“Edieke enen̄erede oyom ndikpep n̄kpọ mban̄a Abasi, ka iso kpep Bible ye Mme Ntiense Jehovah.” Ama akpa mi idem ndikop utọ ikọ oro. Ibịghike n̄kọtọn̄ọ ndikpep Bible ye Mme Ntiense Jehovah ini ẹtịn̄de ikọ emi ye ami. Yak mbụk nnọ fi ekpri nte uwem mi eketiede man an̄wan̄a fi se ikanamde idem akpa mi.

 N̄kamana ke obio emi ẹkotde Quezaltepeque, ke El Salvador. Ete ye eka mi ẹkebon nditọ 15, ndien ami n̄kedi ọyọhọ eyen 6. Mmọ ẹma ẹdomo ndikpep mi ndidi owo akpanikọ ye owo emi esinịmde ibet ukara. Ini oro n̄ko, Leonardo ye Mme Ntiense Jehovah eken ẹma ẹsidikpep nnyịn Bible ndusụk ini. Edi n̄kadaha se ẹkekpepde mi ke n̄kpọ ndomokiet, ndien mme n̄kpọ emi n̄kemekde ndinam ikọfọnke. Ini ndide isua 14, mma ntọn̄ọ nditiene mme ufan mi ke ufọkn̄wed n̄n̄wọn̄ ọkpọsọn̄ mmịn nnyụn̄ nda n̄kpọsọn̄ ibọk. Ekem mmọ kiet kiet ẹma ẹkpọn̄ ufọkn̄wed ẹkedụk n̄ka afai, mma nnyụn̄ ntiene mmọ nnam ntre. Kpukpru usen ima isisan̄a ke efak inyịk mme owo ibọ okụk inyụn̄ iyịp n̄kpọ man inyene okụk in̄wọn̄ mmịn, ida n̄kpọsọn̄ ibọk.

 N̄kada mbon n̄ka afai oro nte ubon mi. N̄kenịm ke ana nsọn̄ọ nda ye mmọ. Ke uwụtn̄kpọ, usen kiet owo n̄ka nnyịn ama ada ọkpọsọn̄ ibọk enye ọdọk enye ibuot, ekem aka en̄wan ye mbọhọidụn̄ mi. Nte mmọ ẹsụk ẹn̄wanade, mbọhọidụn̄ mi ama akan ufan mi oro ubọk, efịk enye enịm onyụn̄ okot bodisi. Esịt ama ayat mi tutu. Mma mmen akamba okpoyon̄ ntọn̄ọ mmia moto esie mbiat man enye asana ufan mi ayak. Mma mmia akrasi kpukpru window moto esie nsuan nnyụn̄ mmia moto esie mbiat. Mbọhọidụn̄ mi ama ekpe mi ubọk ete ntre, edi n̄kakpan̄ke utọn̄ nnọ enye.

 Ini ndide isua 18, mbon n̄ka nnyịn ẹma ẹn̄wana ye mme bodisi. Nte n̄kosụk ndomode nditop bọmb emi ikanamde nsịn nnọ mme bodisi, bọmb oro ama obomo mi ke ubọk; ndiọn̄ọke nte akasan̄ade etịbe ntre. N̄kukụre se ntide edi nte ubọk mi awahade mbai mbai, ekem nsụhọ. Ini nsetde ndiọn̄ọ idem ke ufọkibọk, mma n̄kụt ke nnyeneke ubọk nnasia aba, n̄kopke n̄kpọ aba ke utọn̄ nnasia, nnyụn̄ nnen̄ekede n̄kụt n̄kpọ aba ke enyịn nnasia.

 Kpa ye oro, ke ẹma ẹkesio mi unyọn̄ ke ufọkibọk, mma mfiak nnyọn̄ mbịne n̄ka oro. Ikebịghike, bodisi ẹma ẹmụm mi; ẹma ẹmen mi ẹkekọbi. Mma n̄ketetịm ndiana ye mbon n̄ka afai oro ke ufọk-n̄kpọkọbi. Ikesisan̄a ntre inam kpukpru n̄kpọ, ọtọn̄ọde ke ini udia usenubọk emi ikesitọn̄ọde ndin̄wọn̄ ikọn̄ekpo, tutu ini idụkde idap.

