N̄kamana ke ekpri obio emi ẹkotde San Juan Chancalaito, ke Chiapas, ke Mexico. Ete ye eka mi ẹkedi mbon Chol. Mbon Chol ẹto ekpụk emi ẹkotde Maya. Ete ye eka mi ẹkenyene nditọ 12, ndien ami n̄kedi ọyọhọ ition. Ini n̄kedide eyenọwọn̄, ami ye nditọeka mi ima ikpep Bible ye Mme Ntiense Jehovah. Edi n̄kanamke se n̄kekpepde ke Bible ini ndide uyen.

 Ini nsịmde isua 13, mma ntọn̄ọ ndida n̄kpọsọn̄ ibọk nsinyụn̄ nyịp n̄kpọ owo. Mma nnyụn̄ n̄kpọn̄ ufọk; ekedi nyo n̄ka mi mfịn, nyo n̄ka ko n̄kpọn̄. Ini nsịmde isua 16, mma ntọn̄ọ ndinam utom ke in̄wan̄ ikọn̄ekpo. N̄kodu do n̄kpọ nte isua kiet. Okoneyo usen kiet, nte isụk iwatde ubom emi ikọdọn̄de ikọn̄ekpo iyọhọ iyom ndibe mmọn̄, mbon n̄ka efen emi ẹkesinyamde ikọn̄ekpo ẹma ẹkama ikpọ ọdiọn̄ọ-idem ikan̄ ẹtọn̄ọ nditop nnyịn. Mma mfrọ ndụk mmọn̄ oro n̄wọk anyan usụn̄ n̄kọwọrọ ke ata usụhọde usụhọde. Nte n̄kasan̄ade mbọhọ itiat ikan̄ edi oro. Ekem mma mfehe n̄ka United States.

 Ini nsịmde United States, mma n̄ka iso nnyam n̄kpọsọn̄ ibọk nnyụn̄ ndụk ikpọ mfịna efen efen. Ke mma n̄kesịm isua 19, ẹma ẹbiere n̄kpọkọbi ẹnọ mi ke ntak inọ ye ke ntak emi n̄kodomode ndiwot owo. Mma ndụk n̄ka afai ke ufọk-n̄kpọkọbi nnyụn̄ mbak ibak efen efen ndian ke se mma n̄kababak. Oro akanam ikpọ owo ufọk-n̄kpọkọbi oro ẹsio mi do ẹka ufọk-n̄kpọkọbi emi ukpeme okponde etieti ke Lewisburg, Pennsylvania.

 Ke Lewisburg, mma ndiọk n̄kan se n̄kedide. Ikọsọn̄ke mi ndidian idem ye n̄ka afai nnyịn ke obufa ufọk-n̄kpọkọbi emi sia mma ndrọ mme idiọn̄ọ n̄ka oro ke idem. Mma mfiop ibuot n̄kan se n̄kedide; ekedi n̄wọrọ ke en̄wan enye emi, ndụk efen. Ini kiet mma ntiene n̄ka nnyịn n̄n̄wana ye n̄ka efen ke ufọk-n̄kpọkọbi oro. Ikan̄wana n̄kpa n̄kpa. Ikakama eto baseball ye ukwak emi ẹsidade ẹsịn̄ede idem imia owo. Mme ekpeme ufọk-n̄kpọkọbi ẹkeda tear gas ẹsuan en̄wan oro. Ke ẹma ẹkesuan nnyịn, ikpọ owo ufọk-n̄kpọkọbi ẹma ẹmen mi ẹkesịn ke ebiet emi ẹsisịnde ndiọi-n̄kan mbon n̄kpọkọbi. N̄kesiyat esịt obom obom, mmiom owo, nsụn̄i owo. N̄kesibiatke ini ndimụm owo ntịm. Ekesinenem mi. Ikafịnake mi nte n̄kesitiede ntre.

 Owo ikesiwakke ndiyak n̄wọrọ ke esịt ubet ufọk-n̄kpọkọbi ke obufa itie emi ẹkemende mi ẹkesịn, ntre mma ntọn̄ọ ndikot Bible sia n̄kenyeneke se nnamde. Ekem ekpeme ufọk-n̄kpọkọbi kiet ama ọnọ mi n̄wed Afo Emekeme Ndidu Uwem ke Nsinsi ke Paradise ke Isọn̄. a Nte n̄kosụk n̄kotde n̄wed oro, mma nti ediwak n̄kpọ emi n̄kekpepde ke Bible ye Mme Ntiense Jehovah ini ndide eyenọwọn̄. Mma ntie n̄kere nte n̄kataharede uwem mi ke ntak obom. Mma n̄kere mban̄a ubon mi n̄ko. Ini ntide ke nditọeka mi iban iba ẹma ẹkabade ẹdi Mme Ntiense Jehovah, mma ndọhọ idemmi nte, ‘Mmọ ẹmọn̄ ẹtiene ẹdu uwem ke nsinsi.’ Ekem mbụp idemmi nte, ‘Nso ikpan mi nditiene ndu?’ Ini oro ke n̄kebiere ndikpụhọde.

