Mme Ntiense Jehovah ke Bulgaria ke ẹsịn idem ẹkpep mme owo ẹban̄a Abasi ye Bible. Ọtọn̄ọde ke isua 2000, ediwak Mme Ntiense ẹto mme idụt en̄wen ẹdika do ẹken̄wam mmọ ẹnam utom emi. Edieke owo akade idụt efen ndikwọrọ ikọ, nso idi ndusụk n̄kpọ emi ẹkemede ndinam okûnem enye ke idem? Ntak emi ndiwọrọ n̄ka idụt efen n̄kọkwọrọ ikọ mîdịghe ubiatini? Kop se ndusụk owo emi ẹkewọrọde ẹkedụn̄ ke Bulgaria ẹkwọrọ ikọ ẹtịn̄de.

 Darren emi odụn̄de ke England ọkọdọhọ ete: “Ima isidaduak ndika n̄kọkwọrọ ikọ ke idụt emi ẹyomde-yom mme ọkwọrọikọ. Ke mma n̄kọdọ Dawn, ima ikodụn̄ ke London man in̄wam esop emi ẹsikpepde mbon Russia Bible. Enyene mme ini emi ikesitịmde kpukpru n̄kpọ nnyịn ntem ima, iben̄e idem ndika idụt en̄wen n̄kodu n̄kwọrọ ikọ edi mme n̄kpọ ẹyetịbe emi mîdiyakke nnyịn ika. Aka ko, ima itọn̄ọ ndikere ke etie nte n̄kpọ enye oro ebe nnyịn. Edi kpa ke ini oro ke ufan nnyịn kiet ekedin̄wam nnyịn ikụt ke nte n̄kpọ etiede ye nnyịn edi se ikemede ndiwọrọ n̄ka idụt en̄wen n̄kodu n̄kwọrọ ikọ.” Darren ye Dawn ẹma ẹtọn̄ọ ndiyom idụt emi ẹyomde-yom mme ọkwọrọikọ, emi edinyụn̄ ọfọnde ye mmọ. Ke 2011, mmọ ẹma ẹwọrọ ẹkedụn̄ ke Bulgaria.

 Idatesịt mbon emi ẹkewọrọde ẹkedu ke idụt en̄wen ẹkwọrọ ikọ ama anam mbon emi utọ n̄kpọ oro mîkodụkke-dụk ekikere ẹtọn̄ọ ndiduak. Giada emi ekesidụn̄de ke Italy ye Luca ebe esie ọkọdọhọ ete: “Mma n̄kụt Mme Ntiense Jehovah emi ẹkekade ẹkedụn̄ ke South America ye Africa ẹsịn idem ẹkwọrọ ikọ. Esịt ama enem mmọ etieti. Nte esịt ekenemde mmọ ye mme mbụk ukwọrọikọ emi mmọ ẹkesibụkde ama enen̄ede enem mi. Oro ama anam mfiak n̄kere se n̄kpanamde nnọ Jehovah.”

 Ke 2015, Tomasz, Veronika an̄wan esie, ye nditọ mmọ mbiba Klara ye Mathias ẹma ẹkpọn̄ Czech Republic ẹkedụn̄ ke Bulgaria. Nso ikanam mmọ ẹwọrọ ẹka do? Tomasz ọdọhọ ete: “Iman nnyịn ye ndusụk mbon emi ikọdiọn̄ọde ẹma ẹwọrọ ẹka idụt en̄wen ẹkedu ẹkwọrọ ikọ. Ima itịm ikere se mmọ ẹkenamde oro, ye ndusụk mbụk ukwọrọikọ emi mmọ ẹkesibụkde. Nte esịt akadatde mmọ ama anam inen̄ede ikere n̄kpọ, ima inyụn̄ itie kiet ineme iban̄a oro.” Ubon mme Tomasz ẹdu idahaemi ke Montana ke Bulgaria ẹkwọrọ ikọ. Esịt onyụn̄ enem kpukpru mmọ.

