Mme Ntiense Jehovah ẹsikama nsio nsio Bible ẹkpep n̄kpọ. Edi Bible emi mmọ ẹmade ẹkan edi Edisana N̄wed Abasi—Edikabade Eke Obufa Ererimbot. Ntak emi mmọ ẹmade Bible emi edi ke ẹsịn enyịn̄ Abasi ke nnennen itie emi enye okpodude, ẹkabade enye enen onyụn̄ an̄wan̄a owo. Enye odu ke nsio nsio usem.

•   Ẹsịn enyịn̄ Abasi ke Bible emi. Ndusụk mme akabade Bible inọhọ Abasi ubọn̄. Ke uwụtn̄kpọ, enyene Bible kiet emi ẹwetde ẹbe enyịn̄ owo 70 emi ẹkenyenede ubọk ke ndisio Bible oro. Edi mmọ ẹkokoi ẹsio enyịn̄ Jehovah Abasi emi akam enyenede Bible ẹfep!

   Edi idịghe ntre ye Edikabade Eke Obufa Ererimbot sia ẹdọn̄ enyịn̄ Jehovah ke nnennen itie emi enyịn̄ oro okodude ke ata akpa Bible. Edi owo isiakke enyịn̄ mbon oro ẹkekabarede Bible oro.

•   Ẹkabade Bible emi enen. Idịghe kpukpru Bible ke ẹkabade nnennen se ikodude ke ata akpa Bible. Ke uwụtn̄kpọ, ẹkabade Matthew 5:22 ke Bible kiet ntem: “Owo ekededi eke ọdọhọde ete, Afo ndisịme, esesịn idem ke ufen hell eke asakde ikan̄.” Edi se ikesịnede ke itien̄wed oro ke ata akpa Bible edi “Gehenna,” idịghe “hell.” Etie nte se ikanamde mbon emi ẹkekabarede Bible oro ẹsịn “hell” edi sia mmọ ẹkenịm ke ẹyetụhọde mme idiọkowo ke ikan̄ hell ke nsinsi. Edi Bible ikpepke utọ n̄kpọ oro. Ntak edi oro ẹkabarede itie oro nnennen nnennen ke Edikabade Eke Obufa Ererimbot ntem: “Owo ekededi eke ọdọhọde ete, ‘Afo ata ndisịme owo!’ odot ẹsịn enye ke Gehenna eke asakde ikan̄.”

•   Ẹkabade Bible emi an̄wan̄a owo. Akpana Bible oro ẹtịmde ẹkabade enen, emem ndikot, onyụn̄ ọsọp an̄wan̄a owo. Ke uwụtn̄kpọ, edieke ẹkabarede Philippi 1:8 ẹtiene nte ẹbonde ikọ ke usem Greek, edidi “utọ nsia emi Christ Jesus enyenede.” Ndikabade enye ntre ke Ikọ Efịk ikpayakke itien̄wed oro an̄wan̄a owo. Ntak edi oro Edikabade Eke Obufa Ererimbot akabarede enye nte “utọ esịt ima emi Christ Jesus enyenede.”

 Edikabade Eke Obufa Ererimbot esịn enyịn̄ Abasi ke mme itie emi akpanade enyịn̄ oro esịne, ẹkabade enye enen onyụn̄ an̄wan̄a owo. Edi enyene n̄kpọ en̄wen emi anamde inen̄ede ima Bible emi. Owo inyamke-nyam enye, ndien emi anam ata ediwak owo ẹkeme ndikot enye ke usem mmọ—esịnede mbon emi mîkekereke-kere ke imekeme ndinyene Bible ke usem mmimọ.