Le Fiɖa, July 5, 2013 dzi la, dzi dzɔ United States (États-Unis) Betel-ƒomea me tɔwo ŋutɔ esi Dɔdzikpɔha me tɔ Anthony Morris ɖe gbeƒã be: “Dziƒoxɔ ade siwo le míaƒe Adams Street 117 kple Sands Street 90 siwo le Brooklyn * la dzadzra ƒe ɖoɖoa dze edzi. Le dziƒoxɔ 1 va se ɖe 5 lia dzadzra gome ya la, wobia be míaʋu le teƒe siawo le ƒe sia me le August ƒe domedome.”

Edze kɔtɛe be dɔ nyadri aɖee nye sia dze ŋgɔ mí. Nyae nye be teƒe siawo katã ƒe kekeme ade bɔlƒoƒe gã 11 sɔŋ! Evɔ ele be míaʋu le ŋkeke 60 me!

Ƒe geɖewoe nye esia agbalẽtamɔ̃wo kple agbalẽblamɔ̃wo nɔ dziƒoxɔ 1 va se ɖe 5 lia me, gake le ƒe 2004 me la míeɖe mɔ̃ mawo yi teƒe yeye si nye Wallkill le New York.

Tso ɣemaɣi la, xɔ siawo zu nudzraɖoƒewo eye míedzraa xɔtunuwo, ɔfisidɔwɔnuwo kple dɔwɔnu siwo míezãna tsɔ tua xɔwo le United States kple du bubuwo me la ɖe afi ma.

Be míaʋu le teƒe siawo le ŋkeke si woɖo dzi la, ehiã ɖoɖowɔwɔ nyuie. Gbã míexlẽ nu siwo katã le xɔ siawo me be míanya nu siwo wòle be míadzra, esiwo wòle be míatsɔ aƒu gbe kple esiwo wòle be míadzra ɖo ɖe teƒe bubu. Ðoɖo si míewɔ kplɔe ɖoe nye be míawɔ dɔa le mɔ aɖe nu be dɔwɔlawo nanɔ dedie eye wòatsɔ kaba hã.

Betel-ƒomea wɔ dɔa kutrikukutɔe. Tsɔ kpe ɖe eŋu la, míekpe lɔlɔ̃nu faa dɔwɔla 41 wova kpe asi ɖe dɔa ŋu le Betel. Lɔlɔ̃nu faa dɔwɔlawo tso United States ƒe akpa vovovowo. Wo dometɔ geɖewo nye ɖekakpui tre siwo ŋu ŋusẽ le. Wolɔ̃ ɖe amekpekpea dzi be yewoava wɔ dɔ kwasiɖa ade va se ɖe kwasiɖa ewo, eye wodzo le woƒe ƒometɔwo, xɔlɔ̃wo kple dɔwɔɖuiwo gbɔ be yewoava wɔ dɔ le Betel. Aleke wose le wo ɖokuiwo me ku ɖe ɖoɖo sia ŋu?

Jordan si xɔ ƒe 21 eye wòtso Washington State gblɔ be: “Evem ŋutɔ be nyemeɖo nye dɔbiagbalẽa ɖa kaba o.”

Steven si xɔ ƒe 20 eye wòtso Texas gblɔ be: “Mese le ɖokuinye be menye xexea me katã ƒe ƒome gã aɖe si me tɔwo doa vevie dɔ wɔna eye wokpɔa dzidzɔ la me tɔ.”

Justin si xɔ ƒe 23 ŋlɔ bena: “Nye dzi dzea eme le Betel afi sia. Biblia me nunya, lɔlɔ̃ kple hadede tuameɖo siwo yia edzi le Betel la wu gbɔgblɔ.”

Adler si xɔ ƒe 20 eye wòtso Puerto Rico gblɔ be: “Fɔfɔ ŋdi kaba menɔa bɔbɔe nam o, gake meva dze xɔlɔ̃ siwo anye xɔ̃nyewo ɖaa.”

William si xɔ ƒe 21 gblɔ be: “Betel vava dzroam tso nye ɖevime ke. Gake mesusui be ne meva la, amewo matsɔ ɖeke le eme nam o alo matsi akogo, gake meble ɖokuinye. Betel ye nye teƒe nyuitɔ kekeake si menɔ kpɔ le nye agbe me! Nyemekpɔ teƒe aɖeke si de teƒe sia nu o.”

Ðe dɔwɔlaawo te ŋu wu dɔa nu ɖe gamea dzia? Ɛ̃, wowu enu le ŋkeke 55 pɛ ko me.