Le July 2013 ƒe gɔmedzedze la, Yehowa Ðasefo 28 siwo le Brazil zɔ mɔ tso du si woyɔna be São Félix do Xingu me yi Indiatɔ Kayapowo kple Yurunawo ƒe nuto me. Wotsɔ tɔdziʋu si ƒe didime nye meta 15 zɔ mɔ to Xingu Tɔsisi si sina kilometa 2,092 yia dziehe ɖadea nu Amazon Tɔsisia me la dzi.

Yehowa Ðasefo siawo yi teƒe mawo be yewoaɖaɖe gbeƒã na kɔƒe siwo le tɔsisia to la me tɔwo. Le ŋkeke etɔ̃a gbe la, wova ɖo kɔƒe si woyɔna be Kokraimoro la me. Kɔƒea me tɔwo xɔ wo kple dzidzɔ hewɔ amedzro na wo. Nyɔnu aɖe si wodo go la nɔ asi wɔm na wo vevie. Afi ma tɔ aɖe si nɔ mɔ fiam amedzroawo la ɖe eme na wo be “eƒe asiwɔwɔa fia be: ‘Mi katã miva. Míedi be míadze si mi katã!’”

Ðasefoawo ɖo dze kple ame sia ame, woɖo dze kple ame aɖewo le Portugalgbe me, eye wowɔ asi kple dzesi na ame aɖewo hã. Nɔnɔmetata nyakpɔ siwo le Biblia-srɔ̃gbalẽ siwo wotsɔ ɖe asi me la ɖe vi ŋutɔ, kɔƒeawo me tɔwo xɔ agbalẽwo, vevietɔ agbalẽ gbadza si nye Ðo To Mawu.

Gerson, si nye mɔɖela vevi le São Félix do Xingu, gblɔ ale si kɔƒea me tɔ aɖe xɔ agbalẽ si nye Nye Agbalẽ si Nye Biblia Ŋutinyawo ale: “Elé ŋku ɖe eŋu eye wòvàe goŋgoŋ kple alɔ eve; medi be yeatsɔe da ɖi aɖabaƒoƒo ɖeka teti hã o.”

Yehowa Ðasefowo na agbalẽ, magazine kple agbalẽ gbadza siwo ade 500 kɔƒe siwo le tɔsisia to me tɔ siwo kpɔ ŋudzedze ɖe wo ŋu. Le Kawatire la, kɔƒea me tɔwo kpɔ dzidzɔ ɖe ŋugbe si Biblia do be anyigba ava zu paradiso la ŋu ŋutɔ. Tonjaikwa Kayapo, si nye Indiatɔ amedzrowɔla aɖe, gblɔ be: “Paradisomenɔlawo ƒe nuwɔna anɔ ko abe mía tɔ ene.”

São Félix do Xingu me tɔ geɖewo se nu tso mɔzɔla siawo ƒe mɔzɔzɔa ŋu. Simone, si nye mɔzɔla siawo dometɔ ɖeka gblɔ be yewo detɔ aɖewo gblɔ be yewomeka ɖe edzi be kɔƒeawo me tɔwo aɖe mɔ na wo woage ɖe woƒe kɔƒeawo me o. Gake ɖeko nu sia nu yi nyuie. Simone gblɔ be: “Woxɔ mí nyuie, eye míeɖe gbeƒã na ame sia ame.”