Wodzim le Montreal, le Canada ƒe nuto si nye Quebec la ƒe du gãtɔ me. Mía dzila lɔlɔ̃awo he nye kple nɔvinye etɔ̃awo le Rosemont ƒe nuto nyakpɔ la me. Míenɔ anyi le dziɖeɖi kple ŋutifafa me ɖekae.

Esime menye ɖevi la, Biblia xexlẽ dzɔa dzi nam. Meɖo ŋku edzi be esime mexɔ ƒe 12 la, mexlẽa Yesu ƒe ŋutinyawo le Nubabla Yeyea me, eye mesea vivi nɛ ŋutɔ. Yesu ƒe lɔlɔ̃ kple dɔmetɔtrɔ wɔ dɔ ɖe dzinye ale gbegbe eye medi be manɔ abe eya ene. Gake nublanuitɔe la, didi sia nu va tsi esi menɔ tsitsim eye meva te hadede kple ame gbegblẽwo.

Fofonye nye kpẽkula, eye etsɔ eƒe kpẽa nam. Tsɔ kpe ɖe eŋu la, eƒã halɔlɔ̃ hã ɖe menye, si wɔe be haƒoƒo va zu nu vevitɔ nam le agbe me. Mesea vivi na haƒoƒo ale gbegbe be mesrɔ̃ dzitaaƒoƒo le ɣeyiɣi kpui aɖe ko me. Eteƒe medidi o, nye kple xɔ̃nye ʋɛ aɖewo míeɖo hadziha, eye míedzia ha le wɔna geɖewo me. Hadzidziŋudɔwɔla xɔŋkɔwo dze ŋku ɖe mía ŋu eye wogblɔ be yewoado míaƒe hawo ɖe ŋgɔ. Mewɔ dɔ kple adzɔha gã aɖe si léa ha ɖi. Nye hawo va de du eye woƒoa wo zi geɖe le radio dzi le Quebec.

Ewɔ nam be nu sia nu si medi la su asinye. Menye ɖekakpui xɔŋkɔ, eye menɔ ga geɖe wɔm tso nu si melɔ̃ la wɔwɔ me. Le ŋkeke me la, meva xɔa hehe le kamedeƒe, wobiaa gbem le amewo ŋkume, meyia wɔna siwo me amewo xɔa nye asidedenute ƒe dzesi le, eye medzena le television dzi wɔnawo me. Le zã me la, medzia ha eye meyia aglotuƒewo. Be dzi nanɔ ƒonye le amehawo ŋkume la, mete aha sesẽ nono le nye ɖekakpuime, gake le ɣeyiɣi aɖe megbe la, meva nɔ atike vɔ̃ɖiwo zãm. Mewɔa nu yakayaka eye menɔa agbe gbegblẽ hã.

Ame aɖewo ʋãa ŋum, elabe edzena abe mele dzidzɔ kpɔm ene. Gake le ememe la, mesena le ɖokuinye me be nu vevi aɖe gakpɔtɔ nam le agbe me, vevietɔ ne nye ɖeka meli. Meléa blanui eye metsia dzimaɖi. Nublanuitɔe la, esi nu nɔ edzi dzem nam wu la, ɖikanàkudɔ wu nye hadzikpɔla eve. Dzidzi ƒom ŋutɔ! Togbɔ be melɔ̃ hadzidzi hã la, agbe si ƒomevi hadzilawo nɔna la nyɔa ŋu nam.

Togbɔ be mekpɔ dzidzedze alea hã la, menya be nane menɔ edzi yim nyuie kura le xexea me o. Aleke wɔ nu madzɔmadzɔ wɔwɔ nabɔ alea gbegbe? Nu ka tae Mawu mele afɔ aɖeke ɖem be yeatsɔ akpɔ egbɔ o? Medoa gbe ɖa na Mawu be makpɔ ŋuɖoɖoawo. Ɣeaɖeɣi esi meyi ɖadzi ha le teƒeteƒewo hetrɔ gbɔ la, megadze Biblia xexlẽ gɔme ake. Togbɔ be nyemese nu siwo mexlẽ la ƒe akpa gãtɔ gɔme o hã la, meƒo nya ta be xexea ƒe nuwuwu anya ɖo vɔ.

