Ata ediwak ekpụk ye idụt, emi ẹsemde nsio nsio usem, ẹdu ke akai Amazon, ke South America. Ke July 2017, Mme Ntiense Jehovah 13 ẹma ẹsio uwat ẹdụk esịt esịt Inyan̄ Maroni ye nsio nsio n̄kọk inyan̄ oro ke French Guiana. Mmọ ẹkeka nso? Ẹkeka ndinam mme owo do ẹdiọn̄ọ se Abasi ọn̄wọn̄ọde emi odude ke Bible.

 Ọfion̄ kiet mbemiso mmọ ẹkade isan̄ usen 12 oro, kpukpru mbon ẹkeyomde ndika isan̄ ukwọrọikọ oro ẹma ẹnyene ekpri mbono. Owo mmọ kiet emi ekerede Winsley, ọkọdọhọ ete: “Ima ikot n̄kpọ iban̄a mme obio oro ye mbụk mmọ, inyụn̄ ineme nte ikpetịmde idem inọ isan̄ oro.” Ẹma ẹnọ kpukpru mmọ n̄kpọ emi mmọ ẹdifụtde n̄kpọ-nna ye ufọk-ọbọn̄ mmọ idọn̄ man mmọn̄ iditụk. Mmọ ẹma ẹdụk ubomofụm ikaba, ẹnyụn̄ ẹwat ediwak hour ke ekpri ubom ubọk.

 Ekere ke eketie mbon emi ẹkemekde ndika isan̄ oro didie? Claude ye Lisette emi ẹbede isua 60 ẹma ẹsọsọp ẹnyịme ndika. Claude ọkọdọhọ ete: “Esịt ama enen̄ede enem mi, edi ndịk ama anam mi ekpri. Mma n̄kop ke enyene mme itie ke akpa oro, emi mmọn̄ esisọpde ukot tutu ekeme ndisịp ubom.” Lisette ọkọdọhọ ete: “Mma n̄kere m̀mê ndinanam didie ye usem mbon Amerind.”

 Mickaël emi eketienede aka ama onyụn̄ etịn̄ ukem ikọ oro. Enye ọkọdohọ ete: “Nnyịn ikenen̄ekede idiọn̄ọ mbon Wayana. Mma n̄kpep ekọm ye ikọ Wayana ifan̄ ke Intanet.”

 Shirley ye Johann ebe esie ẹma ẹtiene ẹka isan̄ oro. Shirley ama ewet enyịn̄ mme usem ẹsisemde do. Enye ọkọdọhọ ete: “Ima ika jw.org ikosion̄ọ mme vidio ke ata ediwak usem oro. Ima inyụn̄ idep n̄wed ukpep usem Wayana.”

 Ke Tuesday, July 4, Ntiense Jehovah 13 oro ẹma ẹdụk ubomofụm ke Saint-Laurent du Maroni ẹkesịm ekpri obio emi ekerede Maripasoula, ke French Guiana.

 Mmọ ẹma ẹda usen inan̄ ẹkwọrọ ikọ ke nsio nsio obio ke mbeninyan̄ Maroni. Mmọ ẹkesidụk ubom eto emi esịn̄de engine ẹka mme obio oro. Roland emi eketienede aka ukwọrọikọ oro ọkọdọhọ ete: “Mbon Amerind ẹnen̄ede ẹma Ikọ Abasi ẹnyụn̄ ẹbụp ediwak mbụme; ndusụk mmọ ẹma ẹdọhọ ẹkpep mmimọ Bible.”

 Ke obio kiet, Johann ye Shirley ẹma ẹkwọrọ Ikọ ẹnọ n̄wan ye ebe emi owo mmọ okowotde idem—ikebịghike n̄kpọ oro eketịbe. Johann ọkọdọhọ ete: “Ima iwụt mmọ vidio Edinam TV Mme Ntiense Jehovah; ikowụt mmọ A Native American Finds His Creator. Mmọ ẹma ẹnen̄ede ẹma vidio oro. Mmọ ẹma ẹno nnyịn e-mail adres mmọ man ikpesineme nnem.”