 Ini ndude ke ufọk-n̄kpọkọbi, Leonardo ama edise mi. Nte isụk inemede nneme, enye ama anyan ubọk ke n̄kpọ emi n̄kọdrọde ke afara nnasia mi onyụn̄ obụp mi ete, “Ọmọdiọn̄ọ se ntọi ita emi ọwọrọde?” Mma ndọhọ enye, “Ih nan̄a, ọwọrọ idan̄, n̄kpọsọn̄ ibọk, ye ikwọ rọk.” Leonardo ama ọdọhọ mi ete: “N̄kpakam ndọhọ ke ọwọrọ ufọkibọk, ufọk-n̄kpọkọbi, ye n̄kpa. Ama aka ufọkibọk, ufọk-n̄kpọkọbi ke esịne emi. N̄kọ ọmọdiọn̄ọ se iditienede.”

 Se Leonardo eketịn̄de ama odụk mi n̄kpọkpọrọ. Akpanikọ ke enye eketịn̄. Nte n̄kodude uwem mi eketie nte n̄kpọ eke ndade ubọk mi ndọk udi nnọ idem mi. Leonardo ama obụp mi m̀mê n̄kpama imọ isikpep mi Bible, mma nnyịme. Se n̄kekpepde ke Bible ama anam n̄kpụhọde uwem mi. Ke uwụtn̄kpọ, Bible ọdọhọ ke “idiọk nsan̄a ababiat eti ido.” (1 Corinth 15:33) Ntre akpa n̄kpọ emi n̄kanamde ekedi ndiyom mbufa ufan. Ke ntak oro, mma ntre mbono n̄ka nnyịn oro nnyụn̄ ntọn̄ọ ndidụk mbono esop Mme Ntiense Jehovah emi ẹkesinịmde ke esịt ufọk-n̄kpọkọbi oro. Ke itie mbono esop oro ke n̄kosobo owo n̄kpọkọbi kiet emi ekekerede Andrés. Andrés akana baptism ke ufọk-n̄kpọkọbi oro onyụn̄ akabade Ntiense Jehovah. Enye ama ọdọhọ mi nditie ye imọ ndia udia usenubọk. Ke mma n̄kanam ntre, ikesidịghe aba mma ndemede ami ntọn̄ọ ye ikọn̄ekpo. Utu ke oro, ami ye Andrés ikesineme itie Bible kiet kpukpru usenubọk.

 Inikiet inikiet, mbon n̄ka afai oro ẹma ẹkụt ke mmọtọn̄ọ ndikpụhọde. Oro akanam akamba owo kiet ke n̄ka oro ọdọhọ mi ke enyene se iyomde ndineme ye ami. Ndịk ama anam mi etieti. N̄kọdiọn̄ọke se enye edinamde mi enye ama okop ke nyomke ndidu ke n̄ka oro aba, sia esisọn̄ ata etieti owo ndiwọrọ ke n̄ka afai. Enye ama ọdọhọ mi ete: “Imokụt ke usûdịghe mbono nnyịn aba, ke edika eke Mme Ntiense Jehovah. Nso ke aduak?” Mma ndọhọ enye ke nyom ndika iso n̄kpep Bible nnyụn̄ n̄kpụhọde uwem mi. Idem ama akpa mi ndikop enye ọdọhọde ke n̄ka oro idifịnake mi mmọ ẹma ẹkụt ke nnen̄ede nyom ndidi Ntiense Jehovah. Enye ama adian do ete: “Edieke enen̄erede oyom ndikpep n̄kpọ mban̄a Abasi, ka iso kpep Bible ye Mme Ntiense Jehovah. Imenịm ke udûnamke ndiọi n̄kpọ aba. Amanam etieti. Nnennen n̄kpọ ke anam oro. Mme Ntiense Jehovah ẹkeme ndin̄wam fi. Mma nsikpep Bible ye mmọ ini ndude ke United States, ndusụk mbon ubon mi ẹdi Mme Ntiense Jehovah. Kûyak ndịk anam fi. Ka iso kpep Bible.” Kpa ye emi idem okosụk enyekde mi, esịt ama adat mi tutu. Mma mbọn̄ akam ke esịt mi n̄kọm Jehovah Abasi. N̄kebiet inuen emi ẹsiode ke efọk. Ini oro ke ikọ emi Jesus eketịn̄de ete ke “mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn” ekenen̄ede an̄wan̄a mi.—John 8:32.

