NEW YORK​—Esi dɔ vɔ̃ si nye Ebola va dze amewo dzi le Ɣetoɖoƒe Afrika la, Yehowa Ðasefowo yi edzi le nu fiam woƒe hameviwo tso dɔ vɔ̃ sia ŋu.

Esi wose be Ebola dɔlélea le Guinea eye be ekaka enumake ɖe dukɔ siwo nye Liberia kple Sierra Leone me la, Yehowa Ðasefowo ƒe alɔdzedɔwɔƒe siwo le dukɔ siawo me ŋlɔ lɛta ɖo ɖe hame siwo le dukɔ siawo me be woanɔ ŋudzɔ. Le lɛtaa me la, woŋlɔ dziɖuɖudɔwɔƒe ƒe mɔfiamewo kple aɖaŋuɖoɖo siwo ku ɖe dɔlékuia, ale si wòkakanae kple nu si woate ŋu awɔ be dɔlékuia nagakaka o la ŋu. Aƒetɔ Collin Attick, si nye Yehowa Ðasefowo ƒe nyanuɖela le Sierra Leone, gblɔ be: “Míele dukɔ aɖe si me amewo mesea dɔlélewo gɔme nyuie o eye wokakaa aʋatsonyawo tso Ebola dɔlélea ŋu la me, eya ta amewo tɔtɔ le gɔmedzedzea me eye womenya nu si woawɔ o. Gake esi woxlẽ lɛtaa me mɔfiamewo na hameawo la, wotso enumake wɔ ɖe mɔfiameawo dzi.”

Le July me la, wowɔ ɖoɖo tɔxɛ aɖe be dzikpɔla mɔzɔlawo nayi aɖasrã hame siwo le Sierra Leone kple Guinea la kpɔ ŋkeke eve. Sasrãkpɔa ƒe nuƒoa ƒe tanyae nye “Toɖoɖo Kpɔa Ame Ta,” be woatsɔ akpe ɖe wo nɔviwo ŋu woakpɔ wo ɖokuiwo ta tso dɔlélea si me eye woado ŋusẽ wo woayi edzi awɔ ɖe mɔfiame yeye siwo wona wo la dzi. Sasrãkpɔ sia ayi edzi va se ɖe November 2014 me. Tsɔ kpe ɖe eŋu la, Ðasefoawo da tsi si me wokɔ dɔlékuiwutike (bleach alo l’eau de Javel) ɖo la ɖe woƒe tadeaguƒewo (siwo woyɔna be Fiaɖuƒe Akpatawo) ƒe mɔnu le Guinea, Liberia kple Sierra Leone. Ðasefo geɖe siwo le dukɔ siawo me le zɔzɔm ɖe asikɔklɔ ƒe ɖoɖo sia ke nu le woƒe aƒewo me.

Xexea Me Lãmesẽ Habɔbɔ ka nya ta le October 1, 2014 dzi be ame 7,178 xɔ Ebola le Ɣetoɖoƒe Afrika eye ame 3,300 kple edzivɔe dɔlélea wu, gake wokpɔ mɔ be xexlẽmea adzi ɖe edzi. Va se ɖe October 2 la, Ðasefo 2,800 siwo le Guinea kple Sierra Leone dometɔ ɖeka si nye nyɔnu dɔnɔdzikpɔla aɖe koe xɔ Ebola dɔlélea, eye wòku le September 25, 2014 dzi. Le Ðasefo 6,365 siwo le Liberia dome la, ame 10 ye ku le dɔlélea si me; ame 6 nye lãmesẽdɔwɔlawo. Togbɔ be dɔlékuia kaka va Nigeria nyitsɔ laa hã la, Ðasefo siwo le afi ma la dometɔ aɖeke mexɔ dɔlélea o. Gakpe ɖe eŋu la, Ðasefo dutanyanyuigblɔla (mawunyadɔgbedela) siwo le dukɔ siawo me dometɔ aɖeke mexɔ dɔa o, elabena esi dɔa nɔ kakam la, dutanyanyuigblɔlaawo yi mɔkeke eye ɖewo hã yi takpekpe le Europa kple Amerika. Ame aɖewo trɔ yi woƒe dɔwo dzi eye wole wɔwɔm ɖe afɔɖoƒe kple mɔfiame vevi siwo alɔdzedɔwɔƒea na hamewo la dzi. Dutanyanyuigblɔla bubuwo hã di be yewoagbɔ, gake esi womekpɔ ɖe mɔ na yameʋuwo be woava du mawo me o hekpe ɖe nɔnɔme bubu aɖewo ŋuti ta la, womegbɔ haɖe o.

Ðasefowo ƒe lɔlɔ̃nu faa dɔwɔlawo ƒe kɔmitiwo le kpekpem ɖe Ðasefo siwo le Ɣedzeƒe Afrika-dukɔ, siwo me Ebola gblẽ nu le vevie la ŋu, wole woƒe ƒomewo kple woƒe haxɔsetɔwo ƒe nuhiahiãwo gbɔ kpɔm. Aƒetɔ Thomas Nyain, si nye Yehowa Ðasefowo ƒe nyanuɖela le Liberia, gblɔ be: “Wɔwɔ ɖe Biblia ƒe aɖaŋuɖoɖo siwo ku ɖe dzadzɛnyenye kple dɔnɔwo ɖeɖe ɖe aga dzi le kpekpem ɖe mía ŋu míele te nɔm ɖe nɔnɔme siawo nu. Esi wònye Yehowa Ðasefowoe míenye ta la, míeƒoa asa na ameɖiɖikɔnu siwo mewɔ ɖeka kple Biblia o. Esia le míaƒe hameviwo ta kpɔm, vevietɔ le ɣeyiɣi dziŋɔ sia me.”

Le Sierra Leone la, wogblɔ nu vovovo siwo Yehowa Ðasefowo wɔ tsɔ kpe ɖe woƒe hameviwo kple nutoa me tɔ bubuwo ŋu woƒo asa na Ebola dɔlélea le nutoa me ƒe radio aɖe dzi. Dziɖuɖumegã siwo le afi ma hã bia tso Yehowa Ðasefowo ƒe kpekpeɖeŋunakɔmitia me tɔwo si be woakpe asi ɖe dziɖuɖu ƒe dɔwɔha siwo le nutoa me la ŋu.

Aƒetɔ J. R. Brown, si nye Yehowa Ðasefowo ƒe nyanuɖela le woƒe dɔwɔƒegã le New York, gblɔ be: “Dzi ɖo mía ƒo esi míekpɔ ale si míaƒe haxɔsetɔ siwo le Ɣetoɖoƒe Afrika la ɖɔa ŋu ɖo ne wole woƒe mawusubɔsubɔdɔwo kple Biblia-fiafiadɔwo wɔm ale si woate ŋui. Ehiã vevie be míanɔ gbe dom ɖa ɖe míaƒe haxɔsetɔwo kple ame bubu siwo ŋu Ebola dɔlélea gblẽ nu le la ta.”

Woƒe Kadodowo:

Xexea Me Godoo: J. R. Brown, Office of Public Information, tel. +1 718 560 5000

Guinea: Thierry Pourthié, tel. +224 631 40 96 50

Liberia: Thomas Nyain, Sr., tel. +231 886 513 414

Nigeria: Paul Andrew, tel. +234 7080 662 020

Sierra Leone: Collin Attick, tel. +232 77 850 790