Ƒe sia ƒe la, ame akpe geɖe va ɖia tsa le United States (États-Unis) alɔdzedɔwɔƒea kple Yehowa Ðasefowo ƒe xexea me katã ƒe dɔwɔƒegã si le New York State. Woyɔa teƒe siawo be Betel, enye Hebrigbe me ŋkɔ si gɔmee nye “Mawu ƒe Aƒe.” Amewo tsoa didiƒe kple kpuiƒe siaa va kpɔa ale si míetaa agbalẽwo kple ale si wowɔ ɖoɖo ɖe míaƒe dɔa ŋue. Ame aɖewo hã va kpɔa wo xɔlɔ̃ siwo subɔna le teƒe siawo la ɖa. Ame aɖe si ɖoe kplikpaa be yeava ɖi tsa le teƒe siawo la ƒe didia va eme nɛ nyitsɔ laa.

Marcellus si nye Yehowa Ðasefo aɖe si le Anchorage le Alaska si le United States la metea ŋu ƒoa nu boo o tso esime wòlé gbagbadɔ ƒe aɖewoe nye ema *. Bunɔkeke mee wònɔna eye ame bubuwoe kpena ɖe eŋu le eƒe gbe sia gbe dɔwo me. Togbɔ be ele alea hã la, edi vevie be yeava ɖi tsa le Betel. Esia va eme nɛ nyitsɔ laa.

Corey si nye Marcellus xɔlɔ̃ si kpe ɖe eŋu wòwɔ ɖoɖo ɖe mɔzɔzɔ sia ŋu gblɔ be: “Eɖoe kplikpaa be yeayi. Eyɔam edziedzi be yease ale si ɖoɖoa le edzi yim. Esi wònye be nya siwo Marcellus tea ŋu gblɔna koe nye ‘Ɛ̃’ kple ‘Ao’ ta la, mebia nya geɖee be manya nu si ta wòyɔm ɖo.” Woƒe dzeɖoɖoa yi ale:

“Èdi be mava?”

“Ao.”

“Èdi be mayɔ ɖɔkta na yea?”

“Ao.”

“Alo wò Betel-yiyi ƒe nya yea?”

“Ɛ̃.”

“Eye megblɔ ale si Betel-yiyi ƒe ɖoɖoa le edzi yim la nɛ. Dzi dzɔm ale gbegbe esi eƒe didi sia va eme nɛ mlɔeba.”

Marcellus ɖu mɔxenu geɖe dzi hafi te ŋu ɖi tsa va Betel. Ga si wòkpɔna la mede afi aɖeke o, eya ta edzra ga ɖo ƒe eve hafi te ŋu kpɔ ga si wòatsɔ aɖo yameʋu azɔ mɔ kilometa 5,400 ayi New York. Esi wònye be lãmesẽ mede edzi o ta la, ele be wòakpɔ ame aɖe si ate ŋu azɔ mɔa kplii. Mlɔeba la, ele be eƒe ɖɔkta naɖe mɔ nɛ hafi wòate ŋu ayi. Exɔ mɔɖeɖe sia ŋkeke ʋɛ aɖewo do ŋgɔ na gbe si gbe wòazɔ mɔa.

Esi Marcellus va ɖo New York la, wokplɔe tsa le Brooklyn, Patterson kple Wallkill dɔwɔƒeawo. Ekpɔ agbalẽtaƒe gãwo, afi siwo wole agbalẽwo kple Bibliawo tam le, eye wòsrɔ̃ nu geɖe tso ale si wowɔa ɖoɖo ɖe míaƒe dɔa ŋui la ŋuti. Ekpɔ ɖeɖefia eve siwo nye “Biblia Kple Mawu Ƒe Ŋkɔ” kple “Dukɔ Aɖe Hena Yehowa Ƒe Ŋkɔ.” Edze xɔlɔ̃ geɖewo le tsaɖiɖi sia me. Tsaɖiɖi wɔdɔɖeamedzie wònye vavã!

Ame siwo va ɖia tsa le Betel la dometɔ geɖe gblɔna be nu siwo yewokpɔ le afi sia na yewoƒe nu ku! Gake esi wobia Marcellus nenye be eƒe tsaɖiɖi yi Betel la ɖe vi nɛ hã la, eɖo eŋu abe ale si wòtea ŋu wɔna ene be: “Ɛ̃. Ɛ̃. Ɛ̃!”

Tsaɖiɖi yi Betel ate ŋu ade dzi ƒo na wò kple wò ƒomea abe ale si ko wònɔ le Marcellus gome ene. Amewo va ɖia tsa le míaƒe alɔdzedɔwɔƒe siwo le xexea me godoo. Ðe manyo ŋutɔ be nàva ɖi tsa oa?