Le June 6 va ɖo 16, 2013 la, ame miliɔn geɖe ɖi tsa tso xexea me godoo va Rouen-melidzeƒe le France ƒe dziehe hena gomekpɔkpɔ le xexea me ƒe ƒutakpekpe gãtɔwo kple esiwo léa dzi na ame wu la dometɔ ɖeka si nye Armada la me.

Xexea me ƒe meli nyuitɔwo kple kɔkɔtɔwo zɔ kilometa 120 le Seine-tɔsisi nyakpɔ si le Normandy la dzi va ɖi go ɖe ƒuta si keke kilometa adre si wodzra ɖo nyuie hena azãɖuɖu. Mɔnukpɔkpɔ tɔxɛ aɖe su vavalawo si ŋkeke ewo sɔŋ woyia meli kɔkɔ xɔŋkɔ 45 siawo siwo wotsɔ va afi ma hena azãɖuɖu sia la me faa.

Nu kae ʋã ame gbogbo siawo, ɖeviwo kple tsitsiawo siaa wode Armada ƒe wɔna sia teƒe? Le ame si ɖo Armada ƒe wɔna sia anyi hewɔ ɖoɖo ɖe eŋu ƒe nya nu la, wɔnaa naa mɔnukpɔkpɔ amewo be “woate ɖe ‘tɔdziʋu gã’ siawo siwo me yiyi dzroa mí vevie la ŋu.” Le nyateƒe me la, meli gã siawo me yiyi nana ɖeviwo kple tsitsiawo siaa sena le wo ɖokuiwo me be yewozɔ mɔ yi didiƒe ʋĩ eye yewole ablɔɖe me.

Mɔnukpɔkpɔ su tsaɖila akpe geɖewo hã si wose nu tso ablɔɖe ƒomevi bubu aɖe ŋu, esiae nye ablɔɖe si Biblia me nyateƒea naa ame. (Yohanes 8:31, 32) Ne tsaɖilaawo to blemadu nyakpɔ Rouen me va yina la, wokpɔa Yehowa Ðasefo siwo le afi ma ƒe kekevi siwo dzi woɖo woƒe agbalẽwo ɖo la godoo. Ne nukpɔlawo alo melimenɔlawo te ɖe agbalẽawo ŋu la, wogblɔna na wo be woate ŋu atsɔ Biblia-srɔ̃gbalẽ ɖe sia ɖe faa femaxee. Ameawo dometɔ geɖe tsɔ ɖe le Gbetakpɔxɔ nyati si nye “Xexe Si Me Nazãbubu Manɔ O—Ɣekaɣie Wòava?” me eye wokpea wo be woava se Biblia me nuƒo aɖe si woaƒo le Fransegbe, Eŋlisigbe alo Spaingbe me.

Afi ma tɔwo kpɔ ŋudzedze ɖe Yehowa Ðasefowo ƒe nuwɔna sia ŋu ŋutɔ. Ewɔ nuku na ŋutsu aɖe esi wòkpɔ Yehowa Ðasefowo wotɔ ɖe kekeviwo gbɔ le amewo dome, eye wògblɔ be: “Edzɔ dzi nam ŋutɔ be mieva le gbeƒã ɖem le ablɔ dzi. Mekpɔa ŋudzedze ɖe ale si mieʋlia miaƒe dzixɔsewo ta la ŋu togbɔ be menye miaƒe hametɔe menye o hã.” Esi ŋutsu eve aɖewo do go sɔhɛ Ðasefo siwo le dutoƒoɖaseɖiɖidɔ sia wɔm la, wogblɔ na wo be: “Nenye dada na mi be yewonye Ðasefowo!”