 Sista Linda emi eketienede ọwọrọ okodụn̄ ke Bulgaria ọkọdọhọ ete: “Ediwak isua ko, mma n̄ka Ecuador nnyụn̄ n̄kokụt ndusụk owo emi ẹkewọrọde ẹkedụn̄ do ẹkwọrọ ikọ. Oro ama anam n̄kere ke usen kiet ami n̄ko mmekeme ndiwọrọ n̄kodụn̄ ke idụt emi ẹyomde-yom mme ọkwọrọikọ.” Se ikan̄wamde Petteri ye Nadja an̄wan esie emi ẹtode Finland ẹkeme ndikodu ke Bulgaria n̄kwọrọ ikọ ekedi mmọ nditie n̄kere uwụtn̄kpọ mbon emi ẹkekade idụt en̄wen ẹkedu ẹkwọrọ ikọ. Mmọ ẹkedọhọ ẹte: “Ke esop nnyịn ke Finland, enyene ndusụk nditọete emi ẹkenen̄erede ẹdiọn̄ọ ukwọrọikọ, emi ẹkewọrọde ẹka idụt efen ẹken̄wam mme owo ẹdiọn̄ọ Bible. Ini ekededi emi mmọ ẹkesibụkde se mmimọ ikanamde ke mme isua emi mmimọ ikodude do ikwọrọ ikọ, mmọ ẹkesibụk ye idatesịt. Mmọ ẹkedọhọ ke mme isua oro ekenem mmimọ akan ke ofụri isua uwem mmimọ.”

 Ọfọn mbon emi ẹyomde ndiwọrọ n̄kodu ke idụt en̄wen n̄kwọrọ ikọ ẹnen̄ede ẹtịm idem. (Luke 14:28-30) Nele emi otode Belgium eti se enye akanamde mbemiso enye ọwọrọde edidu ke Bulgaria. Enye ọdọhọ ete: “Ini n̄kọtọn̄ọde ndinen̄ede n̄kere ndiwọrọ n̄kodu ke idụt en̄wen n̄kwọrọ ikọ, mma mbọn̄ akam nnyụn̄ nyom mme ibuotikọ ke mme n̄wed nnyịn emi ẹnemede n̄kpọ ẹban̄a oro. Mma nnen̄ede n̄kot mme ibuotikọ oro nnyụn̄ ndomo ndikụt nsio nsio usụn̄ emi n̄kpetịmde idem mbemiso n̄wọrọde n̄ka idụt en̄wen.”

 Kristian ye Irmina emi ẹtode Poland ẹdụn̄ ke Bulgaria ẹbe isua usụkkiet idahaemi. Mmọ ẹma ẹkụt ke nte mmimọ ikesidụkde mbono esop ye otu emi ẹsemde usem Bulgaria ke Poland ama enen̄ede an̄wam mmimọ mbemiso iwọrọde ika Bulgaria. Mbon otu oro ẹma ẹdọhọ mmọ ẹkûkpa mba, ẹnyụn̄ ẹn̄wam mmọ ẹkpep usem Bulgaria. Kristian ye Irmina ẹkedọhọ ẹte: “Imedikụt ke edi ata eti n̄kpọ owo ndida ini esie nnam n̄kpọ nnọ Jehovah, ke Jehovah Abasi idiyakke enye anana se adade odu uwem. Edieke ọdọhọde Jehovah ke ofụri esịt ete, ‘Se mi mi! Dọn̄ mi utom,’ eyekeme ndinam mme n̄kpọ emi afo mûkekereke ke emekeme ndinam tutu amama.”—Isaiah 6:8.

 Reto ye Cornelia an̄wan esie emi ẹtode Switzerland ẹma ẹbiere ndision̄o ubọk ke ndusụk n̄kpọ man mmọ ẹkeme ndinen̄ede ntịm idem, ẹnyụn̄ ẹbọk okụk emi ẹdidade ikese iban̄a idemmọ. Mmọ ẹdọhọ ẹte: “Isua kiet mbemiso iwọrọde ikodụn̄ ke Bulgaria, ima ikodu urua kiet man inen̄ede idiọn̄ọ nte n̄kpọ etiede ke idụt oro. Ima ineme nneme ye mme isụn̄utom emi ẹdude do, mmọ ẹnyụn̄ ẹnọ nnyịn item emi edin̄wamde nnyịn.” Reto ye Cornelia ẹma ẹnam item oro, idahaemi mmọ ẹdu ke Bulgaria ẹbe isua 20.

 Ana mbon emi ẹwọrọde ẹkedụn̄ ke idụt efen ẹtọn̄ọ uwem obufa, ndien ndusụk n̄kpọ do ẹkeme ndisọn̄ mmọ. (Utom 16:9, 10; 1 Corinth 9:19-23) Ndikpep obufa usem edi akpan mfịna kiet emi ediwak mbon emi ẹwọrọde ẹka idụt efen ẹsinyenede. Luca emi iketịn̄de iban̄a ọdọhọ ete: “Ke akani esop nnyịn, ima isibọrọ mbụme etieti ke mbono esop. Edi ke Bulgaria, ama ada ini mbemiso ami ye n̄wan mi ikemede ndibọrọ ata ekpri mbụme ntem ke usem oro. Eketie nte ifiak idi nditọwọn̄. Ibọrọ nditọwọn̄ emi ẹketode idụt oro ama esinyene ibuot akan eke nnyịn.”

