Ida kpukpru se inịmde ito Bible. Nte Bible an̄wan̄ade nnyịn aka imesikpụhọde ndusụk se inịmde. a

 Se isikpụhọrede emi ekem ye se Bible etịn̄de ke Mme N̄ke 4:​18. Itie oro ọdọhọ ete: “Usụn̄ ndinen owo ebiet nyayama un̄wana emi akade-ka iso ayama tutu esịm ufọt uwemeyo.” Ukem nte un̄wana esiyamade sụn̄sụn̄, Abasi esinam Ikọ Esie an̄wan̄a nnyịn sụn̄sụn̄ ke ekem ini esie. (1 Peter 1:​10-​12) Nte Bible ama eketetịn̄, Enye anam Ikọ Esie enen̄ede an̄wan̄a nnyịn ke “utịt ini” emi.​—Daniel 12:4.

 Ikpanaha esikpa nnyịn idem m̀mê afịna nnyịn ke ini ẹkpụhọrede se ikesinịmde. Ndusụk ini se Abasi ekesiduakde ndinam ikesin̄wan̄ake ndusụk ikọt esie ke eset ndien ama oyom mmọ ẹdiọn̄ọ se Abasi akaduakde ndinam.

•   Moses ama oyom ndinyan̄a nditọ Israel n̄kpọ nte isua 40 mbemiso ini oro Abasi ekenịmde.​—Utom 7:​23-​25, 30, 35.

•   Prọfesi oro akaban̄ade nte Messiah edikpade ye nte ẹdinamde enye eset ikan̄wan̄ake mme apostle.​—Isaiah 53:​8-​12; Matthew 16:21-​23.

•   Ekikere emi ndusụk mme Christian ke eyo mme apostle ẹkenyenede ẹban̄a ini emi “usen Jehovah” edidide ikenenke.​—2 Thessalonica 2:​1, 2.

 Nte ini akade Abasi ama an̄wam mmọ ẹnen̄ede ekikere oro, ndien nnyịn inyụn̄ ibọn̄ akam Abasi aka iso an̄wam nnyịn inam ntre n̄ko.​—James 1:5.