvɔ̃ sia si nye kpeɖodzi be míele ŋkeke mamlɛawo me la wɔe be ame geɖe va di be yewoanya Mawu eye wodi be yewoasrɔ̃ Biblia. Esia wɔ dɔ ɖe ame dzi ŋutɔ.”

Nyatakaka geɖe siwo míexɔ tso alɔdzedɔwɔƒe siwo le xexea me godoo la ɖee fia be mía nɔviwo dea asixɔxɔ woƒe subɔsubɔdɔa ŋu ŋutɔ. Edzɔ dzi na mí ŋutɔ be míakpɔ ale si wole “nunya vavãtɔ” ŋu dɔ wɔm be yewoayi edzi agblɔ nya nyuia na amewo.—Mika 6:9.