Usen kiet, ini n̄wan kiet emi ekerede Eliso, emi edide Ntiense Jehovah, okosụk ekpepde mma kiet Bible, isenowo ẹma ẹdi ufọk mma oro. Akamba owo ufọkabasi ye n̄wan esie ke ekedi. Eliso ama edifiọk ke akpan ete oro, n̄kukụre eyen mmọ, ama ọdọn̄ọ onyụn̄ akpa urua iba emi ebede.

 Ini Eliso ọkọdọn̄de mmọ esịt ke n̄kpa eyen mmọ, akamba owo ufọkabasi oro ye n̄wan esie ẹma ẹbom eyet. Ekem ete oro ama ayat esịt ọdọhọ ete: “Ndiọn̄ọke se inamde Abasi ayak utọ n̄kpọ emi esịm nnyịn! Nso inam enye emen n̄kukụre eyen mi? Isua 28 edi emi n̄kanam n̄kpọ Abasi, mmanam ediwak nti n̄kpọ. Ndi utịp Abasi ọkpọnọde mi edi emi? Nso inam Abasi owot eyen mi?”

 Eliso ama anam mmọ ẹdiọn̄ọ ke idịghe Abasi owot eyen mmọ. Enye ama onyụn̄ eneme aban̄a nte Abasi ọkọnọde Christ edikpa afak nnyịn, eneme ke ẹyenam mme akpan̄kpa ẹset, onyụn̄ eneme ntak emi Abasi ayakde idiọkn̄kpọ etịbe. Akamba owo ufọkabasi oro ye n̄wan esie ẹma ẹdọhọ Eliso ke enye ọbọrọ mbụme oro mmimọ ikesibọn̄de akam iyom ibọrọ.

 Urua oro etienede, akamba owo ufọkabasi oro ye n̄wan esie ẹma ẹtiene ẹditie ini ẹkpepde mma enyeneufọk oro Bible. Eliso ama eneme ye kpukpru mmọ “Ata Idotenyịn Odude Ọnọ Mbonima Fo Oro Ẹkpade.” Ibuotikọ oro odu ke n̄wed Nso ke Bible Enen̄ede Ekpep? Ama enem mmọ tutu nditiene nsịn uyo ke ukpepn̄kpọ oro.

 Ekem akamba owo ufọkabasi oro ye n̄wan esie ẹma ẹtiene ẹkedụk san̄asan̄a mbono Mme Ntiense Jehovah ke Tbilisi, Georgia. Ima ye edidianakiet emi mmọ ẹkekụtde do ama enen̄ede otụk mmọ—nte mmọ ẹkeyomde ufọkabasi mmọ etie edi emi, edi mmọ ikekemeke.