Le kwasiɖanuwuwu si nye October 5 kple 6, 2013 dzi la, ame 1,413,676 siwo nye dukɔ 31 me tɔwo kpɔ gome le Gbetakpɔxɔ Biblia Kple Trakt Habɔbɔ Si Le Pennsylvania la ƒe ƒe sia ƒe takpekpe 129 lia la me. Wo dometɔ aɖewo de takpekpewɔƒea ŋutɔ le Yehowa Ðasefowo ƒe Takpexɔ si le Jersey City si le New Jersey le Amerika, eye ame bubuwo hã ƒo ƒu ɖe teƒe bubuwo nɔ wɔna kpɔm enumake le video dzi.

Guy Pierce si nye Yehowa Ðasefowo ƒe Dɔdzikpɔha me tɔe nye kpekpea ƒe zimenɔla. Eka ɖe edzi na vavalawo be woaɖo Biblia me nyabiase vevi aɖewo ŋu na wo, nyateƒea ƒe kekelia me agakɔ ɖe edzi, eye woana Biblia me “nuɖuɖu wo le ɣeyiɣi nyuitɔ dzi” si na be wokpɔ mɔ na nu siwo ayi edzi le wɔnaa me vevie.​—Mateo 24:45; Lododowo 4:18.

“Ðeɖefia Si De Bubu Yehowa Ŋu.”

Dɔdzikpɔhaa me tɔ Mark Sanderson ɖe nu me tsitotsito ku ɖe ɖeɖefia yeye si ƒe tanyae nye “Biblia Kple Mawu Ƒe Ŋkɔ” si ƒe ɖoɖo wode to me le Ðasefowo ƒe dɔwɔƒegã si le Brooklyn le New York si le Amerika la ŋu. Ðeɖefia ɖo kpe edzi kɔtɛe be Mawu ƒe ŋkɔ dze le Hebri Ŋɔŋlɔawo kple Kristotɔwo Ƒe Hela Ŋɔŋlɔawo me kple Biblia xoxo siwo nye blemagbalẽwo kple Titinaɣeyiɣiwo ƒe Bibliagbalẽ ɖeɖiwo me.

Ðeɖefia ƒe akpa veviawo dometɔ aɖewoe nye Biblia si gɔme William Tyndale ɖe le ƒe alafa 16 lia me si me wozã Mawu ƒe ŋkɔ le zi gbãtɔ le Eŋlisigbe me la ƒe axa aɖewo kple Spaingbe me Biblia si woyɔna be Reina-Valera, si wota le ƒe 1602 me, si me woɖe Mawu ƒe ŋkɔ gɔme le le afi sia afi si wòdze le la be “Iehova” ƒe axa aɖe. Biblia bubu siwo hã dze le ɖeɖefia sia mee nye Eŋlisigbe me Biblia si woyɔna be Great Bible (ƒe 1549 ƒe tata) kple Elias Hutter ƒe Biblia, si me gbegbɔgblɔ 12 le (ƒe 1599 ƒe tata, si wogayɔna be Nuremberg Polyglot) tsɔ kpe ɖe Geneva Biblia (ƒe 1603 ƒe tata) ŋu, Biblia siawo katã zã Mawu ƒe ŋkɔa.

Nɔviŋutsu Sanderson kpe vavalawo katã be woava kpɔ Biblia ƒe ɖeɖefia sia. Egblɔ be: “Míele gbe dom ɖa be . . . akpe ɖe dzianukwaretɔwo katã, ɖeviwo kple tsitsiawo, agbalẽnyalawo kple agbalẽmanyalawo siaa ŋu be woalɔ̃ nu eve mawo ke siwo mí katã míelɔ̃, siwo nye Mawu ƒe Nya xɔasi Biblia la kple eƒe ŋkɔ kɔkɔe, Yehowa.”

Ƒe 2014 ƒe mawunyakpukpuia.

Esi Dɔdzikpɔhaa me tɔ Gerrit Lösch tò kwasiɖa ma ƒe Gbetakpɔxɔ-nusɔsrɔ̃a ɖe eme vɔ la, Nɔviŋutsu Pierce ɖe gbeƒãe be ƒe 2014 ƒe mawunyakpukpuiae nye “Wò fiaɖuƒe nava.” (Mateo 6:10) Togbɔ be ƒea ƒe mawunyakpukpui sia asɔ na Yehowa Ðasefowo ɣesiaɣi hã la, ƒe sia me tɔ ya gaɖe dzesi wu, elabena ƒe 2014 mee Fiaɖuƒe si woɖo anyi le dziƒo la axɔ ƒe alafa ɖeka.

