N̄kamana ke La Ceiba, ke Honduras. Ete ye eka mi ẹkenyene nditọ ition. Ami n̄kedi akpatre eyen ye n̄kukụre eyen erenowo. Ami ikpọn̄ n̄konyụn̄ ndi inan ke ubon nnyịn. Ebiet emi ikodụn̄de ama ọdiọk etieti, ikonyụn̄ idi mme ọkpọikpọi ubuene. Ini ndide n̄kpọ nte isua inan̄, ete mi ama adian̄ade ke enyọn̄ ufọk emi enye akakade ndinam utom ediduọ akpa. N̄kpọ ama etetịm ọsọn̄ ye nnyịn akan nte ekedide.

 Eka mi ama etịme nte ekekeme ndikama mi ye nditọeka mi iban, edi enye ikesiwakke ndinyene okụk ndep ọfọn̄ nnọ mi. Edịm ama edep, tuep ama esinam mi etieti sia n̄kenyeneke ọfọn̄ etuep.

 Ini ndide eyenọwọn̄, mma n̄kpep Usem Idiọn̄ọ Mbon Honduras, emi ẹkotde LESHO. Usem oro ama an̄wam mi nneme nneme ye mbon en̄wen emi ẹdide inan. Edi eka mi ye nditọeka mi ikọdiọn̄ọke Usem Idiọn̄ọ Mbon Honduras. Mmọ ẹma ẹnyụn̄ ẹyom idiọn̄ọ ẹnọ n̄kpọ ifan̄ man ẹda ẹneme nneme ye ami. Kpa ye oro, eka mi ama ama mi, onyụn̄ ekpeme mi mbak ndidụk mfịna. Enye ama ada idiọn̄ọ ifan̄ emi enye ọkọdiọn̄ọde ọdọhọ mi ndiọi n̄kpọ emi mmen̄kpesịnke ubọk, utọ nte ndin̄wọn̄ sika ye ndin̄wọn̄ ọkpọsọn̄ mmịn n̄kaha. Mmọkọm Abasi ke item esie oro sia oro akanam ndụkke ufụn nnọ utọ n̄kpọ oro ndomokiet.

 Ini ndide ekpri, eka mi ama esimen mi aka Ufọkabasi Catholic. Edi n̄kpọ ndomokiet ikan̄wan̄ake mi sia idụhe eke ekesikabarede se ẹtịn̄de esịn ke usem idiọn̄ọ ọnọ mi. Ama odorode mi tutu ini ndide isua duop, mma ntre ndika ufọkabasi. Kpa ye oro, okosụk ọdọdọn̄ mi ndinen̄ede ndiọn̄ọ Abasi.

 Ke 1999, ini ndide isua 23, mma n̄kụt mma ufọkabasi evangelical kiet emi okotode United States edi. Enye ama ekpep mi mme n̄kpọ ke Bible, afiak ekpep mi Usem Idiọn̄ọ Mbon America emi ẹkotde ASL. Mma nnen̄ede mma se enye ekekpepde mi ke Bible oro tutu mbiere ndidi pastọ. Oro akanam n̄kpọn̄ Honduras n̄ka Puerto Rico n̄kodụk ufọkn̄wed mme Christian kiet emi ẹsikpepde mme inan n̄kpọ. Ini n̄kọnyọn̄de ndi La Ceiba ke 2002, mma ndisiak ufọkabasi mme inan, ndusụk mme ufan mi ẹma ẹn̄wam mi. Kiet ke otu mme ufan mi oro ekekere Patricia. Enye ke n̄kedidọ.

 Sia n̄kedide pastọ ufọkabasi nnyịn, mma nsikwọrọ ikọ Abasi ke Usem Idiọn̄ọ Mbon Honduras, n̄wụt mme inan ndise mbụk Bible, nnyụn̄ nnanam mme mbụk oro nte drama man enen̄ede an̄wan̄a mmọ. Mma nsinyụn̄ n̄ka n̄kese mme inan ke mme obio emi ẹkperede eke nnyịn n̄kọdọn̄ mmọ esịt, ndien mma nsin̄wam mmọ mmọ ẹkpenyene mfịna. Mma n̄kam n̄ka United States ye Zambia nte isụn̄utom. Edi ntịn̄ akpanikọ, n̄kenen̄ekede ndiọn̄ọ Bible. N̄konyụn̄ n̄kpep mme inan se ẹkekpepde mi, nnyụn̄ ntịn̄ nte ndise an̄wan̄ade mi nnọ mmọ. Se idude edi ke mma nnyene ata ediwak mbụme.

 Usen kiet, ndusụk mbon ufọkabasi emi n̄kasiakde ẹma ẹtọn̄ọ ndisan̄a nsu nsu ndori mi. Mmọ ẹkedọhọ ke ndi akpammịn, ke mmonyụn̄ mma n̄wan en̄wen. N̄kekereke ke mmọ ẹkpenam mi utọ n̄kpọ oro, esịt ama onyụn̄ ayat mi. Ke ekpri ini ama ekebe, ami ye Patricia ima ikpọn̄ ufọkabasi oro.

 Mme Ntiense Jehovah ẹma ẹsiwak ndidi ndikwọrọ ikọ nnọ mi ye Patricia an̄wan mi, edi nnyịn ikesikpan̄ke utọn̄ inọ mmọ. Edi ke ima ikọkpọn̄ ufọkabasi nnyịn oro, Patricia ama enyịme ndikpep Bible ye Liccy ye Thomas ebe esie. Ama enem mi ndikụt nte mmọ ẹdiọn̄ọde usem idiọn̄ọ kpa ye emi mmọ mîkedịghe inan. Mma ntiene Patricia n̄kpep Bible ye mmọ ke ntak oro.

