N̄kamana ke Ciudad Obregón ke edere edere Mexico. Ikedi owo usụkkiet ke ufọk nnyịn, ami n̄kedi ọyọhọ eyen ition. Ebiet emi ikodụn̄de ama ekpere akwa obio; do ke ekpri in̄wan̄ ete mi okodu. Ama enem ndidụn̄ do, ubon nnyịn ama enem, ima inyụn̄ idiana kiet. Edi ini n̄kedide isua ition kpọt, oyobio ama abiat in̄wan̄ nnyịn, oro ama anam iwọrọ ikodụn̄ ke obio en̄wen.

 Ete mi ama ọtọn̄ọ ndinyene ekpri okụk. Edi enye ama ọtọn̄ọ ndin̄wọn̄ mmịn ndụk nnyịne. N̄kpọ oro ikayakke ndọ esie enem, ama onyụn̄ afịna nnyịn nditọ esie. Ami ye akpaneka mi ye udọeka mi ima itọn̄ọ ndisiyịp sika ete mi n̄n̄wọn̄. Akpa ini emi mmịn akanamde mi ekedi ini ndide isua itiokiet kpọt. Ikebịghike, ete mi ye eka mi ikodụn̄ke kiet aba, mma ndụk do nnyịne ndien ke ndisịme uwem.

 Eka mi ama atan̄ nnyịn okodụn̄ ye erenowo en̄wen. Ete oro ikesinọhọ enye okụk, ndien okụk emi eka mi akan̄wanade ikekemke se ida idia n̄kpọ. Ntre ami ye nditọeka mi ima isinam utom ekededi emi ikemede, edi okụk nnyịn ikekemke ndida nse mban̄a idem nnyịn. Mma nsisọk ikpaukot nnọ owo, nnyam bred, newspepa, chewing gum, ye mme n̄kpọ en̄wen. Mma nsinyụn̄ n̄wọrọ nsan̄a ke obio nyom udia ke n̄kpọ mbio mme imọ owo.

 Ini n̄kedide isua duop, ete kiet ama ọdọhọ nditiene imọ nnam utom ke itie uduọn̄ọ mbio. Mma nnyịme; ntre mma n̄kpọn̄ ufọk nnyụn̄ ntre n̄wed. Enye ekesikpe mi n̄kpọ nte naira 300 ke usen onyụn̄ ọnọ mi udia emi enye asatde osio ke itie mbio. Mma ntan̄ n̄kpọ ke itie mbio oro mbọp efe ndụn̄. Mbon emi ẹkedude do ẹma ẹsikpe ntịme ke itọn̄ ẹnyụn̄ ẹnam oburobụt n̄kpọ. Ediwak mmọ ẹma ẹsida n̄kpọsọn̄ ibọk ẹnyụn̄ ẹkpa mmịn. Ndiọkn̄kan ini ke uwem mi ekedi oro, mma nsitua kpukpru okoneyo, ndịk onyụn̄ anam mi. Bụt ama esinam mi etieti sia mmen̄kakaha n̄wed n̄konyụn̄ ndide ubuene. Mma ndụn̄ ke itie mbio oro n̄kpọ nte isua ita mbemiso n̄wọrọde n̄ka stet en̄wen ke Mexico. Mma n̄kanam utom ke in̄wan̄ nnọ owo ini nsịmde do, nsitet flawa ye cotton, ntan̄ mbọkọk, nnyụn̄ ndọk potato.

 Ke isua inan̄ ebede, mma mfiak nnyọn̄ Ciudad Obregón. Adiahaeka ete mi ama ọkọnọ mi ubet kiet ndụn̄; enye ekedi abiaibọk. Mma ntọn̄ọ ndisidaba ata ndisịme ndisịme ndap, mma nnyụn̄ mfụhọ tutu n̄kere ndiwot idemmi. Mma mbọn̄ akam okoneyo usen kiet nnọ Abasi nte: “Ọbọn̄, ekpedi afo mmọdo, mmoyom ndidiọn̄ọ fi, nyokpono fi ke nsinsi. Ekpedi nnennen ido ukpono odu, mmoyom ndifiọk.”

