Nnyịn Mme Ntiense Jehovah imesidomo ndidu uwem nte Jesus ekekpepde mbet esie kpa nte mme apostle esie ẹkedude. Se n̄kpọ ifan̄ emi nnyịn inịmde mi.

1.   Abasi. Nnyịn ituak ibuot inọ ata Abasi emi okon̄de akan ke ofụri ererimbot, Andibot kpukpru n̄kpọ. Enye ekere Jehovah. (Psalm 83:18; Ediyarade 4:11) Enye edi Abasi Abraham, Moses, ye Jesus.—Exodus 3:6; 32:11; John 20:17.

2.   Bible. Nnyịn ida Bible nte Ikọ Abasi emi ẹkedade spirit Abasi ẹwet ẹnọ mme owo. (John 17:17; 2 Timothy 3:16) Kpukpru se nnyịn inịmde oto n̄wed 66 emi ẹdude ke Bible, oro edi, se idude ke “Akani Testament” ye “Obufa Testament.” Professor Jason D. BeDuhn etịn̄ nte nnyịn idade Bible. Enye ọkọdọhọ ke Mme Ntiense Jehovah ẹda “se mmọ ẹnịmde ke akpanikọ ye mme edinam mmọ nnennen nnennen ẹto Bible ye unana ẹdibem iso ntie mbiere se ikpenyenede ndidu do.” a

    Okposụkedi emi inịmde kpukpru se idude ke Bible, nnyịn idịghe mbon emi ẹsisọn̄ọde ẹyịre ke se mmọ ẹnịmde toto ke eset, iyomke ndikpụhọde. Nnyịn inịm ke ndusụk itie ke Bible ẹda ẹban̄a n̄kpọ.—Ediyarade 1:1.

3.   Jesus. Nnyịn imesidomo ndinam se Jesus Christ ekekpepde inyụn̄ itiene uwụtn̄kpọ esie. Nnyịn ida enye nte Andinyan̄a nnyịn ye Eyen Abasi. (Matthew 20:28; Utom 5:31) Ntre, nnyịn idi Christian. (Utom 11:26) Edi nnyịn imokụt ke Bible, ke Jesus idịghe Ata Ọkpọsọn̄ Abasi, ndien itie ndomokiet idụhe ke Bible emi owụtde ke Abasi edi Ita-ke-Kiet.—John 14:28.

4.   Obio Ubọn̄ Abasi. Enye edi ata ata ukara emi odude ke heaven, idụhe ke esịt owo. Ukara emi eyesịm isọn̄ emi, osio ukara owo efep, onyụn̄ anam isọn̄ emi etie nte Abasi oyomde. (Daniel 2:44; Matthew 6:9, 10) Emi eyetịbe ke mîbịghike, koro mme prọfesi Bible owụt ke nnyịn idu uwem ke “mme akpatre usen.”—2 Timothy 3:1-5; Matthew 24:3-14.

    Jesus edi Edidem Obio Ubọn̄ Abasi emi odude ke heaven. Enye ọkọtọn̄ọ ndikara ke heaven toto ke 1914.—Ediyarade 11:15.

5.   Edinyan̄a. Jesus ndikakpa nnọ nnyịn osio nnyịn ke ufụn idiọkn̄kpọ ye n̄kpa. (Matthew 20:28; Utom 4:12) Ana nnyịn ibuọt idem ye Jesus, ikabade esịt, idu eti uwem, inyụn̄ ina baptism man ikeme ndidia ufọn nto n̄kpa Jesus. (Matthew 28:19, 20; John 3:16; Utom 3:19, 20) Nte owo esinamde n̄kpọ ke ẹsida ẹdiọn̄ọ m̀mê enye enyene mbuọtidem. (James 2:24, 26) Abasi edinyan̄a nnyịn ke ntak ‘mfọnido esie oro owo mîdotke,’ idịghe ke ntak ọkpọsọn̄ utom emi nnyịn anamde.—Galatia 2:16, 21.