 Ima ikpep Bible ke ufan̄ ọfiọn̄ ifan̄. Ẹkesikama vidio ASL ẹkpep nnyịn. Edi ini ndusụk mme ufan nnyịn ẹdọhọde nnyịn ke Mme Ntiense Jehovah isitieneke se isịnede ke Bible, ke ẹtiene owo, ima itre ndikpep Bible ye mmọ. Kpa ye emi Thomas okowụtde mi nsio nsio n̄kpọ ndisọn̄ọ ke Mme Ntiense Jehovah itieneke owo, n̄kenịmke.

 Ke ọfiọn̄ ifan̄ ama ekebe, Patricia ama ofụhọ ata etieti onyụn̄ ọbọn̄ akam ọdọhọ Abasi anam Mme Ntiense Jehovah ẹfiak ẹdi ufọk nnyịn. Ke enye ama ọkọbọn̄ akam oro ama, ibịghike mbọhọidụn̄ nnyịn kiet emi ekedide Ntiense Jehovah ama edise enye, onyụn̄ ọdọhọ ke iyọkọdọhọ Liccy edi edise enye. Liccy ama anam n̄kpọ emi Patricia akadade ọdiọn̄ọ ke enye edi ata eti ufan. Enye ama esidise Patricia kpukpru urua, ọdọn̄ enye esịt, onyụn̄ ekpep enye Bible. Kpa ye oro, n̄kosụk nda Mme Ntiense Jehovah nte n̄kadade.

 Ke 2012, Mme Ntiense Jehovah ẹma ẹsan̄a ẹdeme vidio, Nte Akpama Ndifiọk Akpanikọ? ke Usem Idiọn̄ọ Mbon Honduras. Liccy ama emen vidio oro ọsọk nnyịn. Ini nsede vidio oro, ama akpa mi idem ndikụt ke ata ediwak n̄kpọ emi n̄kesikpepde, utọ nte ikan̄ hell ye ukpọn̄ ikpaha ke nsinsi, idụhe ke Bible.

 Urua emi eketienede, mma n̄ka Ufọkmbono Obio Ubọn̄ Mme Ntiense Jehovah man n̄keneme nneme ye Thomas. Mma ndọhọ enye ke nyom ndikpep mme inan akpanikọ emi esịnede ke Bible, edi ke nyomke ndidi Ntiense Jehovah. N̄koyom ndisiak obufa ufọkabasi nnọ mme inan. Thomas ama ọkọm mi nte n̄koyomde ndifiak ntọn̄ọ n̄kpọ Abasi, edi enye ama owụt mi Ephesus 4:5 emi owụtde ke inaha ubahade odu ke esop ata mme Christian.

 Thomas ama onyụn̄ ọnọ mi vidio, Jehovah’s Witnesses—Faith in Action, Part 1: Out of Darkness ke ASL. Ke vidio oro, mma n̄kụt nte irenowo ifan̄ ẹkedade ini ẹtịm ẹdụn̄ọde Bible man ẹse m̀mê mme akpan ukpepn̄kpọ emi ẹsikpepde ẹdi akpanikọ. Nte n̄kosụk nsede vidio oro, ama an̄wan̄a mi nte eketiede irenowo oro ke idem. Nte mmọ ẹkeyomde akpanikọ, ntre n̄ko ke ami n̄koyom. Se n̄kokụtde ke vidio oro ama anam nnịm ke Mme Ntiense Jehovah ẹkpep akpanikọ sia kpukpru se mmọ ẹnịmde ẹto Bible. Ntre mma mfiak ntọn̄ọ ndikpep Bible, ndien ami ye Patricia ima ina baptism ke 2014 idi Mme Ntiense Jehovah.

 Mmama esop Mme Ntiense Jehovah sia esop mmọ asana nte Abasi asanade, oburobụt ido ndomokiet idụhe. Mme Ntiense Jehovah isikpehe ntịme ke inua, mmọ inyụn̄ idọn̄ọke do inam oburobụt ido. Mmọ ẹdi mbon emem, esinyụn̄ edi enye emi ọsọn̄ọ enye emi idem, enye emi ọsọn̄ọ enye eken idem. Ubahade ndomokiet idụhe ke otu mmọ. Kpukpru mmọ ẹkpep ukem n̄kpọ emi Bible ekpepde, inamke n̄kpọ m̀mê owo oto ewe idụt, m̀mê esem ewe usem.

 Enem mi nte ndiọn̄ọde se Bible enen̄erede ekpep. N̄kpọ kiet emi n̄kpepde edi ke Jehovah edi Ata Ọkpọsọn̄ Abasi, ke enye onyụn̄ edi Akakan Andikara ofụri ererimbot. Enye ama mme inan, onyụn̄ ama mbon emi ẹkopde n̄kpọ. Ndaha ima emi Abasi amade mi mbre mbre. N̄kpọ efen emi n̄kpepde edi ke isọn̄ emi ayakabade edi ata ediye Paradise, ke kpukpru nnyịn imekeme ndidu uwem ke nsinsi, idem oyonyụn̄ ọsọn̄ kpukpru owo. Ntetie mbet usen emi utọ n̄kpọ oro editịbede!

 Esinem mi ye Patricia ndikwọrọ ikọ nnọ mme inan. Idahaemi ke ikpep Bible ye owo ita ke akani ufọkabasi nnyịn. Ini n̄kedide pastọ, ediwak se n̄kekpepde mme owo ikesin̄wan̄ake mi. Edi an̄wan̄a mi idahaemi. Ami ndikpep Bible ye Mme Ntiense Jehovah ama anam ndinyene ibọrọ mme mbụme emi ẹkesifịnade mi.