Míaƒe ƒomea tso Tonga, si nye dukɔ si le Pasifik ƒua ƒe anyieheɣetoɖoƒe, eye ƒukpo 170 aɖewoe le eme. Nu mede mía dzi le Tonga o, eye elektrikkaɖi kple ʋu menɔ mía si o. Gake pɔmpi nɔ míaƒe aƒe me, eye míenyia koklo ʋɛ aɖewo. Le mɔkeɣiwo la, nye kple fonye kple nɔvinyeŋutsu míekpena ɖe mía tɔ ŋu le ƒomea ƒe agble me, afi si míedo akɔɖu, te, mankani kple agbeli ɖo. Fofonye dzraa agblemenuku siawo eye wògawɔa dɔ klukluklui aɖewo hã tsɔ kpɔa ƒomea dzi. Abe ƒukpoa dzi nɔla bubuwo ene la, míaƒe ƒomea dea bubu gã aɖe Biblia ŋu eye míedea tsɔtsi edziedzi. Ke hã míexɔe se be mɔ si ko dzi míato be agbea nadze edzi na mí ye nye be míaʋu ayi dukɔ si me nu de amewo dzi le la me.

 Esi mexɔ ƒe 16 la, nyruinye wɔ ɖoɖo míaƒe ƒomea ʋu yi California le United States. Tɔtrɔ ɖe nɔnɔmeawo ŋu le afi ma sesẽ na mí ŋutɔ! Togbɔ be ganyawo va de mía dzi vie wu hã la, míenɔ nuto dahe aɖe si me nu vlo wɔwɔ kple atike vɔ̃ɖi zazã xɔ aƒe ɖo la me. Zi geɖe la, míesea tu ƒe ɖiɖi le zã me eye míaƒe aƒelikawo vɔ̃na na adzogliwo. Ame geɖe tsɔa tu ɖe asi be yewoatsɔ akpɔ yewo ɖokui ta alo atsɔ atsi nyaʋiʋliwo nu. Tukpe aɖe va lɔ akɔta nam le nyaʋiʋli mawo dometɔ aɖe me eye tukpea gale afi ma va se ɖe fifia.

 Esi menɔ sekɛndrisuku (lycée) la, medi be manɔ abe sɔhɛ bubuawo ene. Eya ta vivivi la, meva ƒo ɖokuinye ɖe aglotutu siwo gbɔ eme, aha tsu nono, ŋutasẽnuwɔwɔ kple atike vɔ̃ɖiwo zazã me. Eteƒe medidi o, meva tsɔ kokein nono ɖo dɔe. Be mate ŋu aƒle atike vɔ̃ɖiwo la, mete fififi. Togbɔ be míaƒe ƒomea doa vevie tsɔtsi dede hã la, nyemesrɔ̃ naneke le tsɔtsi si akpe ɖe ŋunye be manɔ te ɖe ale si hanyetiwo ƒoa nya ɖe nunye be mawɔ nu gbegblẽ la nu o. Zi geɖe la, woléam ɖe nye nu vlo wɔwɔwo ta. Nyemegava nɔ ta kpɔm na nye agbea o! Eye mlɔeba, meva kpɔ ɖokuinye le gaxɔ me.

 Gbe ɖeka le 1997 me esime menɔ gaxɔ me la, ŋutsu aɖe si hã nye gamenɔla la kpɔe be melé Biblia ɖe asi. Kristmas dzie, eye Tongatɔ geɖe bua Kristmas ɖugbe be enye ŋkeke si le kɔkɔe ŋutɔ. Ebiam nenye be menya nu si tututu Biblia gblɔ tso Kristo ƒe dzidzi ŋu, gake nyemenya naneke tso eŋu o. Etsɔ Biblia me nuŋlɔɖi si ku ɖe Yesu dzidzi ŋu la fiam, eye mekpɔe be Biblia meƒo nu tso kɔnu gbogbo siwo míewɔna le Kristmas ɖuɣi la kura gɔ̃ hã ŋu o. (Mateo 2:1-12; Luka 2:5-14) Nye nu koe ku, eye meva nɔ eŋu bum be nu kawo gbegbee gale Biblia me siwo nyemenya o hã. Ŋutsua nɔ kwasiɖa sia kwasiɖa ƒe kpekpe si Yehowa Ðasefo wɔna le gakpɔa me la dem, eye meɖoe be manɔ yiyim kplii. Wonɔ Biblia-gbalẽ si nye Nyaɖeɖefia me dzrom. Togbɔ be nyemese nu geɖe gɔme o hã la, mede dzesii be nu sia nu si fiam wonɔ la tso Biblia me.

 Esi Ðasefoawo doe ɖe gbɔnye be yewoanɔ Biblia srɔ̃m kplim la, melɔ̃ kple dzidzɔ. Ɣemaɣie meva srɔ̃e zi gbãtɔ le Biblia me be Mawu do ŋugbe be anyigba ava zu paradiso le etsɔme. (Yesaya 35:5-8) Eme va kɔ nam kɔtɛe be hafi nye nu nadze Mawu ŋu la, ele be mawɔ tɔtrɔ gãwo le nye agbe me. Meva de dzesii be Yehowa Mawu maɖe mɔ nam be mage ɖe Paradisoa me ne nɔnɔme gbegblẽ mawo gakpɔtɔ le asinye o. (1 Korintotɔwo 6:9, 10) Eya ta meɖoe kplikpaa be maɖe asi le dziku helĩhelĩ dodo ŋu, madzudzɔ atama nono, aha tsu nono kple atike vɔ̃ɖiwo zazã.