 Obio emi ọkọniọn̄de Mme Ntiense Jehovah oro usụn̄ akan ke mben inyan̄ oro ekedi Antécume Pata. Isan̄ ama akak mmọ ini mmọ ẹsịmde do. Edi ọbọn̄ obio oro ama ọnọ mmọ itie ẹna. Mmọ ẹma ẹtiene ẹyere mmọn̄ ke esụk nte mbon obio oro.

 Ekem mmọ ẹma ẹto do ẹka Twenké, ẹnyụn̄ ẹkesịm do ini mme owo do ẹsụk ẹtuade owo mmọ emi akakpade. Éric emi eketienede anam ndutịm isan̄ ukwọrọikọ oro ọkọdọhọ ete: “Ọbọn̄ obio oro ama ayak nnyịn isan̄a nte imama ke obio oro idọn̄ mme owo esịt.” Enye ama ọdọhọ n̄ko ete, “Ọbọn̄ obio oro ye ubon esie ẹma ẹnen̄ede ẹma se ikokotde inọ mmọ ke Bible Wayana. Ima inyụn̄ ibre vidio iwụt mmọ ke Bible ọn̄wọn̄ọ ke Abasi ayanam mme owo ẹset.”

 Ebiet en̄wen Mme Ntiense Jehovah oro ẹkekade ekedi Grand-Santi. Akada ubomofụm emi mmọ ẹkedụkde minit 30 ndito Maripasoula n̄kesịm do. Mmọ ẹma ẹda Tuesday ye Wednesday ẹkwọrọ Ikọ Abasi ẹno mme owo ke obio oro. Ke Thursday, mmọ ẹma ẹtọn̄ọ isan̄ en̄wen—akada mmọ hour ition ye ubak ndikesịm obio emi ekerede Apatou, ke Inyan̄ Maroni.

 Ke udiana akpatre usen isan̄ mmọ, mmọ ẹma ẹka nsio nsio obio mme Maroon ke esịt akai—Maroon ẹdi nditọ nditọ ifịn emi ẹkemende ke Africa ẹka South America ini idụt en̄wen ẹkekarade Suriname, emi ekperede French-Guiana. Mme Ntiense Jehovah oro ẹma ẹkot mme owo ẹte ẹdidụk ikọ Abasi mmọ ẹkenịmde ke akai oro, ke efe emi mmọ ẹketuakde. Claude ọkọdọhọ ete: “Esịt ama enen̄ede enem nnyịn ndikụt ediwak owo ẹdide. Usenubọk oro ke ikokot mmọ!” Ẹma ẹnọ Karsten ikọ Abasi ọkwọrọ ke usem Aukan. Akpa enye eketienede aka utọ isan̄ oro ekedi emi. Ibuotikọ ikọ Abasi esie ekedi, “Nte Uwem Emi Edi Ukụre Se Idude?” Owo 91 ẹma ẹto nsio nsio obio ẹdidụk ikọ Abasi oro.

 Ke akpatre, mbon ẹketienede ẹka ukwọrọikọ oro ẹma ẹfiak ẹnyọn̄ọ Saint-Laurent du Maroni. Esịt ama enem mmọ etieti sia mme owo ẹma ẹnen̄ede ẹma Ikọ Abasi, ẹbọ ediwak n̄wed, ẹnyụn̄ ẹse ediwak vidio Mme Ntiense Jehovah.

 Lisette ọkọdọhọ ete: “N̄kemeke nditịn̄ nte esịt enemde mi ke isan̄ oro ikakade do.” Cindy ekesịn esie ntem: “Ẹkpedọhọ ke ẹmọn̄ ẹfiak ẹka nda ke ukot. Ubaha ekpedide ama etiene edi, ọkpọfiọk nte esịt enemde mi!”

 Nte isan̄ oro ekenemde ama anam ọdọn̄ ndusụk mmọ ndifiak n̄ka do. Mickaël ọkọdọhọ ete: “Iyafiak ika!” Winsley ama ọwọrọ okodụn̄ ke Saint-Laurent du Maroni. Claude ye Lisette, emi ẹbede isua 60, ẹma ẹwọrọ ẹkedụn̄ ke Apatou.