Le ƒe 1987 me la, Lyman Swingle, si nye Yehowa Ðasefowo ƒe Dɔdzikpɔha me tɔ ƒo nuƒo aɖe na ame 63,580 siwo kpe ta le Plaza Monumental fefewɔƒe le Valencia le Venezuela. Ame geɖewo zɔ mɔ zã bliboa katã va be yewoase eƒe nuƒoa. Nɔviŋutsu Swingle gblɔ na ameha la be: “Mieganye alɔdzedɔwɔƒe sue o. Fifia miezu alɔdzedɔwɔƒe loloe. Edze ƒãa be eteƒe madidi o miazu dukɔ siwo ƒe ‘gbeƒãɖelawo de 100,000’ la dometɔ ɖeka!”

Le ƒe 1987 me la, gbeƒãɖela 38,000 kple edzivɔe nɔ Venezuela. Gbeƒãɖelawo nye Yehowa Ðasefo siwo ɖea gbeƒã Fiaɖuƒe ŋuti nya nyuia. Ɣemaɣi la, dukɔ enyi me ko gbeƒãɖelawo sɔ gbɔ wu 100,000 le.

Ale si Yehowa Ðasefowo dzi ɖe edzi le xexea me godoo la ɖe dzesi ŋutɔ. Le Xexemeʋa I megbe la, ame akpe ʋɛ aɖewo koe ɖea gbeƒã Yehowa ƒe Fiaɖuƒea. Gake nuwo va trɔ. Yehowa Ðasefowo Ƒe Ƒe 1943 Ƒe Ƒegbalẽ (ele yevugbe me) gblɔ be: “Xexea me katã ƒe akɔntabubu siwo katã míexɔ le ƒe 1942 me, togbɔ be míete ŋu xɔ wo katã o, le esi kadodomɔnuwo mede ame dzi o ta hã la, ede dzi ƒo ŋutɔ . . . elabena eɖee fia be le xexea me godoo la gbeƒãɖela 106,000 kple edzivɔwoe le [nya nyui gbeƒãɖeɖedɔa wɔm] fifia.” Le Xexemeʋa II ƒe zitɔɣiwo me gɔ̃ hã la, ame geɖewo lɔ̃ ɖo to Biblia me nyateƒea. Le ƒe 1950 me la, gbeƒãɖela siwo le United States (États-Unis) ɖeɖe dzaa sɔ gbɔ wu 100,000.

Dukɔ evelia si me gbeƒãɖelawo sɔ gbɔ de 100,000 lae nye Nigeria le ƒe 1974 me.

Le ƒe si kplɔe ɖo me la, gbeƒãɖela siwo le dukɔ siwo nye Brazil kple Germany dometɔ ɖe sia ɖe me sɔ gbɔ wu 100,000. Ale si gbeƒãɖelawo dzi ɖe edzi le anyigba ƒe dzogoe eneawo dzi ɖee fia be amewo le dzidzɔ kpɔm ɖe Biblia me nyateƒea ŋu le xexea me godoo.

Le xexea me godoo la, ame siwo le to ɖom nya nyui la yi edzi le dzidzim ɖe edzi. Esia wɔ ɖeka kple Biblia me nyagblɔɖi sia be: “Ame ʋɛwo azu akpe, eye ame suewo azu dukɔ sesẽ. Nye Yehowa ŋutɔ, mado tsɔtsɔe le ewɔɣi.”—Yesaya 60:22.

Le ƒe 2014 subɔsubɔƒea ƒe akɔntabubu nu la, dukɔ 24 mee Ðasefowo sɔ gbɔ wu 100,000 le. Venezuela hã le wo dome, eɖo gbeƒãɖelawo ƒe agbɔsɔsɔ ma gbɔ le ƒe 2007 me. Le xexea me godoo la, Yehowa Ðasefowo ƒe hame 115,416 kple gbeƒãɖela 8,201,545 aɖewoe li.