 Ravil emi otode Germany ọkọdọhọ ete: “Ndikpep usem Bulgaria ama akak mi, edi mma nsidọhọ idemmi nte, ‘Kûdọhọ ke idịghe imọ ikpanam utọ ndudue oro. Ama anam ndudue, sak be.’ Ndaha mme n̄kpọ emi ẹsọn̄de mi ndinam nte mfịna, nda nte ke mmọ ẹsịne ke otu mme n̄kpọ emi nnamde nnọ Jehovah.”

 Linda emi iketịn̄de iban̄a ọkọdọhọ ete: “Mfọnke ke ndikpep obufa usem. Usem Bulgaria ọsọn̄ ndikpep, ndien ediwak ini ama ọdọn̄ mi ndision̄o idem n̄kpọn̄. Sia mûdukemeke ndineme nneme ye mme owo, se mme owo ẹnyụn̄ ẹtịn̄de in̄wan̄ake fi, editie fi nte unyeneke owo. N̄kesikpep kpukpru n̄kpọ ke uwem Swedish emi edide usem nnyịn man n̄ka iso n̄kpere Jehovah. Utịt utịt, ndima nditọete mi ẹma ẹn̄wam mi ndiọn̄ọ usem Bulgaria.”

 Mfịna en̄wen edi ke ufọk esinen̄ede ọdọn̄ mbon emi ẹkewọrọde ẹka idụt en̄wen sia mmọ ẹkedaha ẹkpọn̄ ndima iman ye mme ufan mmọ. Eva emi eketienede Yannis ebe esie okodụn̄ ke Bulgaria ọkọdọhọ ete: “Nsonso oro eketie mi ikpọn̄ ikpọn̄ ke idem. Se ikan̄wamde mi edi ke ima isiwak ndikot mme ufan nnyịn ye mme iman nnyịn ke idụt nnyịn, ima inyụn̄ inyene mbufa ufan mi.”

 Se ikemede ndinam okûnem owo ke idem ikụreke ke oro, efen efen do. Robert ye Liana an̄wan esie emi ẹketode Switzerland ẹkedụn̄ ke Bulgaria ẹkedọhọ ẹte: “Usem Bulgaria ye nte ẹnamde n̄kpọ ke n̄kan̄ emi ama ọsọn̄ nnyịn, edi nnyịn ikọdiọn̄ọke ke ini etuep ke Bulgaria edi mûkaha ukwe.” Kpa ye oro, ebe ye n̄wan oro ndida uwem nte mmọ ẹkụtde, ndinyụn̄ nda se iwọrọde mmọ nnam idọkọ an̄wam mmọ ẹdu ke Bulgaria isua 14 idahaemi.

 Lilly ọdọhọ yak owo ekededi emi ekemede ndika n̄kodu ke ebiet emi ẹyomde-yom mme ọkwọrọikọ anam ntre. Enye ọkọdọhọ ete: “Enyene nte ndiọn̄ọde Jehovah idahaemi, nnyụn̄ n̄kereke ke n̄kpọdiọn̄ọ enye ntre ekpedi n̄kodu ke idụt nnyịn. Mmenen̄ede nda ini mi n̄n̄wam mbon en̄wen. Ndien oro an̄wam mi nnen̄ede n̄kpere Jehovah onyụn̄ anam esịt enen̄ede adat mi.” Ravil ebe esie esịn kpa ke uyo oro ete: “Inyeneke se n̄kpadade uwem mi nnam yak ọfọn akan emi. Se nnamde emi anam ndiọn̄ọ nditọete ke nsio nsio idụt en̄wen emi ẹsịnde idem ẹnam n̄kpọ Abasi, emi ẹnyụn̄ ẹnen̄erede ẹdiọn̄ọ ndikpep owo Bible. Mmekpep ediwak n̄kpọ nto mmọ.”

 Nte ediwak nditọete ẹnyịmede ndikpọn̄ idụt mmọ n̄kodu ke idụt en̄wen n̄kwọrọ ikọ nnyụn̄ nyak Jehovah ada mmọ an̄wam mbon en̄wen anam ẹnen̄ede ẹkwọrọ ‘eti mbụk obio ubọn̄ ke ofụri isọn̄.’ (Matthew 24:14) Nditọete emi ẹkenyịmede ndikodu ke Bulgaria n̄kwọrọ ikọ ẹkụt nte Jehovah ọnọde mmọ se esịt mmọ oyomde, ye nte enye anamde kpukpru se mmọ ẹkeduakde ndinam ẹnyene ibuot.—Psalm 20:1-4.