Wozɔ Atsiaƒu Ƒe Tɔʋu Me Yi Ðaɖe Gbeƒã

ƑOE

Ame siwo ade 300 sɔŋ ye le Dziehe Ƒua ƒe ƒukpo suesue siwo woyɔna be Halligen dzi, le Germany ƒe ɣetoɖoƒe ƒutanuto si nye Schleswig-Holstein gbɔ lɔƒo. Aleke ame mawo wɔna sea Biblia me gbedeasi si Yehowa Ðasefowo ɖea gbeƒãe?—Mateo 24:14.

Ðasefoawo ɖoa tɔdziʋu yia ƒukpo sueawo dometɔ aɖewo dzi. Be woaɖo ame siwo le ƒukpo sue bubuawo dzi gbɔ la, Ðasefowo ƒe ƒuƒoƒo sue aɖe zã mɔnu bubu—wozɔna abe kilometa atɔ̃ ene to atsiaƒua ƒe tɔʋu me. Aleke wote ŋu wɔa esiae?

Ƒua Ðɔna Gamiena

Nu si kpena ɖe wo ŋue nye be ƒua ɖɔna gamiena. Dziehe Ƒua ƒe akpa si le Halligen ƒukpoawo ƒe nutowo me la ɖɔna gaƒoƒo ade eye wògamiena gaƒoƒo ade. Ete ŋu miena abe meta etɔ̃ sɔŋ ene. Ne tsia mie la, ƒugɔmenyigbaa ƒe akpa gãtɔ dzena, eye Ðasefoawo te ŋu zɔa afɔ yia ƒukpo suesueawo dometɔ etɔ̃ dzi.

Aleke mɔzɔzɔ sia nɔna? Ulrich, ame si si nuteƒekpɔkpɔ geɖe su le mɔ sia zɔzɔ me eye wòxɔa ŋgɔ na ƒuƒoƒoa gblɔ be: “Exɔa gaƒoƒo eve hafi míeɖoa Halligen ƒukpoawo dometɔ ɖeka dzi. Afɔ ƒuƒlu ko míezɔna zi geɖe. Esiae nye mɔ nyuitɔ kple bɔbɔetɔ wu ne míele tɔʋua me zɔm. Le vuvɔŋɔlia, míedoa afɔkpa glodzowo.”

Wokpɔa nu wɔmoya geɖewo le mɔa dzi. Ulrich gblɔ be: “Àwɔ na wò abe ɣletinyigba bubu aɖe dzie nèle ene. Ƒua gɔme ƒe teƒe aɖewo nye ba sɔŋ, kpewo xɔ teƒe bubuwo hã keŋ, eye atsiaƒumegbewo hã to ɖe teƒe aɖewo. Àkpɔ ƒutaxevi gbogbo aɖewo, agalãwo, kple lã ƒomevi bubuwo.” Ɣeaɖewoɣi la, wotsoa tɔʋu suesue siwo me tsi xa ɖo le teƒe siwo ɖe ʋe, si woyɔna le Germangbe me be Priele.

Ame siwo zɔa mɔ sia la doa go kuxi aɖewo. Ulrich xlɔ̃ nu be: “Ele bɔbɔe be ame nabu, vevietɔ ne afu do ɖe mɔa dzi. Eya ta míezãa taɖoƒefianu kple GPS-mɔfianu, eye míezɔna ɖe game dzi pɛpɛpɛ ale be atsiaƒua nagaɖɔ alé mí o.”

Wole gbeƒã ɖem le Halligen ƒukpo sueawo dometɔ ɖeka dzi

Ðe nu nyuiwo le dodom tso woƒe agbagbadzedzewo mea? Ulrich ƒo nu tso ŋutsu aɖe si xɔ ƒe 90 kple edzivɔ eye wòxlẽa Gbetakpɔxɔ kple Nyɔ! edziedzi ŋu. Egblɔ be: “Gbe ɖeka, esi ɣeyiɣia tsi tre ɖe mía ŋu ta míete ŋu ɖo ŋutsua gbɔ o. Gake kaka míe be míadzoa, ŋutsua le gasɔ dzi va tu mí hebia be: ‘Miele nye Gbetakpɔxɔ nagem egbea oa?’ Alea wòdzɔe be mɔnukpɔkpɔ su mía si míetsɔ ɖe nɛ kple dzidzɔ.”