Tso August 31 va se ɖe October 26, 2019 dzi la, nɔviwo tso dukɔ 19 me va kpɔ gome le Biblia-fiafiadɔ tɔxɛ aɖe si wowɔ be woaɖo Arab-gbedolawo gbɔ le Austria kple Germany la me. Le gbeƒãɖeɖedɔ tɔxɛ sia me la, nɔvi 1,782 zã gaƒoƒo 40,724 tsɔ fia nu amewo, woɖe míaƒe videowo zi 4,483 sɔŋ, eye woma míaƒe Biblia-srɔ̃gbalẽ 24,769.

Ƒe ʋɛ aɖewoe nye esiawo la, sitsoƒedila siwo wu miliɔn ɖeka ʋu va tsi Austria kple Germany, eye wo dometɔ akpa gãtɔ tso dukɔ siwo me wodoa Arabgbe le la me. Sitsoƒedila siawo dometɔ geɖe mese Biblia me gbedeasi si faa akɔ na ame la kpɔ o. Nɔvi siwo tso Canada, United States kple Europa dukɔ vovovowo me la va kpe asi ɖe gbeƒãɖela 1,108 siwo le Austria kple Germany eye woɖea gbeƒã na Arab-gbedolawo la ŋu. Wowɔ dɔ le nuto 24 me, eye dugãwo abe Berlin, Cologne, Dresden, Frankfurt, Graz, Hamburg kple Vienna ene hã le me.

Nɔviŋutsu aɖe si le dukɔ siwo me wowɔ gbeƒãɖeɖedɔ tɔxɛa le dometɔ ɖeka me gblɔ be: “Meva susu me na mí kpɔ be gbeƒãɖeɖedɔ sia ade dzi ƒo na mí nenema gbegbe o. Nɔvi siwo tso duta va la do ŋusẽ mí ŋutɔ, eye míekpɔ ŋudzedze ɖe kpekpeɖeŋu si wova na mí la ŋu ale gbegbe. Edzɔ dzi na mí ŋutɔ be mɔnukpɔkpɔ sia su mía si míekpɔ gome le gbeƒãɖeɖedɔ tɔxɛ sia me.”

Esi ɖekakpui aɖe si tso dukɔ aɖe si me wodoa Arabgbe le la de Yehowa Ðasefowo ƒe kpekpe aɖe vɔ megbe la, ete ɖe nɔviŋutsu aɖe ŋu hebia dzidzɔtɔe be: “Ènya nu si mahabba fia le Germanygbe mea?”

Nɔviŋutsua ɖo eŋu be, “Liebe (si gɔmee nye ‘lɔlɔ̃’)!”

Ðekakpuia gblɔ be, “Tututu, esia teƒee mekpɔ le afi sia egbea! Miewɔ nu ɖe ŋunye nyuie ŋutɔ. Ame sia ame do gbe nam hena asim. Mekpɔ amewo tso dukɔ vovovowo me siwo wɔ nu ɖe wɔ nɔewo ŋu bubutɔe. Ne ame sia ame awɔ nu alea la, meka ɖe edzi be nuwo anyo le xexea me kura wu ale si wole fifia!”

Ŋutsu bubu aɖe gblɔ tso Yehowa Ðasefowo ŋu be: “Mienya ale si miawɔ nu ɖe amewo ŋu nyuie eye mienye amewo ƒe ƒuƒoƒo nyuitɔ kekeake siwo le anyigba dzi la dometɔ ɖeka.”

Atsu kple asi Arab-gbedola siwo le Germany abe ƒe ɖekae nye esia ene la kpe nɔvi aɖewo va woƒe aƒe me be woano tii. Esi nɔviawo gblɔ nu si tae wova dukɔa me na atsu kple asia la, nyɔnua bia wo be, “Yehowa Ðasefowoe mienyea?” Esi nɔviawo ɖo eŋu be “ɛ̃” la, nyɔnua gblɔ be: “Ewɔ nuku lo! Mele Ðasefowo dim ɣleti geɖewoe nye esia. Medi mi le ketekedzeƒea gɔ̃ hã. Eye miawoe nye esia va gbɔnye! Mawue dɔ mi.”

Yehowa yra ɖe dzonɔameme si mía nɔviwo ɖe fia esi wokpɔ gome le gbeƒãɖeɖedɔ tɔxɛa me be “dukɔwo katã me tɔwo” nase Biblia me gbedeasi si naa mɔkpɔkpɔ la dzi ale gbegbe.—Mateo 28:19.