N̄kamana ke Calgary ke Alberta ke Canada. Ini n̄kedide nsek, ete ye eka mi ẹma ẹdian̄ade ndọ, ntre eka mi ama emen mi ọnyọn̄ n̄kan̄ mme ete esie. Ete eka mi ye eka eka mi ẹma ẹnen̄ede ẹma mi ye eka mi, esịt ama esinyụn̄ enem mi etieti. Ke nteti nte uwem ekesinemde mi ini n̄kedide ekpri.

 Ini n̄kedide isua itiaba, ete mi ama afiak edidọ eka mi; ima inyụn̄ iwọrọ ikodụn̄ ke St. Louis ke Missouri ke United States—do ke uwem mi ọkọtọ etịmede. Mma ntọn̄ọ ndikụt ke ete mi edi ata owo ibak. Ke uwụtn̄kpọ, akpa usen n̄kọtọn̄ọde ufọkn̄wed ke n̄kan̄ oro, ete mi ama okop ini n̄kọnyọn̄de ndi ke nditọ ufọkn̄wed nnyịn ẹma ẹmia mi, edi ami ndodop ndaha. Enye ama enen̄ede ayat esịt onyụn̄ amia mi ọdiọk akan se nditọ ufọkn̄wed oro ẹkemiade mi! Tọn̄ọ usen oro mma n̄kpep n̄kpọ; kpa ye n̄kedide isua itiaba, eyenọwọn̄ ikesiyomke mi ikọ yak ndop uyo mbe.

 Eka mi ikamaha nte ete mi ekesisọpde iyatesịt; mmọ ẹma ẹsitọhọ kwa ini kwa ini. Mma ntọn̄ọ ndisida ọkpọsọn̄ ibọk ye ndisin̄wọn̄ ọkpọsọn̄ mmịn ini ndide isua 11. Mma nsisọp iyatesịt ntem, nsinyụn̄ mma en̄wan ke efak. Ntikụre ufọkn̄wed sekọndri, mma n̄kabade ata owo ntịme.

 Ini n̄kesịmde isua 18, mma ndụk ekọn̄ ke U.S.A.—eke nnyịn ikesin̄wana ke mmọn̄. Ẹma ẹkpep mi uwotowo. Ke mma n̄kanam utom ekọn̄ isua ition, mma n̄kpọn̄ utom ekọn̄ ndaha univesiti n̄kekpep psychology, sia n̄koyom ndinam utom ke Federal Bureau of Investigation. N̄kọtọn̄ọ ufọkn̄wed oro ke United States, ekem mma mfiak nnyọn̄ Canada. Do ke n̄kokụre ufọkn̄wed oro.

 Ke ufọkn̄wed oro, uwem ama odorode mi etiene nte mme owo ẹkenamde n̄kpọ. Mma n̄kụt ke mme owo ẹsikere ẹban̄a idemmọ kpọt, ke n̄kpọ ndomokiet isan̄ake ọfọn, ndien ke edi eyo esiere mfịna okpon; owo inyụn̄ inyeneke usọbọ inọ mmọ. Mma nduọk idotenyịn, nnyụn̄ ndọhọ idemmi ke mme owo idikemeke ndinam ererimbot emi ọfọn.

 Mma n̄kere ke uwem inen̄ekede inyene ufọn; ntre se ikesibehede mi ekedi ndin̄wọn̄ n̄kpọ, nyom okụk, nnyụn̄ ntan̄ iban. Ekesidi n̄wọrọ ke itie usọrọ enye mi n̄ka en̄wen, n̄kesinyụn̄ n̄kpụhọ iban nte ọfọn̄. Mma nsida ofụri ifiọk en̄wan n̄kekpepde ini n̄kedide owoekọn̄ n̄n̄wana ye mme owo. N̄kekere ke mmọdiọn̄ọ eti ye idiọk, n̄kesinyụn̄ ntiehe n̄kụt owo anamde owo en̄wen ibak. Edi n̄kọdiọn̄ọke ke oro akam ananam ndi owo ntịme n̄kan akpa.