 Edi ndusụk n̄kani ufan mi ẹma ẹsida n̄kpọsọn̄ ibọk ẹdomo mi ẹse m̀mê nyosụk n̄n̄wọn̄. Ntịn̄ akpanikọ, mma nsibọ n̄n̄wọn̄ ndusụk ini. Mma nseme ke ofụri esịt nnọ Abasi ediwak ini, ndien nte ini akakade, mma ntre kpukpru ndiọi n̄kpọ emi n̄kesinamde.—Psalm 51:10, 11.

 Ke ẹma ẹkesio mi ke ufọk-n̄kpọkọbi, ediwak owo ẹkekere ke nyafiak n̄ketie nte n̄kesitiede, edi n̄kanamke ntre. Utu ke oro, mma nsifiak n̄ka ufọk-n̄kpọkọbi oro, mmen se n̄kekpepde ke Bible n̄ketịn̄ nnọ mbon n̄kpọkọbi eken. N̄kani ufan mi ẹma ẹnịm ndien ke mmokpụhọde. Edi n̄kani asua mi ikenịmke.

 Nte nsụk nsan̄ade ye brọda kiet n̄kwọrọ ikọ usen kiet, mbon n̄ka kiet emi n̄ka nnyịn ẹkesikade en̄wan ẹma ẹkama n̄kpọ en̄wan ẹkan mi ye brọda oro ẹkụk. Mmọ ẹkeyom ndiwowot mi. Brọda oro ama enyene uko etịn̄ ukpono ukpono ye mmọ ke ndịghe owo n̄ka afai aba. Ẹtetịn̄ mi, ke n̄kodomo ndimụm idem n̄kama. Ke mmọ ẹma ẹkemia mi ẹnyụn̄ ẹdọhọ n̄kûfiak ndụk ebiet oro aba, mmọ ẹma ẹyak nnyịn inyọn̄ọ. Bible ama enen̄ede okpụhọde mi. Ekpedi ke ini edem, n̄kpokodomo ndisio mmọ usiene. Edi idahaemi ndinam item 1 Thessalonica 5:15, emi ọdọhọde ete: “Ẹkụt ẹte baba owo kiet idaha idiọk isio owo ekededi usiene idiọk, edi kpukpru ini ẹbịne ndinam se ifọnde ye kiet eken ẹnyụn̄ ẹnam ntre ye kpukpru owo eken.”

 Tọn̄ọ n̄kedi Ntiense Jehovah, mmodomo ndidi owo akpanikọ. Imemke-o. Edi se in̄wamde mi edi Jehovah Abasi, item Bible, ye nti ufan. Tutu amama, nyomke ndifiak n̄kanam ndiọi n̄kpọ emi n̄kesinamde.—2 Peter 2:22.

 N̄kesidi owo afai ye owo ọkpọsọn̄ iyatesịt. Mmenịm ke ekpedi n̄kọkpọn̄ke utọ uwem oro, ke n̄kpodụho uwem mfịn emi. Se n̄kekpepde ke Bible ama okpụhọde mi. Mma ntre ndiọi n̄kpọ emi n̄kesinamde. Mmekpep ndinam n̄kpọ emem emem ye n̄kani asua mi. (Luke 6:27) Mmenyene nti ufan emi ẹn̄wamde mi nnyene nti edu. (Mme N̄ke 13:20) Mmokop inem uwem idahaemi, uwem mi onyụn̄ enyene se ọwọrọde, ke nnyụn̄ nnam n̄kpọ nnọ Abasi emi ekefende kpukpru ndiọi n̄kpọ emi n̄kesinamde.—Isaiah 1:18.

 Ke isua 2006, mma ndụk san̄asan̄a ufọkn̄wed emi ẹkenamde ẹnọ mme Christian emi mîdọhọ ndọ. Ke isua ifan̄ ama ekebe, mma ndọ edima an̄wan mi, ndien ami ye enye ke idian ubọk ibọk adiaha nnyịn. Idahaemi nnen̄ede nda ini mi n̄kpep mbon en̄wen mme item Bible emi akan̄wamde mi. Ndi ebiowo, mmesinyụn̄ ndomo ndin̄wam mme uyen ẹkûnam ukem ndudue emi n̄kanamde ini n̄kedide uyen nte mmọ. Utu ke ndida ubọk mi ndọk udi nnọ idem mi, ndomo ndinam se idin̄wamde mi nnyene nsinsi uwem emi Abasi ọn̄wọn̄ọde ke Bible ndinọ nnyịn.