Ne èzi afi si gbegbɔgblɔwo dzena le le axa sia dzi la, gbegbɔgblɔ siwo nàkpɔ la wu 300, nu si màgate ŋu akpɔ le nyatakakadzraɖoƒe bubu aɖeke o!

Ke gbegbɔgblɔ nenie le nyatakakadzraɖoƒe bubuwo ya dzi? Bu eŋu kpɔ: Le July 2013 me la, Dukɔ Ƒoƒuawo ƒe nyatakakadzraɖoƒea le gbegbɔgblɔ ade ko me. Europa si nye Europadukɔwo ƒe Ðekawɔha ƒe nyatakakadzraɖoƒea le gbegbɔgblɔ 24 ko me. Google le gbegbɔgblɔ 71 me eye Wikipedia le gbegbɔgblɔ 287 me.

Gaƒoƒo gbogbo aɖe ŋutɔ nyatakakadzraɖoƒe sia gɔme ɖeɖe ɖe gbegbɔgblɔ 300 kple edzivɔwo me xɔna! Yehowa Ðasefo alafa geɖe siwo di be yewoahe kafukafu vae na Yehowa lae wɔ dɔ sia ƒe akpa gãtɔ. Wowɔa dɔ le ƒuƒoƒowo me, eye wozãa aɖaŋu vovovo siwo su wo si tsɔ ɖea Eŋlisigbea gɔme.

JW.ORG ƒe axa siwo gɔme woɖena ɖe gbegbɔgblɔ 300 kple edzivɔwo me la sɔ gbɔ ale gbegbe, eya ta ne wobu gbegbɔgblɔawo katã ƒe axawo la, wosɔ gbɔ ŋutɔ, wowu 200,000!

JW.ORG de du hã ŋutɔ. Esia dze le ɖoƒe si Alexa dɔwɔƒea na nyatakakadzraɖoƒe sia. Dɔwɔƒe sia bua akɔnta tso ame siwo zãa nyatakakadzraɖoƒe ɖe sia ɖe ƒe agbɔsɔsɔ ŋu, eye wòɖoa nyatakakadzraɖoƒeawo ɖe ɖoɖo nu le ame agbɔsɔsɔme si zãa wo nu. Nyatakakadzraɖoƒe 87,000 aɖewoe woyɔ le eƒe akpa si nye “Mawusubɔsubɔhawo Kple Mawusubɔsubɔ,” eye nyatakakadzraɖoƒe siawo dometɔ aɖewo nye xexemesubɔsubɔha gãtɔwo, mawunyagblɔlawo kple habɔbɔ siawo tɔgbiwo tɔ. Le nyatakakadzraɖoƒe mawo katã dome la, jw.org yee xɔ ɖoƒe evelia le July 2013 me! Nyatakakadzraɖoƒe si xɔ ɖoƒe gbãtɔe nye asitsanyatakakadzraɖoƒe aɖe si naa kpekpeɖeŋu Biblia-gɔmeɖela vovovowo.

Le October 2013 me la, ame vovovo 890,000 woe ʋua jw.org gbe sia gbe. Míayi edzi anɔ Biblia me nyatakaka tuameɖowo nam amewo le afi sia afi faa.