Esime menɔ Biblia xlẽm la, meva kpɔe be ɣeaɖeɣi la, Yesu tsi nu dɔ ŋkeke 40 le gbedadaƒo. (Mateo 4:1, 2) Megblɔ na ɖokuinye be ne nye hã mewɔ nenema ke la, ɖewohĩ Mawu aɖe ame si wònye la afiam, eya ta meɖo ŋkeke. Esi wòsusɔ kwasiɖa eve ne madze nye nutsitsidɔa gɔme la, Yehowa Ðasefo eve va ƒo ʋɔ nam, eye mena woge ɖe eme abe ɖe menɔ mɔ kpɔm na wo xoxo ene. Mekpɔ Ðasefoawo dometɔ ɖeka si ŋkɔe nye Jacques la ŋkume hebiae be, “Aleke míawɔ anya be míele xexe sia ƒe ŋkeke mamlɛawo me?” Eʋu eƒe Biblia eye wòxlẽ 2 Timoteo 3:1-5 tsɔ ɖo nyabiasea ŋu nam. Megalɔ nyabiase gbogbo aɖewo kɔ ɖe wo dzi, eye woƒe nyaŋuɖoɖo siwo wotu ɖe Ŋɔŋlɔawo dzi siwo me susu le eye wo me kɔ la wɔ dɔ ɖe dzinye ŋutɔ. Le sasrãkpɔ ʋɛ aɖewo megbe la, meva de dzesii be megahiã be matsi nu adɔ o.

Ðasefoawo te Biblia sɔsrɔ̃ kplim edziedzi. Emegbe mekpa nye ɖa legbea eye meva nɔ kpekpeawo katã dem le Fiaɖuƒe Akpata me. Ale si amewo xɔm alɔ evee le kpekpe siawo me la gana meka ɖe edzi be meke ɖe nyateƒea ŋu azɔ.

Gake hafi mate ŋu awɔ nu siwo srɔ̃m menɔ le Biblia me dzi la, ele be mawɔ tɔtrɔ gãwo le nye agbenɔnɔ ŋu. Le kpɔɖeŋu me, ele be madzudzɔ atike vɔ̃ɖiwo zazã kple agbe gbegblẽ nɔnɔ. Azɔ hã, ele be maɖe asi le ɖokuiŋudzedze ƒe nɔnɔmea ŋu eye matsɔ ɖe le eme na ame bubuwo geɖe wu. Esi menye dzilaɖekɛ ta la, eva hiã be masrɔ̃ ale si makpɔ vinye eveawo ƒe seselelãme kple gbɔgbɔ me nuhiahiãwo gbɔ. Eya ta meɖe asi le nye hadzidzidɔa ŋu eye meva nɔ dɔ si ƒe fetu ɖiɖi wu kura la wɔm.

Tɔtrɔ siawo katã wɔwɔ menɔ bɔbɔe o. Esime menɔ agbagba dzem be maɖe asi le atike vɔ̃ɖiwo zazã ŋu la, asiɖeɖe le nu muame mawo ŋu ƒe kuxiwo va nɔ fu ɖem nam, eye medzudzɔna sẽe ko agadze egɔme. (Romatɔwo 7:19, 21-24) Asiɖeɖe le agbe gbegblẽ nɔnɔa ŋu koŋue sesẽ nam ale gbegbe. Nye dɔ yeyea hã nana ɖeɖi tea ŋunye, eye fetua mede ame dzi kura o. Exɔa ɣleti etɔ̃ hafi metea ŋu kpɔa ga si mekpɔna le gaƒoƒo eve me esime menye hadzila.

Gbedodoɖa kpe ɖe ŋunye medo vevie nu le tɔtrɔ sesẽ siawo wɔwɔ me. Mekpɔe hã be Biblia xexlẽ edziedzi ɖe vi nam. Mawunyakpukpui aɖewo koŋ de dzi ƒo nam ale gbegbe. Wo dometɔ ɖekae nye 2 Korintotɔwo 7:1, si de dzi ƒo na Kristotɔwo be ‘woakɔ wo ɖokui ŋu tso ŋutilã kple gbɔgbɔ ƒe ɖiƒoƒo sia ɖiƒoƒo me.’ Mawunyakpukpui bubu si na mekpɔ kakaɖedzi be mate ŋu aɖe asi le nye numame gbegblẽawo ŋue nye Filipitɔwo 4:13, si gblɔ be: “Metea ŋu wɔa nuwo katã to ame si doa ŋusẽm la dzi.” Yehowa Mawu ɖo nye gbedodoɖawo ŋu, eye wòkpe ɖe ŋunye mese Biblia me nyateƒea gɔme mlɔeba eye metsɔ wo de dɔwɔwɔ me. Esia ʋãm metsɔ nye agbe ɖe adzɔgbe nɛ. (1 Petro 4:1, 2) Mexɔ nyɔnyrɔ zu Yehowa Ðasefo le ƒe 1997 me.

Meka ɖe edzi be ne ɖe meyi nye agbenɔnɔ tsãtɔ dzi la, anye ne meku xoxo. Gake fifia, meva le dzidzɔ vavãtɔ kpɔm! Srɔ̃nye lɔlɔ̃a Elvie nye yayra gã aɖe nam. Mí ame evea míenye ɣeyiɣiawo katã ƒe subɔlawo eye míesea vivi na Biblia fiafia amewo ŋutɔ. Esia nana mekpɔa dzidzɔ kple dzidzeme geɖe. Medaa akpe na Yehowa ale gbegbe ɖe ale si wòhem va eɖokui gbɔ ta.—Yohanes 6:44.