Mme Ntiense Jehovah ẹsin̄wam mme owo ke ini afanikọn̄ etịbede. Bible ọdọhọ ke Galatia 6:10 ete: “Adan̄a nte inyenede ifet, ẹyak nnyịn inam se ifọnde inọ kpukpru owo, edi akpan akpan mmọ emi ẹbuanade n̄kpọ ye nnyịn ke mbuọtidem.” Ke ntak emi, isin̄wam kpukpru owo, m̀mê mmọ ẹdi Mme Ntiense Jehovah m̀mê idịghe. Mbon emi afanikọn̄ esịmde ẹsinen̄ede ẹyom ndọn̄esịt ye Ikọ Abasi. Imesinam emi n̄ko inọ mmọ.​—2 Corinth 1:3, 4.

 N̄kpọ ama etịbe, mbiowo emi ẹdude ke ebiet emi n̄kpọ emi etịbede ẹsiyom mbon emi ẹsidụkde mbono esop ke esop mmọ man ẹfiọk m̀mê n̄kpọ anam mmọ ẹnyụn̄ ẹn̄wam mmọ. Ekem mbiowo ẹyenam ọfis Mme Ntiense Jehovah ke idụt mmọ ẹdiọn̄ọ nte n̄kpọ etiede ẹnyụn̄ ẹtịn̄ se mmọ ẹnamde.

 Edieke n̄kpọ emi okponde akan mbiowo oro, Otu Emi Ẹsede Ẹban̄a Utom Mme Ntiense Jehovah ẹyenọ n̄kpọ ẹda ẹken̄wam mme owo do. Nte mme Christian ke eyo mme apostle ẹkesin̄wamde ikọt mmọ edi oro ke ini akan̄. (1 Corinth 16:1-4) Ọfis nnyịn ẹsimek mme owo ẹdọn̄ ke Kọmiti Unọ Un̄wam man ẹn̄wam mme owo. Mme Ntiense ke ebiet en̄wen ẹsida ini mmọ ye se mmọ ẹnyenede ẹn̄wam mme owo ke ebiet emi afanikọn̄ etịbede.​—Mme N̄ke 17:17.

 Ẹsida enọ imaesịt emi ẹsinọde ẹsọk ọfis Mme Ntiense Jehovah ẹnam nsio nsio n̄kpọ. Kiet ke otu oro ẹdi ndin̄wam mme owo ke ini afanikọn̄. (Utom 11:27-30; 2 Corinth 8:13-15) Owo isikpehe mbon emi ẹdade ini mmọ ẹn̄wam mme owo. Ke ntre, kpukpru okụk emi ọfis ẹnọde ke ini afanikọn̄ ke ẹsida ẹn̄wam mme owo. Nnyịn isidaha okụk emi mme owo ẹnọde ke imaesịt inam mbubru.​—2 Corinth 8:20.