Wona ɖaseɖigbalẽwo Yehowa Ðasefo asieke aɖewo le Australia tsɔ da akpe na wo ɖe “kpekpeɖeŋu gã” si nam wole gamenɔla siwo le Australia ƒe amedzro siwo si dukɔmenɔgbalẽvi mele o ƒe gaxɔ gãtɔawo dometɔ ɖeka me ta. Amedzro siwo si dukɔmenɔgbalẽvi mele o ƒe gaxɔ gãtɔ si nye Curtin Immigration Detention Centre si gogo Derby le Australia ƒe ɣedzeƒe lae na ɖaseɖigbalẽawo Ðasefoawo. *

Ðasefowo yia gamenɔla siawo gbɔ kwasiɖa sia kwasiɖa ɖasea nu siwo me tom wole eye wogblɔa Biblia me gbedeasi siwo faa akɔ na ame henaa mɔkpɔkpɔ ame la na wo. Christopher Riddoch, si nye teƒea ƒe subɔsubɔnyawo kple dekɔnunyawo gbɔ kpɔla gblɔ be: “Vi si gbegbe woƒe vava le ɖeɖem na gamenɔlaawo dzena ƒãa enumake.” Egblɔ be gamenɔlawo nɔa dzidzɔ kpɔm le woƒe vava megbe “elabena wonyae be ame aɖewo le gota siwo tsɔ ɖe le yewoƒe nyonyo me vevie.”

Aƒetɔ Riddoch gblɔ hã be ɖaseɖigbalẽawo nye mɔ sue aɖe ko si dzi yewoto le akpe dam na Ðasefoawo le “ale si wokpena ɖe ame siwo le yewoƒe dzikpɔkpɔ te ŋu si wɔe be woƒe agbenɔnɔ le nyonyom wu la ta.” Egblɔ kpee be Ðasefo siawo “doa woƒe ƒomewo kple woƒe haa ƒe ta ɖe dzi, eye wonana woƒoa nu nyui hã tso woƒe mawusubɔsubɔ ŋu.”