 Usen kiet, ami ye ufan mi ima in̄wọn̄ n̄kpọ etieti ke ufọk mi, inyụn̄ itọn̄ọ ndiben̄e idem man idịbe imen ikọn̄ekpo ikanyam. Ufan mi oro ama obụp mi m̀mê mmenịm ke Abasi do. Mma ndọhọ enye, “Edieke edide Abasi anam mme owo ẹbọ ufen ke ererimbot emi, ufọn ami ndidiọn̄ọ enye-e?” Edem usen oro mma ntọn̄ọ utom, ndien owo itieutom nnyịn emi ekedide Ntiense Jehovah ama obụp mi ete, “Ndi emekere ke Abasi anam mme owo ẹbọ ufen ke ererimbot emi?” Idem ama akpa mi sia mma nti se n̄kọdọhọde ufan mi n̄kpọn̄ osụk ebede, ntre mma nnen̄ede nyom ndidiọn̄ọ ibọrọ. Enye ama esineme Ikọ Abasi ye ami ke ufan̄ ọfiọn̄ itiokiet, onyụn̄ owụt mi ibọrọ nsio nsio mbụme mi ke Bible.

 Eyenan̄wan oro n̄koyomde ndidọ ini oro, ikamaha nditiene n̄kpep Bible. Sunday kiet mma ndọhọ enye ke mmokot Mme Ntiense Jehovah ẹdi ufọk ẹdikpep nnyịn Bible. Edem usen oro, nte nnyọn̄ utom ndi, enye ama atan̄ kpukpru n̄kpọ ke ufọk efehe. Mma n̄wọrọ n̄ketie ke an̄wa ntua. Mma nnyụn̄ mbọn̄ akam nte Abasi an̄wam mi. Akpa ini n̄kokotde ata enyịn̄ Abasi, Jehovah, ke akam mi ekedi oro.—Psalm 83:18.

 Ke usen iba ama ekebe, mma ntọn̄ọ ndikpep Bible ye Ntiense Jehovah kiet, enye ekesisan̄a ye n̄wan esie edi. Ke mmọ ẹma ẹkenyọn̄ọ, mma n̄kot n̄wed Afo Emekeme Ndidu Uwem ke Nsinsi ke Paradise ke Isọn̄ mma okoneyo oro. a N̄wed oro ke mmọ ẹkeda ẹkpep mi Ikọ Abasi. Se n̄kekpepde mban̄a Jehovah ye Jesus ama enen̄ede enem mi. Mma ndikụt ke Jehovah esitua owo mbọm, ke esibabiak enye ndikụt mme owo ẹbọde ufen. (Isaiah 63:9) Ama enen̄ede enem mi ndidiọn̄ọ utọ ima emi Abasi amade mi ye nte ke Eyen esie akakpa ke ibuot mi. (1 John 4:10) Mma ndọhọ ke Jehovah ekenyene ata ime ye ami, “koro enye mîyomke baba owo kiet atak edi oyom kpukpru owo ẹkabade esịt.” (2 Peter 3:9) Eketie mi nte n̄kpọ eke Jehovah okotde mi adian idem ọdọhọ yak ndi ufan imọ.—John 6:44.

 Mma ntọn̄ọ ndụk ikọ Abasi Mme Ntiense Jehovah urua oro. Mme owo ẹma ẹnen̄ede ẹkọm mi ẹnyụn̄ ẹnem esịt ndikụt mi, kpa ye oro n̄kadahade anyan idet nnyụn̄ nsịnede n̄kpanuen utọn̄. Eketie mmọ nte ẹkụt eyeneka mmọ emi mmọ mîkwe ke ediwak isua. Mmọ ẹkenyụn̄ ẹnam n̄kpọ nte ata mme Christian. Ekenem mi ke idem nte ekesinemde ke ini eyenọwọn̄, ini n̄kesidude ye ete eka mi ye eka eka mi.