6.   Heaven. Jehovah Abasi, Jesus Christ, ye nti angel ẹdu ke heaven. b (Psalm 103:19-21; Utom 7:55) Ẹyenam ekpri ibat owo, oro edi, owo 144,000 ẹset ẹka heaven ẹketiene Jesus ẹkara ke Obio Ubọn̄ Abasi.—Daniel 7:27; 2 Timothy 2:12; Ediyarade 5:9, 10; 14:1, 3.

7.   Isọn̄. Abasi okobot isọn̄ emi ọnọ mme owo ẹdụn̄. (Psalm 104:5; 115:16; Ecclesiastes 1:4) Mbon oro ẹkopde item Abasi ididọn̄ọke, Abasi oyonyụn̄ anam mmọ edụn̄ ke Paradise isọn̄ ke nsinsi.—Psalm 37:11, 34.

8.   Idiọkn̄kpọ ye ufen. Emi ọkọtọn̄ọ ke ini angel Abasi kiet ọkọsọn̄de ibuot ye Abasi. (John 8:44) Nsọn̄ibuot emi akanam ẹkot angel emi “Satan” ye “Devil.” Satan ama anam akpa ete ye eka nnyịn ẹtiene enye ẹsọn̄ ibuot ye Abasi, emi anam nditọ mmọ ẹtiene ẹnam idiọkn̄kpọ, ẹbọ ufen, ẹnyụn̄ ẹkpan̄a. (Genesis 3:1-6; Rome 5:12) Satan ama osu ediwak nsu odori Abasi. Ntak edi oro Abasi ayakde mme owo ẹbọ ufen ẹnyụn̄ ẹkpan̄a man owụt ke Satan edi osu nsu, edi Abasi idiyakke emi aka iso ke nsinsi.

9.   N̄kpa. Owo ama akpa, akpa, ikaha ebiet ndomokiet. (Psalm 146:4; Ecclesiastes 9:5, 10) Owo isikaha ikan̄ hell ikesịne ibọ ufen ke ini akpade.

    Abasi ayanam ata ediwak biliọn owo ẹset ẹfiak ẹdidu uwem. (Utom 24:15) Edieke owo esetde, edi esịn ndidu uwem nte Abasi oyomde, Abasi oyosobo enye efep ke nsinsi nsinsi, enye idisetke aba tutu amama.—Ediyarade 20:14, 15.

10.   Ubon. Nnyịn isidọhọ ediwak iban; owo kiet esidọ n̄wan kiet m̀mê ebe kiet, kpa nte Abasi okoyomde. Nnyịn isisioho ndọ isinyụn̄ iwọrọke ndọ. N̄kukụre ini emi isinamde emi edi ke ini ebe m̀mê n̄wan nnyịn esịnde efịbe. (Matthew 19:4-9) Imenen̄ede inịm ke edieke owo anamde se Bible etịn̄de aban̄a ubon, ke ufọk esie eyenem.—Ephesus 5:22–6:1.

11.   Nte isikponode Abasi. Nnyịn isikamake cross m̀mê edisọi mbiet ekededi ikpono Abasi. (Deuteronomy 4:15-19; 1 John 5:21) Ndusụk usụn̄ emi isikponode Abasi edi emi:

    •   Imesibọn̄ akam inọ Abasi.—Philippi 4:6.

    •   Imesikot inyụn̄ ikpep Bible.—Psalm 1:1-3.

    •   Imesitie ikere se ikpepde ke Bible.—Psalm 77:12.

    •   Imesisop idem ọtọkiet ibọn̄ akam, ikpep Bible, ikwọ ikwọ, ineme nneme emi owụtde adan̄a nte ibuọtde idem ye Abasi, inyụn̄ in̄wam kiet eken ẹka iso ẹnam n̄kpọ Abasi.—Colossae 3:16; Mme Hebrew 10:23-25.

    •   Imesikwọrọ “eti mbụk obio ubọn̄.”—Matthew 24:14.

