Le ƒe 2017 mea, Ðasefo 12 ɖo tɔdziʋu tso Nicaragua ƒe ƒuta nuto si woyɔna be Mosquito (Miskito) me yi kɔƒe si nye La Cruz de Río Grande me. Woŋlɔ ɖe woƒe tɔdziʋua dzi be Sturi Yamni. Ðasefo siwo nɔ tɔdziʋua me dometɔ ɖeka si ŋkɔe nye Stephen gblɔ be, “Míaƒe taɖodzinue nye be míavae de dzi ƒo na Ðasefo ʋɛ siwo le nuto saɖeagaa me eye míakpe ɖe wo ŋu woaɖe gbeƒã na ame gbogbo siwo le woƒe nutoa me.”

 Ðasefo 12-awo dze woƒe mɔzɔzɔa gɔme tso du si nye Pearl Lagoon me va to du si nye Río Grande de Matagalpa va do ɖe La Cruz de Río Grande. Woƒe mɔzɔzɔ bliboa ƒe didimee nye kilometa 200. Womenya be gɔmesese tɔxɛ aɖe ava nɔ nu si woŋlɔ ɖe tɔdziʋua dzi la ŋu na kɔƒea me nɔlawo, siwo le tɔa to o. Nu si woŋlɔ ɖe tɔdziʋua dzi la gɔmee nye “Nya Nyuie” le Miskito-gbe me. Le mɔa zɔzɔ gaƒoƒo 12 megbea, wova ɖo La Cruz de Río Grande. Ðasefo ade siwo le kɔƒea me la xɔ wo nɔviawo kple dzidzɔ.

 Zã ma mea, afɔku aɖe dzɔ. Ahom sesẽ aɖe tu eye tsi gã aɖe dza si na be Río Grande de Matagalpa ƒe tɔwo ɖɔ ale gbegbe. Le gaƒoƒo ʋɛ aɖewo megbea, tɔa gbagba eye wòyi edzi nɔ ɖɔɖɔm hena ŋkeke eve. Tsia ɖe Fiaɖuƒe Akpata kple aƒe gbogbo siwo le La Cruz. Ðasefo siwo va afi sia kpe ɖe kɔƒea me tɔwo ŋu be woado le woƒe aƒeawo me. Wo dometɔ akpa gãtɔ va tsi dziƒoxɔ aɖe si nye Ðasefo aɖe tɔ la me ŋkeke etɔ̃.

 Le ŋkeke etɔ̃a gbea, La Cruz ƒe dudzikpɔla yi Ðasefoawo gbɔ va bia wo be woava kpe ɖe yewo ŋu. Esi wònye be Ðasefoawo ƒe tɔdziʋua ŋu koe ŋusẽ le wòate ŋu ato tɔ si ɖɔ nɔ sisim bababa dzi ta la, dudzikpɔlaa bia tso wo si be woazãe atsɔ akɔ kpekpeɖeŋunadɔwɔlawo ayi kɔƒe bubu siwo ŋu tsiɖɔɖɔa gblẽ nu le la me be woavae kpe ɖe ameawo ŋu. Ðasefoawo lɔ̃ faa be yewoawɔe.

 Esi ŋu kea, Ðasefo etɔ̃ kple kpekpeɖeŋunadɔwɔlaawo dze mɔ. Stephen gblɔ be: “Tsia nɔ sisim eteƒe mekɔ o. Tsia lɔ ati gagã siwo tsiɖɔɖɔa ho la ɖe nu va nɔ yiyim, eye tsia nɔ sisim sesĩe menye nya vi kura o.” Togbɔ be mɔzɔzɔ to tɔa dzi menɔ bɔbɔe o hã, wote ŋu dze agbagba ku tɔdziʋua yi kɔƒe etɔ̃ me.

 Ðasefo etɔ̃awo zã mɔnukpɔkpɔa tsɔ fa akɔ na kɔƒea me tɔwo, elabe wohiã akɔfafa vevie. Ðasefoawo ma ƒe 2017 Nyɔ! si sɔ nyuie, si ƒe tanyae nye “Ne Afɔku Aɖe Dzɔ—Nu Siwo Míawɔ Be Míatsi Agbe” hã na wo.

 Kɔƒe siwo le tɔa to me nɔlawo kpɔ dzidzɔ ɖe kpekpeɖeŋu kple Biblia me nya siwo Ðasefoawo tsɔ de dzi ƒo na wo la ŋu ale gbegbe. Wo dometɔ aɖewo gblɔ be, “Wolɔ̃ faa kpe ɖe mía ŋu le ɣeyiɣi sesẽwo me.” Bubuwo hã gblɔ be, “Wolɔ̃ wo haviwo ŋutɔ.” Esi kɔƒeawo me tɔ geɖe kpɔ ale si Ðasefoawo kpe ɖe wo nɔvi Ðasefowo kple ame bubuwo ŋu la, wogava nɔ didim vevie wu tsã be yewoaɖo to Biblia me gbedeasi fakɔnamea.