 Se n̄kekpepde ke Bible ama ọsọsọp ọtọn̄ọ ndikpụhode mi. Mma mfat idet, ntre nditan̄ iban, ntre ndida ọkpọsọn̄ ibọk ye ndin̄wọn̄ n̄kpọ. (1 Corinth 6:9, 10; 11:14) N̄koyom ndinam esịt enem Jehovah. Oro ama anam ini ekedidi oro ndiọn̄ọde ke enyene se nsinamde oro Jehovah mîmaha, mma nsọsọp n̄kpụhode, ndaha nyom n̄kpọ se ntịn̄ nnyan̄a idem. Ama esibiak mi mma nti nte n̄kesidude uwem. Mma nsidọhọ idemmi nte, ‘N̄kemeke-keme ndifiak ndu utọ uwem oro aba.’ Mma ntọn̄ọ ndikere n̄kpọ ọfọn nnyụn̄ nnam nti n̄kpọ. Mma nnyụn̄ ntọn̄ọ ndikụt nte ndidu uwem nte Jehovah ọdọhọde an̄wamde mi. Mma nna baptism nte Ntiense Jehovah ke July 29, 1989, ọfiọn̄ itiokiet tọn̄ọ n̄kọtọn̄ọ ndikpep Bible.

 Bible an̄wam mi nnen̄ede n̄kpụhọde. Ini akpa n̄kesinam n̄kpọ afai afai owo akpayat mi esịt. Edi idahaemi mmodomo nditie ke “emem ye kpukpru owo.” (Rome 12:18) Idịghe odudu idemmi ke nda nnam kpukpru emi, ntre mmesikọm Jehovah nte enye adade Ikọ esie ye edisana spirit esie an̄wam mi n̄kpụhọde.—Galatia 5:22, 23; Mme Hebrew 4:12.

 Utu ke ndidụk ufụn nnọ ọkpọsọn̄ ibọk, ikọn̄ekpo, ntịme, ye ntaha uwem, idahaemi nsida uwem mi nnam se n̄kekeme nnọ Jehovah. Utọ nte ndin̄wam mbon en̄wen ẹdi ẹdidiọn̄ọ enye. Ke isua ifan̄ ama ekebe tọn̄ọ n̄kana baptism, mma n̄wọrọ n̄ka idụt en̄wen n̄ketiene n̄kwọrọ ikọ ke ebiet ẹyomde-yom mme ọkwọrọikọ. Tọn̄ọ oro, enenem mi ndisịn idem n̄kpep mme owo Bible nnyụn̄ n̄kụt nte Ikọ Abasi okpụhọrede uwem mmọ. Esịt esinyụn̄ enem mi n̄ko sia eka mi edi Ntiense Jehovah idahaemi ke ntak emi enye okokụtde nte Ikọ Abasi anamde mi n̄kpụhọde.

 Ke 1999, ke El Salvador, mma n̄kụre ufọkn̄wed emi ẹkotde idahaemi Ufọkn̄wed Mme Ọkwọrọ Obio Ubọn̄. Ẹma ẹkpep mi ke ufọkn̄wed oro nte n̄kpesịnde idem n̄kwọrọ ikọ, n̄kpep mme owo Ikọ Abasi, nnyụn̄ n̄sọn̄ọ mme erọn̄ Abasi idem. Kpa ke isua oro, mma ndọ Eugenia. Nnyịn mbiba ke isịn idem ikwọrọ ikọ ofụri ini ke Guatemala.

 Idahaemi uwem idorokede mi aba, utu ke oro akam enenem mi. Se n̄kpepde ke Bible ama an̄wam mi ntre nditan̄ iban, n̄n̄yụn̄ ntre ndidi owo ntịme aba. Mmenyene emem ndien; mme owo ẹma mi, Abasi onyụn̄ ama mi.