    •   Imesin̄wam mbon emi ẹyomde un̄wam.—James 2:14-17.

    •   Imesibọp inyụn̄ ise iban̄a Mme Ufọkmbono Obio Ubọn̄ nnyịn, ye mme ofis oro isitiede inam utom emi ẹsin̄wamde ẹkpep mme owo Bible ke ofụri ererimbot.—Psalm 127:1.

    •   Imesitiene in̄wam mbon oro oyobio, unyekisọn̄ ye mme n̄kpọ ntre ọnọmọde.—Utom 11:27-30.

12.   Nte esop nnyịn etiede. Ẹbahade nnyịn ẹdọn̄ ke nsio nsio esop. Irenowo emi ikotde mbiowo, ẹse ẹban̄a esop kiet kiet. Mbiowo emi isidaha idem ke n̄kpọ ikan mbon eken ke esop, owo isinyụn̄ ikpehe mmọ okụk. (Matthew 10:8; 23:8) Nnyịn isikpehe tith isinyụn̄ isịnke collection. (2 Corinth 9:7) Isida okụk emi mme owo ẹtịpde ke imaesịt inam kpukpru n̄kpọ nnyịn.

     Otu Emi Ẹsede Ẹban̄a Utom Mme Ntiense Jehovah, ẹsinọ ndausụn̄ ke kpukpru se Mme Ntiense Jehovah ke ofụri ererimbot ẹnamde. Mmọ ẹdu ke ibuot itieutom Mme Ntiense Jehovah.—Matthew 24:45.

13.   Se inamde idiana kiet. Kpukpru nnyịn inịm ukem ukem n̄kpọ. (1 Corinth 1:10) Nnyịn isiyakke usem, idụt, ye se owo edide ọtọ ubahade ke otu nnyịn. (Utom 10:34, 35; James 2:4) Kpa ye oro idianade kiet, nnyịn kiet kiet isinam ubiere idem nnyịn. Isida se isikpepde ke Bible ibiere n̄kpọ.—Rome 14:1-4; Mme Hebrew 5:14.

14.   Nte idude uwem. Imesinen̄ede ima mme owo. (John 13:34, 35) Nnyịn isinamke n̄kpọ emi Abasi asuade, ke uwụtn̄kpọ, nnyịn isisịnke iyịp ke idem. (Utom 15:28, 29; Galatia 5:19-21) Nnyịn idi mbon emem isinyụn̄ itieneke in̄wana ekọn̄. (Matthew 5:9; Isaiah 2:4) Imesikpono ukara obio nnyịn inyụn̄ inịm ibet mmọ adan̄a nte ibet mîkpanke nnyịn ndinịm ibet Abasi.—Matthew 22:21; Utom 5:29.

15.   Nte isinamde n̄kpọ ye mme owo. Jesus ọkọdọhọ ete: “Afo enyene ndima mbọhọidụn̄ fo nte idemfo.” Enye ọkọdọhọ n̄ko ke mbet imọ “idịghe [mbon] ererimbot.” (Matthew 22:39; John 17:16) Nnyịn imesidomo ndinam “se ifọnde inọ kpukpru owo.” Edi nnyịn isitieneke isịn idem ke mme edinam ukara, isinyụn̄ isịnke idem ke mme edinam ufọkabasi eken. (Galatia 6:10; 2 Corinth 6:14) Edi edieke owo ebierede ndinam emi nnyịn isiyịkke enye ete okûnam—Rome 14:12.

 Edieke enyenede mbume en̄wen aban̄a se Mme Ntiense Jehovah ẹnimde, mbọk ka ikpehe Intanet nnyịn ke kot n̄kpọ ban̄a nnyịn, nyene nneme ye owo ke ofis nnyịn, ka Ufọkmbono Obio Ubọn̄ oro ekperede fi, mîdịghe nyene nneme ye Ntiense Jehovah ekededi emi odụn̄de ekpere fi.