“Nunana Xɔasi Si Tso Yehowa Gbɔ.”

Emegbe vavalawo kpɔ video aɖe si ku ɖe Xexe Yeye Gɔmeɖeɖe Biblia si Yehowa Ðasefowo tana, eye ame geɖewo bunɛ be enye Biblia nyuitɔwo dometɔ ɖeka la, ƒe ŋutinya ŋu. Esi Nathan Knorr ɖe Biblia sia ƒe babla gbãtɔ ɖe go le ƒe 1950 Teokrasi Ƒe Dzidziɖedzi Dukɔwo Dome Takpekpea me la, eɖo aɖaŋu aɖe na vavalawo, si gasɔ na míawo hã egbea. Eyae nye be, woaxlẽ Biblia bliboa, woasrɔ̃e eye woakpe ɖe amewo ŋu woasrɔ̃e, elabe esia akpe ɖe wo ŋu woayɔ Yehowa ƒe ŋkɔa.

“Ŋkuɖoɖo Gbe Aɖe Gbe Nu Dodzidzɔnamewo Dzi.”

Dɔdzikpɔhaa me tɔ Samuel Herd ye ƒo nuƒo sia. Le eƒe nuƒoa me la, woƒo Amerika Betel-dɔwɔla ene ƒe nya siwo wogblɔ wolé ɖe mɔ̃ dzi la na vavalawo wose. Nɔvi ene siawo nɔ eteƒe esime woɖe Xexe Yeye Gɔmeɖeɖe Biblia ƒe babla ade vovovoawo ɖe go tso ƒe 1950 va se ɖe ƒe 1960 me.

Eunice Timm ɖo ŋku ale si wòzãa Xexe Yeye Gɔmeɖeɖe Biblia le Kristotɔwo ƒe kpekpewo me la dzi. Ekpɔ ŋudzedze ɖe numeɖeɖewo kple titinanuŋɔŋlɔ siwo le eme la ŋu. Esi wònye be mele bɔbɔe be wòatsɔ Biblia ƒe bablawo katã ayi kpekpeawo o ta la, babla siwo hiã koe wòtsɔna eye wòtsɔa King James Version Biblia suetɔ ɖe asi ale be ne eva dzɔ be woyɔ kpukpui siwo mele babla siwo wòtsɔ la me o la, wòate ŋu aʋu wo le eme.

Biblia yeye sia kpɔ ŋusẽ ɖe míaƒe tadedeagu ƒe akpa aɖewo hã dzi. Le kpɔɖeŋu me, Fred Rusk gblɔ be do ŋgɔ na ƒe 1950 la, ame siwo nɔa Betel-ƒomea teƒe doa gbe ɖa la zãa King James Version me nya aɖewo. Gake esi wonya ɖe Xexe Yeye Gɔmeɖeɖe Biblia ɖe go ko la, nɔviwo dzudzɔ blemanyagbɔgblɔwo zazã, eye wozãa nya siwo míezãna le gbe sia gbe nuƒoƒo me tsɔ doa gbe ɖae.

John Wischuk kpɔ ŋudzedze gã aɖe ɖe Biblia ƒe nyonyome kple Xexe Yeye Biblia Gɔmeɖekɔmitia me tɔwo ƒe ɖokuibɔbɔ siaa ŋu. Egblɔ be: “Womedi be amewo nanya be yewoe ɖe Biblia gɔme o eɖanye le woƒe agbenɔɣi loo alo woƒe ku megbe o, elabena wodi be ŋutikɔkɔea nayi na Yehowa Mawu.” Charles Molohan ƒo nu ɖe wo katã nu be: “Xexe Yeye Gɔmeɖeɖe Biblia gaɖo kpe nyateƒea dzi na mí le míawo ŋutɔwo míaƒe dzi me eye wòdo ŋusẽ míaƒe xɔse ale be míate ŋu ado ayi amewo gbɔ aɖado ŋusẽ woƒe xɔse.”

“Wole Nu Ƒom Tso Mawu Ƒe Nu Dzɔtsuwo Ŋu Le Mía Degbe Me Míele Sesem.”

(Dɔwɔwɔwo 2:11) Dɔdzikpɔhaa me tɔ Geoffrey Jackson ƒo nuƒo si me wòɖe Xexe Yeye Gɔmeɖeɖe Biblia si ŋu wogbugbɔ asi trɔ le le ƒe 2013 me la ɖe go le. Le nuƒo sia ƒe nuwuwu la, vavala ɖe sia ɖe xɔ Biblia yeyea ɖeka, ame siwo le wɔnaa kpɔm le videowo dzi le teƒe vovovowo hã xɔe.

