Ntiense Jehovah kiet ke Asia, emi ekerede Yanmei, ama an̄wam mma kiet emi ekerede Mingjie ebe usụn̄ sia mma oro ekedi nnan. a Mma oro ama ọdọhọ enye: “Sọsọn̄ọ etieti. Abasi ọdiọn̄ fi!” Enye ama obụp mma oro m̀mê enye akpama mmimọ isitie ntre ineme n̄kpọ ke Bible. Mma oro ama ọdọhọ ke imesibọn̄ akam ite Abasi anam imọ idiọn̄ọ eti ufọkabasi. Nso ikanam mma oro esibọn̄ akam oro?

 Mma oro (Mingjie) ọkọdọhọ ete ke ke 2008, ke ufan imọ emi edide nnan ama okot imọ ufọkabasi mbon n̄kpọnnam. Ke ini ọkwọrọikọ ufọkabasi oro ama ọkọkwọrọ ikọ ama, Mingjie ama obụp enye m̀mê ewe n̄wed ke enye okokot oro. Ọkwọrọikọ oro ama ọdọhọ enye ke edi Bible, ke Bible edi n̄wed Abasi, ke kpukpru se idude ke Bible edi akpanikọ. Ama enen̄ede ọdọn̄ Mingjie ndikot Bible ke idemesie. Ntre enye ama ọbọ Bible mme nnan ke usem Chinese, onyụn̄ okot Bible oro ama ke ufan̄ ọfiọn̄ itiokiet kpa ye oro Bible oro esịmde eboho 32. Nte Mingjie okokotde Bible, enye ama edikụt ke Abasi idịghe ita-ke-kiet nte ẹsikpepde ke ufọkabasi mmọ, ke Abasi onyụn̄ enyene enyịn̄, ke enye ekere Jehovah.

 Aka ko, nte mbon ufọkabasi mme Mingjie ẹkesinamde n̄kpọ ama ọtọn̄ọ odorode Mingjie. Enye ama edidiọn̄ọ ke mmọ isinamke se isịnede ke Bible. Ke uwụtn̄kpọ, mmọ ẹkesinọ mme nnan udan̄ udia, edi ẹnọ mbon eken udia ẹtemde obufa. N̄kpọ oro ama ayat Mingjie tutu enye ọtọn̄ọ ndiyom ufọkabasi en̄wen emi enye edikade. Se ikanamde Mingjie ọbọn̄ akam oyom eti ufọkabasi edi oro.

 Ke ntak emi Yanmei ọkọfọnde ido, Mingjie ama enyịme enye esikpep imọ Bible. Usen kiet, Mingjie ama etiene okodụk ikọ Abasi Mme Ntiense Jehovah. Ekem enye ama ọdọhọ ete: “Tutu amama ndifreke akpa usen oro n̄kodụkde ikọ Abasi Mme Ntiense Jehovah. Kpukpru mmọ iren ye iban ẹma ẹkọm mi ye ọyọhọ inemesịt. Ama enem mi tutu. Kpa ye ndide nnan, mma n̄kụt ke mmọ ẹnyene ima inyụn̄ inamke asari.”

 Mingjie ama ọtọn̄ọ esịn idem anam se enye ekpepde ke Bible onyụn̄ aka iso odụk ikọ Abasi Mme Ntiense Jehovah kpukpru ini. Enye ama esinen̄ede ama ndikwọ ikwọ Mme Ntiense Jehovah, edi n̄wed ikwọ mme nnan ikodụhe. Mbon esop mme Mingjie ẹma ẹn̄wam enye osion̄ọ ikwọ Mme Ntiense Jehovah esịn ke n̄wed mme nnan. Akada enye hour 22 ndision̄ọ kpukpru ikwọ 151 nsịn ke n̄wed mme nnan! Ke April 2018, Mingjie ama ọtọn̄ọ ndisitiene nsan̄a n̄kwọrọ ikọ. Nte ini akade, enye ama esikwọrọ ikọ hour 30 kpukpru ọfiọn̄.

 Ini Mingjie okoyomde ndina baptism, Yanmei ama okot mme itie Bible ye mme mbụme emi ẹsibụpde mbon baptism ke n̄wed Ẹtịm Nnyịn Idem Man Inam Uduak Jehovah esịn ke kọmputa ọnọ enye akama etịm idem. Mingjie ama ana baptism ke July 2018. Enye ọdọhọ ete: “Ima emi ẹkewụtde mi ke itie mbono oro ama enem mi tutu. Mma ndidiọn̄ọ eti ufọkabasi ndien. Esịt ama enem mi tutu ntua.” (John 13:34, 35) Mingjie enen̄ede ebiere nditiene mma mbon en̄wen nte ẹkemade enye, ntak edi oro enye esikwọrọde ikọ ofụri ini.