 Mma nsiyom ndidiọn̄ọ Abasi. Idem ke ini n̄kedide ekpri eyenọwọn̄, mma nsika nsio nsio ufọkabasi, edi kpukpru mmọ ẹma ẹsinọ mi idiọkesịt. Idụhe ndomokiet ke otu oro emi ẹkenen̄erede ẹkpep Bible m̀mê emi ẹken̄wamde mi ndiọn̄ọ Abasi. Ndusụk mmọ ẹkesinen̄ede ẹkwọrọ okụk, ẹma ẹsinyụn̄ ẹdu oburobụt uwem ke mbon eken.

 Ini n̄kedide isua 19, ebe udun̄wan eka mi ama ọdọhọ mi ke Mme Ntiense Jehovah ẹma ẹwụt imọ se Bible etịn̄de aban̄a ndikama ndisọi n̄kpọ ke ido ukpono. Enye ama okot Exodus 20:4, 5 ọnọ mi. Itie oro ọdọhọ yak nnyịn ikûnam edisọi mbiet. Ufan̄ikọ 5 ọdọhọ: “Kûnụhọ unọ mmọ, kûnyụn̄ uyak ẹnam fi anam n̄kpọ mmọ, koro ami Jehovah Abasi fo ndi Abasi emi oyomde san̄asan̄a utuakibuot.” Ekem ukot mi ama obụp mi ete: “Ekpedi Abasi esida ndisọi n̄kpọ anam utịben̄kpọ mîdịghe ekpedi enye oyom nnyịn ikama mmọ ituak ibuot inọ enye, nso inam enye ọdọhọ nnyịn ikûnam ndisọi n̄kpọ?” Mbụme oro ama anam ntie n̄kere n̄kpọ. Ke oro ebede, ima isineme nsio nsio n̄kpọ ke Bible. Ama esinem mi ndineme tutu editie nte n̄kanika ọsọsọp akan nte ekpedide.

 Ekem enye ama emen mi aka mbono esop Mme Ntiense Jehovah. Se n̄kokụtde nnyụn̄ n̄kopde ama enem mi tutu. Nditọwọn̄ ẹma ẹtiene ẹnam n̄kpọ, ẹtịn̄ ikọ udọn udọn ke mbot utịn̄ikọ! Mma n̄kere, ‘Ẹkpep mme owo ata n̄kpọ mi!’ Kpa ye emi n̄kasan̄ade nsuahade nsuahade nnyụn̄ n̄kamade anyan idet, mmọ ẹma ẹnen̄ede ẹdara mi. Ubon kiet ẹma ẹkam ẹdọhọ ndidia udia mbubreyo ke ufọk mmọ mbono esop ama asuana!

 Se n̄kekpepde ye Mme Ntiense Jehovah ama anam mfiọk ke Jehovah Abasi edi edima Ete emi ekerede aban̄a nnyịn inamke n̄kpọ m̀mê owo oto m̀mọ̀n̄, m̀mê enyene okụk m̀mê inyeneke, m̀mê ẹda enye didie ke obio, m̀mê enye onyụn̄ aka n̄wed eketre ke m̀mọ̀n̄. Enye isarike owo ndomokiet. (Utom 10:34, 35) Mma ndidiọn̄ọ Abasi ndien. Esịt iketịmekede mi aba, ikonyụn̄ itiehe aba nte enyene se nnanade.

 Ofụri uwem mi ama ọtọn̄ọ ndifọn. Mma ntre ndin̄wọn̄ sika, ndin̄wọn̄ mmịn ndụk nnyịne, n̄konyụn̄ n̄kpehe ntịme aba ke itọn̄. Esịt emi ekesiyatde mi tọn̄ọ ke ini eyenọwọn̄ ama ọtọn̄ọ nditre, n̄konyụn̄ ndabake ndisịme ndisịme ndap aba. Ufen emi n̄kọbọde toto ke ini eyenọwọn̄ ye nte mmen̄kakaha n̄wed ama anam n̄kere ke n̄wọrọke n̄kpọ; edi n̄kekereke ntre aba.

 N̄wan mi enen̄ede ama Jehovah, enye onyụn̄ an̄wam mi ata etieti. Idahaemi, ndi esenyịn emi asan̄ade-san̄a, nsisan̄a nse mme esop Mme Ntiense Jehovah man nsọn̄ọ mmọ idem nnyụn̄ n̄kpep mmọ Bible; mmọ ẹtie nte nditọeka mi iren ye iban. Bible ndisin̄wam mme owo ẹkpụhọde ye eti ukpep emi Abasi ekpepde nnyịn an̄wam mi n̄kûkop bụt aba mban̄a idemmi.