Nɔviŋutsu Jackson ɖo ŋku edzi na vavalawo be ƒe 60 kple edzivɔe nye esi woɖe Xexe Yeye Gɔmeɖeɖe Biblia ƒe babla gbãtɔwo ɖe go. Tso ɣemaɣi la, tɔtrɔ geɖewo va Eŋlisigbea me, gake míaƒe Biblia-gɔmeɖeɖedɔa ƒe taɖodzinu ya metrɔ o. Míedi be míaɖe Mawu ƒe Nya la gɔme wòade pɛpɛpɛ ale si míate ŋui evɔ míatɔ tsi gɔmesesea o.

Le ƒe 2005 me la, Dɔdzikpɔhaa va trɔ susu ɖe ale si wòva hiã be woaɖe Biblia gɔme ɖe gbegbɔgblɔ geɖe wu me la ŋu. Tso ɣemaɣi la, gbegbɔgblɔ siwo gɔme woɖe Xexe Yeye Gɔmeɖeɖe Biblia ɖo la dzi ɖe edzi tso 52 va ɖo 121, eye wole egɔme ɖem ɖe gbegbɔgblɔ 45 bubuwo me fifia. Ne Biblia-gɔmeɖelawo le Biblia gɔme ɖem ɖe wo degbe vovovoawo me la, wobiaa numekɔkɔ tso nya alo nyagbe aɖewo ƒe gɔmesese ŋu. Va se ɖe fifia la, nyabiase siawo dometɔ 52,000 kple edzivɔwoe va ɖo mía gbɔ eye míeɖo geɖe ŋu. Nyabiase siawo dometɔ geɖe na míekpɔe be ele be míatrɔ asi le Eŋlisigbe me Biblia ƒe akpa aɖewo ŋu ale be woasɔ ɖe ale si wodoa Eŋlisigbea egbeae la nu.

Nɔviŋutsu Jackson ɖe nu me be Eŋlisigbe me Xexe Yeye Gɔmeɖeɖe Biblia tsãtɔ gblɔ le 1 Samuel 14:11 be Yonatan kple eƒe adekplɔvi “tsɔ wo ɖokuiwo fia Filistitɔwo ƒe dzɔlawo.” Esi wònye amewo ate ŋu ase egɔme bubui ta la, Biblia yeyea ɖe egɔme be ‘wona Filistitɔwo ƒe dzɔlawo kpɔ wo.’ Woɖe Mixa 2:6 hã gɔme tsã be: “Migana nyawo nage o. Wona nya ge.” Woɖe kpukpui sia gɔme azɔ be: “Wole gbɔgblɔm be, “Midzudzɔ gbeƒãɖeɖe!”

Ƒe atɔ̃e nye esi va yi la, Dɔdzikpɔhaa ɖo kɔmiti aɖe be woatrɔ asi le Xexe Yeye Gɔmeɖeɖe Biblia ŋu, eye wowu woƒe dɔa nu azɔ. Biblia yeye sia nya kpɔ, exexlẽ le bɔbɔe, eye wowɔe nyuie ale be ne wozãe zi geɖe hã wòakpɔtɔ anɔ nɔnɔme nyui me. Nɔviŋutsu Jackson gblɔ kpee be woaɖe Eŋlisigbe me Biblia ƒe nuŋɔŋlɔ lolotɔ kple suetɔ ɖe go kpuie.

‘Nyateƒenya La Ŋu Dɔwɔwɔ Pɛpɛpɛ.’

Dɔdzikpɔhaa me tɔ Stephen Lett ƒo nu tso nu bubu siwo le Biblia yeye sia me ŋu, wotu eƒe nuƒoa ɖe 2 Timoteo 2:15 dzi. Nya si wogblɔ be “wɔa . . . ŋu dɔ pɛpɛpɛ” ƒe gɔmeɖeɖe tẽe nye “woalã nu wòadzɔ.” Míedi be míazã “gbɔgbɔ la ƒe yi” la le mɔ si dzɔ nu, eye wòade pɛpɛpɛ. (Efesotɔwo 6:17) Nɔviŋutsu Lett he susu yi ale si nu yeye siwo le Biblia sia me ate ŋu akpe ɖe mía ŋu míawɔ esiae la dzi.

1. Nyati si nye “Mawu Ƒe Nya La Me Nya Vevi Aɖewo” le Biblia ƒe gɔmedzedze, eye mawunyakpukpui siwo ɖo nyabiase 20 siwo ku ɖe Biblia me nufiafia veviwo ŋu ŋuti la le eme.