 Hafi nye gaxɔmenɔɣia nawu enu la, dziɖuɖua na woɖem yi gakpɔ bubu me le ƒe 1999 me. Eya ta anɔ abe ƒe ɖeka kple edzivɔ ene la, kadodo aɖeke megava nɔ nye kple Ðasefoawo dome o. Gake meɖoe kplikpaa be mayi edzi anɔ tɔtrɔwo wɔm. Le ƒe 2000 me la, United States dziɖuɖua megaɖe mɔ nam be makpɔtɔ anɔ dukɔa me o, eye wogbugbɔ ɖom ɖe Tonga.

 Esi meva ɖo Tonga la, medi Yehowa Ðasefowo vevie, eye megayi Biblia sɔsrɔ̃a dzi. Nu siwo srɔ̃m menɔ la dzɔ dzi nam ŋutɔ, eye esi mekpɔ ale si Ðasefo siwo le ƒukpoa dzi tua woƒe nufiafiawo katã ɖe Ŋɔŋlɔawo dzi abe ale si Ðasefo siwo le United States hã wɔnɛ ene la, ewɔ dɔ ɖe dzinye ŋutɔ.

 Tɔnye xɔ ŋkɔ le nutoa me elabena ɖoƒe vevi aɖe nɔ esi le tsɔtsi si wòdena le Tonga la me. Eya ta le gɔmedzedzea me la, ewɔ moyaa na nye ƒomea be menɔ ha dem kple Yehowa Ðasefowo eye esia ku dzi na wo ŋutɔ. Gake emegbe la, dzinyelawo va kpɔ dzidzɔ be Biblia ƒe mɔfiamewo nɔ kpekpem ɖe ŋunye be menɔ asi ɖem le nye nɔnɔme gbegblẽawo ŋu.

 Tɔtrɔ siwo wɔwɔ sesẽ nam wu la dometɔ ɖekae nye be madzudzɔ aha aɖe si mía detɔwo nona le mɔ gbegblẽ nu la nono. Tonga ŋutsu geɖe zãa gaƒoƒo gbogbowo kwasiɖa sia kwasiɖa tsɔ noa aha muame si ŋkɔe nye kava; ataditi ƒe ke ye wotsɔ ɖanɛ. Esi metrɔ va mía de la, nye hã meyia kavanoƒe zã sia zã kloe heva nɔa kava nom va se ɖe esime meyi ɖi me. Nu si gbɔ kuxia tso ƒe akpa aɖee nye ale si meva nɔ ha dem kple xɔlɔ̃ siwo menɔa agbe ɖe Biblia ƒe nufiafiawo nu o. Mlɔeba Ðasefoawo kpe ɖe ŋunye mekpɔe be agbe si nɔm mele la medze Mawu ŋu o. Eya ta mewɔ tɔtrɔwo ale be nye nu nadze Mawu ŋu eye wòayram.

 Mete Yehowa Ðasefowo ƒe kpekpewo katã dede. Hadede kple ame siawo siwo le agbagba dzem be yewoƒe nu nadze Mawu ŋu la kpe ɖe ŋunye be meɖu tetekpɔwo dzi. Le ƒe 2002 me la, mexɔ nyɔnyrɔ zu Yehowa Ðasefo.

 Mawu ƒe dzigbɔɖi si ŋu 2 Petro 3:9 ƒo nu tsoe la ɖe vi nam. Afi ma gblɔ be: ‘Yehowa gbɔa dzi ɖi na mi, elabena medi be ame aɖeke natsrɔ̃ o, ke boŋ edi be mɔnukpɔkpɔ nasu amewo katã si woatrɔ dzi me.’ Ðikeke mele eme o be Mawu ate ŋu atsrɔ̃ xexe gblẽku sia xoxoxo hafi, gake eɖe mɔ wòkpɔtɔ li, ale be amewo abe nye ene nava nɔ ƒomedodo nyui me kpli ye. Edzɔ dzi nam be Yehowa ate ŋu azã nye hã atsɔ akpe ɖe ame bubuwo ŋu be woava nyae.

 Le Yehowa ƒe kpekpeɖeŋu me la, megava kpɔ ta na nye agbea, si wɔe be nye agbe dome megblẽ keŋkeŋ o. Nyemegafia fi be makpɔ ga ɖe atike vɔ̃ɖiwo ƒeƒle kple nu gbegblẽ bubuwo wɔwɔ ŋu o. Ke boŋ medzea agbagba be makpe ɖe ame bubuwo ŋu be woawo hã nava zu Yehowa xɔlɔ̃wo. Nye hadede kple Yehowa Ðasefowo wɔe be meva ke ɖe nɔvinyɔnu nyui aɖe si ŋkɔe nye Tea ŋu, eye nye kplii míeɖe mía nɔewo. Mía kple mía vi ŋutsuvi suea míele dzidzɔ kpɔm ŋutɔ le míaƒe ƒomea me. Mí katã míefiaa nu amewo tso nya si Biblia gblɔ be amegbetɔwo ava nɔ agbe tegbee le ŋutifafa me le paradiso me la ŋu.