 Edi mma ndiọn̄ọ ke ndikemeke ndikpụhọde ke idemmi. Ntre akpa n̄kpọ n̄kanamde ekedi ndibọn̄ akam nnọ Jehovah Abasi n̄kpe enye ubọk yak an̄wam mi. Ekem mma n̄wet n̄kọk itieutom Mme Ntiense Jehovah ke United States ndọhọ ẹnọ owo edikpep mi Bible. Mmọ ẹma ẹdọhọ esop kiet ke mbọhọ oro ẹdi ẹbịne mi. Ini oro owo ikayakke owo ndomokiet emi mîtoho ubon mi edise mi, ntre brọda kiet ke esop oro ama ọtọn̄ọ ndiwet leta nda nsọn̄ọ mi idem, esinyụn̄ ọnọ mme n̄wed esop Abasi ẹsọk mi. Oro akanam nnen̄ede mbiere ndikpụhọde.

 Akpan n̄kpọ emi n̄kanamde yak an̄wam mi ekedi ndikpọn̄ n̄ka afai oro n̄kodude ke ediwak isua. Ọbọn̄ n̄ka oro ekesịne n̄ko ke ebiet emi ẹkesịnde mi, ntre mma n̄ka mbịne enye usen kiet n̄kọdọhọ ke nyom ndidi Ntiense Jehovah. Idem ama akpa mi ndikop enye ọdọhọde: “Ekpedi emenen̄ede oyom ndidi, mfịna idụhe. N̄kemeke ndikpan fi ndinam n̄kpọ Abasi. Edi ekpedi oyom usụn̄ ndikpọn̄ n̄ka emi, mmenịm ke ọmọdiọn̄ọ se idiwọrọde fi.”

 Ke isua iba ama ekebe, mme anamutom ufọk-n̄kpọkọbi ẹma ẹkụt ke mmokpụhọde. Oro ama anam mmọ ẹtọn̄ọ ndifọn uwem ye ami. Ke uwụtn̄kpọ, mme ekpeme ufọk-n̄kpọkọbi ikesikọbike mi ubọk aba ini ẹmende mi ẹka n̄keyere mmọn̄. Ekpeme ufọk-n̄kpọkọbi kiet ama edi ebịne mi ẹdidọhọ ke imama se nnamde, yak n̄kama ke ubọk oro. Ke akpatre isua n̄kpọkọbi mi, ikpọ owo ufọk-n̄kpọkọbi ẹma ẹsio mi ẹka ufọk-n̄kpọkọbi efen emi ekperede enye emi n̄kesịnede. Ukpeme ikokponke ke itie enye oro. Ke ẹma ẹkekọbi mi ke isua duop, ẹma ẹsio mi ke 2004, ẹsịn mi ke bọs ẹnọ mi mfiak nnyọn̄ Mexico.

 Ndondo oro nsịmde Mexico, mma n̄koyom Ufọkmbono Obio Ubọn̄ Mme Ntiense Jehovah. N̄kesịne ọfọn̄ n̄kpọkọbi ndụk akpa mbono esop sia n̄kukụre eti ọfọn̄ emi n̄kenyenede ekedi oro. Kpa ye n̄kasan̄ade ntre ndụk mbono esop, nditọete ẹma ẹdara mi. Ke ini n̄kụtde nte mmọ ẹfọnde ido ye ami, mma ndiọn̄ọ ke n̄kodu ke otu ata mme Christian. (John 13:35) Ke mbono esop ama akasuana, mbiowo esop oro ẹma ẹnam ndutịm yak owo ọtọn̄ọ ndikpep mi Bible. Ke isua kiet ama ekebe, mma nna baptism nnyụn̄ n̄kabade Ntiense Jehovah. Ekedi ke September 3, 2005.

 Ke January 2007, mma ntọn̄ọ ndisikwọrọ ikọ kpukpru ini. Nsida hour 70 kpukpru ọfiọn̄ n̄kpep mme owo Bible. Ke 2011, mma n̄kụre n̄wed ke Ufọkn̄wed Ukpep Bible Eke Nditọete Iren Emi Mîdọhọ Ndọ (emi ẹkotde idahaemi Ufọkn̄wed Mme Ọkwọrọ Obio Ubọn̄). Ufọkn̄wed oro ama enen̄ede an̄wam mi nnam utom emi ẹnọde mi ke esop.

 Ke 2013, mma ndọ Pilar. Mmama enye etieti. Esidi mma ntịn̄ se n̄kesinamde ke edem nnọ enye, enye etịn̄ mbre mbre ete ke ọsọsọn̄ imọ ndinịm. N̄kafiakke n̄kodu oburobụt uwem oro aba. Ami ye n̄wan mi imenịm ke se ndide mfịn owụt ke Bible enyene odudu ndikpụhọde owo ekededi.—Rome 12:2.

 Mmekere ke se Jesus eketịn̄de ke Luke 19:10 osu mi ke idem. Jesus ọkọdọhọ ke ‘imọ ikedi ndiyom nnyụn̄ nnyan̄a se ikosopde.’ Ntiehe aba nte owo emi osopde usụn̄. Nsan̄ake aba nnam mme owo ibak. Se n̄kpepde ke Bible anam uwem mi enen̄ede enyene se ọwọrọde, anam nnam n̄kpọ emem emem ye mme owo, onyụn̄ anam nnen̄ede n̄kpere Jehovah emi okobotde mi.