2. Megbenyawo A ƒo nu tso nu yeye siwo le Biblia yeye sia me ŋu, wo dometɔ aɖewoe nye, nuŋɔŋlɔ ƒe atsiã kple nya siwo wozã kple afi siwo Mawu ƒe ŋkɔa dze le.

3. Megbenyawo B ma ɖe akpa 15 siwo ƒe amadede nya kpɔ la me, nu siwo le akpa siawoe nye anyigbatatawo kple aɖaka siwo akpe ɖe mía ŋu le ɖokuisinusɔsrɔ̃ kple nufiafia amewo me.

4. Le Biblia-gbalẽ ɖe sia ɖe ƒe gɔmedzedze la, “Emenyawo Ƒe Totoɖeme” li si tò agbalẽa me nyawo ɖe eme eye esia akpe ɖe nuxlẽla ŋu wòake ɖe akpa si dim wòle la ŋu kaba. Esia va xɔ ɖe etamenuŋɔŋlɔ siwo le Biblia tsãtɔ me la teƒe.

5. Woɖe Biblia me nya alafa geɖewo me kpuie le akpa si nye “Biblia Me Nya Tɔxɛwo Gɔmeɖeƒe.”

6. Woɖe nya agbɔsɔsɔme si le “Biblia Me Nyawo Diƒe” dzi kpɔtɔ zã. Nya siwo zazã aɖe vi geɖe le gbeƒãɖeɖedɔa kple nufiafia me koe wosusɔ ɖe afi sia.

7. Woɖe titinanuŋɔŋlɔ siwo le axa ɖe sia ɖe ƒe domedome hã ƒe agbɔsɔsɔme dzi kpɔtɔ. Esiwo aɖe vi geɖe le gbeƒãɖeɖedɔa me koe li azɔ.

8. Nyawo ƒe gɔmesese bubuwo, nyawo ƒe gɔmeɖeɖe tẽe kple nyatakaka bubu siwo do ƒome kple mawunyakpukpuiawo me nyawo la le etenuŋɔŋlɔwo me.

JW Library.

John Ekrann si nye United States Alɔdzekɔmitia me tɔ la ɖe ale si woazã dɔwɔnu yeye si nye JW Library si woate ŋu azã le asitelefon deŋgɔwo kple asikɔmpiutawo dzi la fia. Dɔwɔnua tea ŋu ʋua Xexe Yeye Gɔmeɖeɖe Biblia yeyea kple Biblia gɔmeɖeɖe atɔ̃ bubuwo. Woda dɔwɔnu sia ɖe internet nyatakakadzraɖoƒe vevitɔwo dzi le October 7, 2013 dzi, ame sia ame ate ŋu awɔ eŋu dɔ faa.

“Mawu Ƒe Nya La Gɔme Ðeɖe Be Gɔmesesea Nade Pɛpɛpɛ.”

Dɔdzikpɔhaa me tɔ Anthony Morris ɖe nu siwo fiaa mɔ Xexe Yeye Biblia Gɔmeɖekɔmitia me tɔwo le Biblia yeye sia gɔme ɖeɖe me la me. Esi kɔmitia me tɔwo ɖoe be yewoawɔ ɖe 1 Korintotɔwo 14:8, 9 me nyawo dzi le yewoƒe dɔa wɔwɔ me ta la, woɖoe be yewoaɖe nyawo gɔme wo gɔme sese nanɔ bɔbɔe. Afi siwo wokpɔe le be nyawo gɔme ɖeɖe nya-ɖe-nya-nu ana be Biblia me nyaa ƒe gɔmesese nabu la, wonana gɔmesesea boŋ dzena.

Le kpɔɖeŋu me, ne woaɖe 1 Mose 31:20 gɔme tẽe la, anye, “Yakob fi Aramtɔ Laban ƒe dzi.” Gake Hebrigbe me adagana si wozã le kpukpui sia me ƒe gɔmesese to vovo na gɔmesese si le nya la ŋu le Eŋlisigbe me, eya ta woɖe egɔme le Xexe Yeye Gɔmeɖeɖe Biblia me be “Yakob flu Aramtɔ Laban.” Nenema kee 1 Korintotɔwo 7:39 me nyawo gɔme ɖeɖe nya-ɖe-nya-nu afia be ne nyɔnu aɖe srɔ̃ “dɔ alɔ̃” ko la, ate ŋu aɖe ŋutsu bubu faa. Esi wònye be Ŋɔŋlɔawo zãa “alɔ̃” na ku ɣeaɖewoɣi ta la, woɖe egɔme le Xexe Yeye Gɔmeɖeɖe Biblia me be “dɔ alɔ̃ le ku me” kple susu be magaflu nuxlẽlaa o.

Nɔviŋutsu Morris gblɔ be: “Ale si ame akpa gãtɔ, abe agbledelawo, alẽkplɔlawo, kple tɔƒodelawo, ƒoa nu gbe sia gbe nue woŋlɔ Biblia ɖo. Biblia gɔmeɖeɖe nyuitɔ nana be dzianukwaretɔwo katã, afi ka kee woɖatso o, sea gbedeasi si le eme la gɔme bɔbɔe.”

“Wozã ‘Nya Viviwo’ Kple ‘Nyateƒenya Siwo De Pɛpɛpɛ.’”

Dɔdzikpɔhaa me tɔ David Splane ƒo nuƒo si wotu ɖe Nyagblɔla 12:10 dzi. Biblia-ŋlɔlawo ɖɔ ŋu ɖo vevie hafi ŋlɔ Mawu ƒe susuwo, eye Xexe Yeye Biblia Gɔmeɖekɔmiti gbãtɔa hã ɖɔ ŋu ɖo vevie le woƒe dɔa wɔwɔ me. Nenema ke wòle le Xexe Yeye Gɔmeɖeɖe Biblia yeye sia gɔmeɖelawo hã gome, woŋlɔ ‘nyateƒenya siwo de pɛpɛpɛ’ eye woɖe gbedeasia gɔme eme kɔ nyuie ale si wòanya wɔe.

Nɔviŋutsu Splane gblɔ be: “Gɔmesese geɖe nɔa Eŋlisigbe me nya geɖewo si.” Le kpɔɖeŋu me, Xexe Yeye Gɔmeɖeɖe Biblia tsãtɔ zã nyagbe ‘nya nyuitɔwo ƒe kpɔɖeŋu’ le 2 Timoteo 1:13. Gɔmesese geɖee le yevugbe me nya si gɔme woɖe be “kpɔɖeŋu” la si, wo dometɔ ɖekae nye “aɖaŋunu.” Ame aɖewo nɔ te ɖe gɔmesese sia dzi ƒo nya ta be kpɔɖeŋu si wozã le kpukpui sia me fia aɖaŋunu alo atsyɔ̃ si le Biblia me nufiafiawo ŋu. Gake gɔmeɖeɖe si sɔ kple gbegbɔgblɔ gbãtɔa me nya lae nye “kpɔɖeŋu . . . si wona be woasrɔ̃.” Eya tae woɖe egɔme le Biblia yeyea me be ‘nya siwo le blibo ƒe kpɔɖeŋu.’

Nɔviŋutsu Splane ƒo nu tso tɔtrɔ siwo wowɔ le Biblia yeyea me be emenyawo nasɔ ɖe egbegbe Eŋlisigbe nu la hã ŋu. Le kpɔɖeŋu me, wozã nya “tsi ɖe ati ŋu” le Xexe Yeye Gɔmeɖeɖe Biblia tsãtɔ me tsɔ ɖɔ ale si wowu Yesui, eye esia fiana zi geɖe be woƒo ati biɖoe aɖe ɖe amea wònɔa atia ŋu nenema. Esi wònye be menye ɖe wotsi Yesu ɖe fuwɔametia ŋuti o ta la, Biblia yeye sia zã nya ‘he ɖe ati ŋu’ tsɔ ɖɔ ale si wowu Yesui.​—Mateo 27:22, 23, 31.

Nɔviŋutsu Splane ƒo eƒe nuƒoa ta be: “Míaƒe gbedodoɖae nye be Xexe Yeye Gɔmeɖeɖe Biblia yeyea xexlẽ kple esɔsrɔ̃ nana nànɔ tetem ɖe Yehowa ŋu kplikplikpli wu. Eye neva eme be eya amea nanye Fofowò, wò Mawu kple Xɔ̃wò tegbee.”

Nyataƒoƒo.

Nɔviŋutsu Pierce tsɔ Biblia yeyea sɔ kple nuɖuɖu damiwo le Yehowa ƒe “kplɔ̃” dzi. (Yesaya 25:6) Ekpe nyaselawo wodzi Midzi Ha Na Yehowa ƒe hadzidzi 114 lia si ƒe tanyae nye: “Mawu Ŋutɔ Ƒe Agbalẽ​—Kesinɔnue” tsɔ ƒo wɔnaawo tae wòsɔ nyuie.